Ekole ti Formation Ministérielle: Mbeni kota lege so azi teti kusala
1 Na lege ti prophète Jérémie, Jéhovah atene: “Fade Mbi zia aberger na ndo [azo ti mbi] ti fa ndo ti tengo pele na ala; na fade mbito asala ala mbeni pëpe, na mbito agbu ala pëpe, na fade mbeni oko ti ala agirisa pëpe.” (Jér. 23:4). A yeke sala laso mara kua ti berger so na popo ti azo ti amara kue. A yeke a-ancien saki mingi mingi ti akongregation si ayeke sala ni. Na ndo ni, mbeni bungbi ti gbâ ti amaseka-koli tongana angu ti mamio amû tele ti ala mveni na bê ti ala ti sala kusala ti Jéhovah (Ps. 110:3). Aita-koli ti tâ be-ti-molenge so ayeke biani mbeni deba nzoni teti akongregation ti Nzapa! Teti so kusala ti bungbingo azo angbâ ti gue, a yeke na bezoin ti tene akoli so alingbi ayeda ti mû tele ti ala ti mû maboko na aita ti ala.
2 Mbeni nzoni ye so a leke ti fa ye na a-ancien nga na aserviteur ti mungo maboko so ayeke kumbamba teti akusala so ayeke mingi ayeke Ekole ti Formation Ministérielle. Ngbele ye so ekole ni ato nda ni na ngu 1987, a leke aklase 999 so na yâ ni a fa ye na a-élève ahon 22 000 ti ndulu na afiliale 140. Ti aita-koli so, ekole so ayeke mbeni ‘kota lege so a lungula ti sala na kusala’.—1 aCor. 16:9.
3 Nda ti ekole ni: Nda ti Ekole ti Formation Ministérielle ayeke ti fa ye na akoli so alingbi na ti leke ala ti yô akungba na ndo kue so bezoin ayeke dä na yâ bungbi. Ekole ni ayeke kono ngangu ti ala ti mû li ni na yâ fango tënë, ti mû mbage na batango kundu ni na ti fa ye na yâ kongregation. Na peko ti warango adiplôme ti ala, a yeke tokua ambeni élève ni tongana apionnier spécial wala tongana asurveillant so ague na ndo nde nde na kodoro ti ala wala na kodoro wande. Ti ambeni, ala ngbâ ti sala kua na yâ akongregation ti ala, wala a tokua ala na ambeni territoire ti filiale ti kodoro ti ala so bezoin ayeke dä.
4 Na yâ ayenga miombe ti mandango ye ni, a-élève ni ayeke manda Mbeti ti Nzapa alï mingi. Ala yeke bâ mbilimbili gbâ ti afango ye ti Bible, akungba ti aberger nga na awango teti lekengo na akpale na yâ fini ti Chrétien. Ala yeke manda ye nga na ndo ye so Mbeti ti Nzapa atene na ndo bango lege ti kusala, atënë ti fango ngbanga nga ti lekengo aye ti bungbi. A fa na ala mbilimbili kode ti salango tënë na gbele azo, na a mû maboko na ala oko oko kue ti gue na li ni hio na lege ti yingo.
5 Aye so a hunda: A yeke tâ tënë so ye so a hunda ti gue na ekole ni alingbi na azo kue pëpe. A lingbi azo ni asala kusala ti ancien wala ti serviteur ti mungo maboko a ninga ngu use ti gue na ni. A lingbi ala kue ayeke akumbamba, so ngu ti ala ayeke na popo ti 23 ti si na 50. A lingbi ala hinga ti diko, ti sû na ti tene nzoni yanga ti kodoro so ayeke fa na ekole ni, nga a lingbi ala duti na nzoni tele, pëpe mbeni zo so a hunda na lo ti te pëpe ambeni kobe wala ti leke aye nde teti lo. A yeke soro kozoni ala so ayeke apionnier permanent.
6 Ala so amû tele ti ala ti sala ni, a lingbi ala yeda ti gue na ndo kue so bezoin ayeke dä, nga a lingbi ye akanga lege na ala pëpe. A hunda mara ti bibe so prophète Esaïe ayeke na ni, so lo yeda ti mû tele ti lo ti sala na mbeni kua so ayeke nde. Lo tene: “Mbi yeke, Mo to mbi.” (Es. 6:8). Lo fa nga tâ be-ti-molenge na yâ fini ti lo kue. Ala so amû tele ti ala ti sala Ekole ti Formation Ministérielle, a lingbi a duti ndoye ti aita ti ala nga na nzara ti sala ye teti ala si apusu ala ti sala ni, pëpe nzara ti wara yango-iri wala kota ndo. Na peko ti so ala wara nzoni fango ye so, a yeke ku ti tene ala so awara adiplôme ti ala asala ye alingbi na ye so ala manda teti nzoni ti aita ti ala.—Luc 12:48.
7 Aye ti nzoni: Na yâ ayenga miombe ti mandango ye so alï mingi, ala so awara adiplôme ‘akpengba na yâ tënë ti mabe na lege ti nzo tënë’. (1 Tim. 4:6). Ye so amû na ala ye kue so alingbi ti tene ala mû maboko na ti kpengba ambeni na yâ ti akongregation ti ala nga na yâ acirconscription. Na ando mingi so a tokua a-élève ti Ekole ti Formation Ministérielle dä, fango tënë ague na li ni; a wa azo ti mû kusala ti pionnier, mbilimbili na popo ti amaseka, na a to nda ti bâ ndo mingi na ndo afini zo so ayeke bungbi na mara ti Nzapa.
8 Mo yeke ancien wala serviteur ti mungo maboko so ayeke kumbamba, so ayeke na popo ti ngu 23 na 50? Ngbanga ti nyen ti bâ pëpe lege ti sû demande teti Ekole ti Formation Ministérielle? Mo yeke mbeni ita maseka-koli so abi bê na ndo aye ti sala na yâ kusala ti Jéhovah? Ngbanga ti nyen ti bata fini ti mo si a duti na aye mingi pëpe na ti tene aye agboto lê ti mo pëpe, tongaso mo lingbi ti mû ‘kota lege so a lungula ti sala kusala’? A lingbi ti ga na mo ngia mingi. Biani, Ekole ti Formation Ministérielle ayeke tâ mbeni deba nzoni gi pëpe teti ala so awara diplôme ni me nga teti akongregation ti azo ti Nzapa ti sese kue.
[Kete tënë na lembeti 3]
Ala wara ye ti nzoni na yâ fango ye ni
“Fango ye so asala si fango tënë ti mbi nga na kode ti mbi ti sala kua ti berger na ndara aga nzoni na ngoi so mbi sala kua na aversê.”
“Ekole ni amû na mbi ngangu mingi ti yô akungba nde nde so mbi yeke na ni na yâ kongregation.”
“Ekole ni achangé aye mingi na yâ fini ti mbi, tongana bango ndo ti mbi na mbage ti aye so Nzapa aleke teti aChrétien nga na bungbi ti lo.”
“Fango ye so mbi wara amû lege na mbi ti bâ so a lingbi mbi mû tele ti mbi ti sala kusala na ndo so bezoin ayeke dä.”