Kozo mbage ni: Salango a-étude so ayeke gue na li ni
Étude ti Bible ayeke nyen?
1 Na ndo lê sese kue, awakua ti Nzapa ayeke sala a-étude ndulu na kutu omene nze oko oko. Na salango kusala na anzoni kode ti fango ye, e lingbi ti mû maboko na awamandango Bible so ti gue na li ni, ti mû tele ti ala na Nzapa nga ti wara batême na ti ga azo so “[a]lingbi fa nda ti tënë so na ambeni zo nga.” (2 Tim. 2:2). Mo ye ti mû maboko na zo so mo yeke manda Bible na lo ti gue na li ni na lege so? Ti to nda ni na article so, fade Kusala ti Royaume ayeke sigigi na mbeni molongo ti a-article so ayeke fa akota ye so alingbi ti mû lege na e ti sala a-étude so ayeke gue na li ni.
2 Na ngoi wa a yeke sû rapport ti mbeni étude?: Tongana lakue mo yeke sala ka alisoro na ndo Bible na yâ oko ti ambeti so a hunda ti manda na ni, atâa lisoro ni ayeke gi ndulu, a yeke mbeni étude ti Bible la mo yeke sala. Même tongana a yeke sala étude ni gi na lutingo na nduzu na yanga ti da wala na téléphone, a yeke nga gi étude la. A lingbi ti sû étude ni na ndo rapport tongana a sala ni fani use na peko ti so a fa na zo ni kapa ti mandango ye ni, nga tongana mo bâ so mbeni ye ayeke dä so amû lege na mo ti bâ so fade étude ni ayeke gue na li ni.
3 Brochure Ahunda nga na buku Hingango Ye ayeke ambeti so a yeke sala kusala na ni ti sala na a-étude ti Bible mingi. Tongana a bâ so mbeni zo so ahunzi ti manda ambeti so ayeke gue na li ni, atâa gi yeke yeke, na lo yeke gonda mingi ye so lo yeke manda, a lingbi ti ngbâ ti manda na lo na yâ buku Voro Nzapa. A lingbi ti mû brochure Mo Lingbi ti Duti Ndeko ti Nzapa! ti manda na azo so ahinga mbeti mingi pëpe wala so ahinga ti diko mbeti nzoni pëpe.
4 Kusala ti mandango Bible amû maboko na azo kutu mingi ti ga atâ disciple ti Jésus Christ (Mat. 28:19, 20). Na salango ye alingbi na awango so ayeke mû ande na yâ molongo ti a-article so, mo lingbi ti sala a-étude so ayeke gue na li ni.