Mbage 12 ni: Salango a-étude so ayeke gue na li ni
Leke ala ti to nda ti a-étude na ti ngbâ ti sala ni
1 Tongana azo so e manda Bible na ala ato nda ni ti fa tënë awe, ala lingbi peut-être ti sala mbito kete tongana ala hinga so a lingbi ala mveni kue ato nda ti manda Bible na azo. Tongana nyen si e lingbi ti mû maboko na ala ti wara mbeni nzoni bibe na ndo kota mbage ti kusala ti e ti fango tënë so?—Mat. 24:14; 28:19, 20.
2 Tongana mbeni zo so amanda Bible ato nda ni ti fa tënë tongana oko ti awakua so ade ti wara batême pëpe, lo wara peut-être awe aye ti nzoni so aga na peko ti mungo mbage ti lo na Ekole ti Kusala. Afango ye so lo wara na lege ti lekengo nga na salango adevoir alingbi ti mû maboko na lo ti maï akode ti lo si lo ga mbeni, “zo so ahinga kusala ni si kamene asala lo pëpe, zo so afa nda ti tene-biani na lege ni”.—2 Tim. 2:15.
3 Fa ye na lege ti tapande ti mo: Jésus afa ye polele na adisciple ti lo na lo zia nga mbeni nzoni tapande. Lo tene so zo so a fa ye na lo nzoni, “fade lo ga tongana maître ti lo.” (Luc 6:40). A yeke kota ye teti mo nga ti haka peko ti salango ye ti Jésus na lege so mo zia mbeni nzoni tapande na fango tënë. Tongana mbeni zo so mo manda Bible na lo abâ pendere tapande ti mo na yâ fango tënë, lo lingbi ti bâ so nda ni so a hunda ti kiri ti sala avizite ayeke ti to nda ti mbeni mandango Bible na azo.
4 Fa na lo nga so tongana lo tisa mbeni zo ti manda Bible, a yeke kota ye pëpe ti gbu oko ngoi ni so ti zi yâ ti anzene nzene tënë kue na ndo étude ni. Mingi ni, nzoni kode ni ayeke ti sala lisoro na ndo ti mbeni paragraphe oko wala use ti mbeti so lo ye ti manda na zo ni. Mo lingbi ti wara ambeni tënë mingi na ndo ni na lembeti 8 ti mbeti so, nga na lembeti 6 ti Kusala ti Royaume ti janvier 2002.
5 Tongana a yeke na lege ni ti sala ni, tisa wamandango ye ni ti sigigi na mo wala na mbeni ita biazo nde ti sala a-étude. Lo lingbi ti sala ndulu tënë na ndo mbeni paragraphe wala mbeni ngbongboro versê ti yâ ni. Tongaso, gi na bango aye so mo yeke sala, wamandango ye ni alingbi ti manda aye mingi na ndo lege ti sala a-étude so ayeke gue na li ni (aProv. 27:17; 2 Tim. 2:2). Gonda lo, na fa nga na lo ye so lo lingbi ti sala si lo maï.
6 Ti fa na afini wakua lege ti ga awafango ye ti Tënë ti Nzapa ayeke leke ala teti “nzo kusala” so ayeke ti to nda ti a-étude na ti ngbâ ti sala ni ala mveni (2 Tim. 3:17). So tâ kota ye ti ngia si e yeke na ni ti sala kua maboko na maboko na ala ti mû tisango ndo so: “Zo so aye, zia lo nyon ngu so amû fini, zia lo nyon senge senge”!—Apoc.22:17.