A-Ancien I Fa na Ambeni Zo ti Yô Kungba

NA YÂ ti akongregation ti aTémoin ti Jéhovah na ndo sese kue, a yeke tâ na kota bezoin ti azo so alingbi ti sala kusala tongana asurveillant. Akpengba nda ti tënë ota ayeke dä teti ye so.

Kozoni, Jéhovah ayeke sala si zendo ti lo ti sala si “lo so ayeke kete mingi aga mbeni mara ti ngangu” ayeke ga tâ tënë. (Isaïe 60:22, NW) Na lege ti nzobe ti Lo so e lingbi na ni pëpe, afini disciple ndulu na kutu oko awara batême tongana aTémoin ti Jéhovah na yâ angu ota so ahon. A yeke na bezoin ti azo so a lingbi ti zia bê na ndo ala, ti mû maboko na afini zo so awara batême ti gue na li ni ti ga abiazo Chrétien.—aHébreu 6:1, NW.

Use ni, gango mbakoro wala akpale ti seni ahunda na ambeni zo so asala kusala tongana a-ancien teti angu mingi ti yapu yâ ti akusala ti ala na yâ kongregation.

Ota ni, ambeni ancien so angbâ ti sala kusala na wâ ayeke fadeso na yâ ti aKomite so abâ lege ti songo na ada-nganga, aKomite so ayeke bâ lege ti lekengo aDa ti Royaume na ambeni ndo, wala akomite so ayeke bâ lege ti aDa ti Kota Bungbi. Na yâ ambeni ye, a lingbi ala zia lege ti ambeni kungba so ala yeke na ni na yâ ti kongregation ti ala, si amû ngoi ti ala kue pëpe.

Tongana nyen a lingbi ti wara akoli so ayeke na kode, ti lingbi hio na ye so atia? Kelele ni ayeke fango lege. Bible awa asurveillant Chrétien ti fa lege na ‘abe-ta-zo nde so fade alingbi fa nda ti tënë so na ambeni zo nga.’ (2 Timothée 2:2) Mbupa “ti fa lege” aye ti tene ti fa ye si ye ni alingbi na ni, wala awara kode so alingbi. Zia e bâ tongana nyen a-ancien alingbi ti fa lege na ambeni zo so alingbi.

Mû Tapande ti Jéhovah

Biani, Jésus Christ ‘alingbi lani, lo yeke na akode na yâ kusala ti lo, na a yeke ye ti dongo bê pëpe! A yeke Jéhovah Nzapa mveni si afa lege na lo. Aye wa asala si programme ti fango ye so alë lengo? Jésus afa aye ota, tongana ti so a fa ni na Jean 5:20: “Babâ [1] andoye Molenge, na [2] Lo fa na Molenge ye kue so Lo mveni asala. Na fade Lo fa na Lo [3] kusala kota ahon so.” (e si e sû agere ti mbeti so nde) Bango aye ota so oko na oko ayeke mû lege ti gbu nda ti tënë ti fango lege.

Bâ so Jésus atene kozoni kue: “Babâ andoye Molenge.” Ngbele ye na tongo nda ti lekengo ye kue, mbeni songo ti wâ ayeke lani na popo ti Jéhovah na Molenge ti lo. A-Proverbe 8:30 (NW) abi lumière na ndo songo so: “Tongaso mbi [Jésus] duti na tele ti lo tongana wakua ti kode, nga lâ na lâ mbi ga lo so lo ndoye lo mingi, mbi wara ngia na gbele lo lakue.” Na yâ bibe ti Jésus, kite ayeke dä oko pëpe so Jéhovah ‘andoye lo mingi.’ Nga, Jésus ahonde pëpe ngia so lo yeke na ni na ngoi so lo yeke sala kusala na tele ti Babâ ti lo. So tâ ye ti nzoni si a yeke, tongana songo ti wâ, so azi lege na lisoro ti duti polele, ayeke na popo ti a-ancien na ala so ala yeke fa lege na ala!

Use ye ni ayeke so Babâ ‘afa na Molenge ye kue so Lo mveni asala.’ Atënë so ayeda biani na ye so aProverbe 8:30 afa, so atene Jésus ‘aduti na tele’ ti Jéhovah na ngoi so a yeke leke ndagigi. (Genèse 1:26) A-ancien alingbi ti mû peko ti pendere tapande so na salango kusala ndulu mingi na aserviteur ti mungo maboko, na fango na ala tongana nyen ti yô kungba ti ala nzoni. Ye oko, a yeke pëpe gi aserviteur ti mungo maboko so a hiri ala na kusala ade ti ninga pëpe si ayeke na bezoin ti tene a fa lege na ala ti gue na li ni. Ti aita be-ta-zo so asala nzala ti yô kungba ti surveillant a sala fadeso angu mingi awe, me so a de ti hiri ala na kusala lâ oko pëpe ayeke tongana nyen? (1 Timothée 3:1) A lingbi a-ancien amû na mara ti azo tongaso ambilimbili wango, ti tene ala hinga ando so a lingbi ala sala kusala ti maï dä nzoni.

Na tapande, peut-être mbeni serviteur ti mungo maboko ayeke mbeni zo so a lingbi ti zia bê na ndo lo, na lo yeke yô akungba ti lo na lege ni. Lo lingbi nga ti duti mbeni nzoni wafango ye. Na yâ aye mingi, peut-être lo yeke sala mbeni nzoni kusala na yâ ti kongregation. Ye oko, lo yeke bâ peut-être pëpe so lo yeke ndulu ti sala ye na ngangu na yâ asongo ti lo na afon lo Chrétien. A-ancien ayeke na bezoin ti fa na gigi “mbeni tâ be-ti-molenge so ayeke ti ndara.” (Jacques 3:13, NW) Fade a yeke duti pëpe fä ti nzobe teti mbeni ancien ti sala tënë na serviteur ti mungo maboko so, na fango na lo polele kpale ni, na mungo ambilimbili tapande, nga na mungo awango so alingbi ti tene ye aga nzoni ahon? Tongana ancien ni aleke nzoni ti ‘zia ingo na yâ wango ti lo,’ peut-être a yeke yamba ande atënë ti lo nzoni. (aColossien 4:6) Biani, serviteur ti mungo maboko ni ayeke sala ande si kusala ti ancien ni amû ngia na bê mingi ahon na dutingo ndulu ti zi bê ti lo nga ti yeda na wango kue so lo yeke wara.—Psaume 141:5.

Na yâ ti ambeni kongregation, a-ancien ayeke mû lakue na aserviteur ti mungo maboko fango lege so alingbi. Na tapande, tongana ala yeke sala vizite na azo ti kobela wala na ambakoro, ala yeke mû na tele ti ala aserviteur ti mungo maboko so ayeke na kode. Na lege so, serviteur ti mungo maboko ni alingbi ti manda ye na yâ kusala ti berger. Biani, aye mingi ayeke dä so mbeni serviteur ti mungo maboko alingbi ti sala ti ngbâ lakue ti gue na li ni na lege ti yingo.—Bâ encadré so ayeke na gbe ni, so li ti tënë ni ayeke “Ye so Aserviteur ti Mungo Maboko Alingbi ti Sala.”

Ota ye so asala si fango lege so a mû na Jésus alë lengo mingi ayeke so Jéhovah afa lege na lo na bingo bê na aye so ayeke gue ande na li ni na yâ ti angoi so ayeke ga. Jésus atene so Babâ ni ayeke fa na Molenge “kusala ahon so.” Ye so Jésus amanda na ngoi so lo de na sese amû lege na lo ti lë alengo so a hunda na lo ti duti na ni ti yô akungba so lo yeke wara na ngoi so ayeke ga na peko. (aHébreu 4:15; 5:8, 9) Na tapande, so tâ nene kungba si Jésus ayeke ndulu ti wara ande: kungba ti zingongo na popo ti awakinda azo ngbundangbu mingi so akui fadeso awe, na ti fâ ngbanga ti ala!—Jean 5:21, 22.

Tongana ala yeke fa lege na aserviteur ti mungo maboko, a lingbi a-ancien ti laso abata na li ti ala abezoin so ayeke ga na peko. Atâa so a lingbi ti bâ so wungo ti a-ancien na aserviteur ti mungo maboko alingbi awe teti abezoin so ayeke dä fadeso, ye ni ayeke duti ande tongana nyen na ngoi so mbeni fini kongregation abâ gigi, wala tongana gbâ ti akongregation abâ gigi? Na ngoi ti angu ota so ahon, a zia na sese afini kongregation ahon 6 000 na ndo sese kue. So tâ kota wungo ti a-ancien na ti aserviteur ti mungo maboko si a yeke na bezoin ni ti bata afini kongregation so!

A-ancien, i yeke mû tapande ti Jéhovah na maïngo mbeni songo ti wâ na azo so i yeke fa lege na ala? I yeke fa na ala tongana nyen ala lingbi ti yô kungba ti ala? I yeke bi bê na abezoin ti kekereke? Mungo tapande ti lege so Jéhovah afa na ye na Jésus ayeke ga ande na gbâ ti adeba nzoni na azo mingi.

I Sala Mbito Pëpe ti Mû Akungba na Ambeni Zo

A-ancien biazo so lakue ayeke wara lege ti yô akungba mingi na oko ngoi ayeke peut-être ndulu pëpe ti mû kungba na ambeni zo. Peut-être ala tara ti sala tongaso kozo, me a ga na aye ti nzoni mingi pëpe. Tongaso, ala lingbi peut-être ti duti na bango ndo so: ‘Tongana mbeni zo aye si a sala mbeni kua nzoni, a lingbi lo sala ni lo mveni.’ Ye oko, mara ti bango ndo tongaso ague legeoko na ye so bê ti Jéhovah aye, so a fa ni polele na yâ Bible na so a hunda ti tene azo so ahinga ye mingi pëpe awara fango lege na mbage ti ala so ahinga ye mingi ahon?—2 Timothée 2:2.

Bê ti bazengele Paul anze lani tongana mbeni oko ti afon lo na yâ tambela, Jean Marc, azia kusala ti lo na Pamphylie na akiri na ndo ti lo. (Kusala 15:38, 39) Ye oko, Paul azia lege pëpe na hongo nde ti Jean Marc so ti nze bê ti lo na ti zia ti fa lege na ambeni zo. Lo soro mbeni ita-koli nde so ade maseka, Timothée, na lo fa lege na lo na yâ kusala ti missionnaire.a (Kusala 16:1-3) Na Bérée, amissionnaire atingbi na kota kangango lege so asala si Paul alingbi pëpe ti ngbâ kâ. Tongaso, lo zia fini kongregation ni na maboko ti Silas, mbeni ita-koli biazo, nga na Timothée ti tene ala bi lê na ndo ni. (Kusala 17:13-15) Kite ayeke pëpe so Timothée amanda ye mingi na mbage ti Silas. Na pekoni, tongana Timothée alingbi awe ti yô ambeni kungba na ndo ni, Paul atokua lo na Thessalonique ti kpengba kongregation ni kâ.—1 aThessalonicien 3:1-3.

Songo so ayeke na popo ti Paul na Timothée ayeke lani pëpe gi senge songo, so adë dengo. Mbeni songo ti wâ ayeke lani na popo ti ala. Tongana lo tokua mbeti na kongregation ti Corinthe, Paul asala tënë ti Timothée so lo leke ti tokua lo kâ, tongana ‘be-ta-molenge ti lo, so lo ndoye lo mingi na yâ Seigneur.’ Lo kiri lo tene: “Fade lo [Timothée a] dabe i na lege ti tambela ti mbi na yâ Christ Jésus.” (1 aCorinthien 4:17, NW) Timothée asala ye alingbi na fango lege so lo wara na mbage ti Paul, na lo wara kode ti yô akungba ti lo. Aita-koli mingi so ade maseka aga aserviteur ti mungo maboko, a-ancien, wala même asurveillant so atambela na ndo nde nde so ayeke na kode, ngbanga ti so ala manda ye ti nzoni na tele ti ambeni mbilimbili ancien so abi bê na ndo ala, legeoko tongana ti so Paul asala na mbage ti Timothée.

A-ancien, I Fa Lege na Ambeni Zo!

Kite ayeke dä oko pëpe so prophétie ti Isaïe 60:22 ayeke ga tâ tënë laso. Jéhovah ayeke sala si “lo so ayeke kete mingi aga mbeni mara ti ngangu.” Ti tene mara so angbâ “ngangu,” a lingbi a leke ni nzoni. A-ancien, ngbanga ti nyen pëpe ti bâ na yâ alege wa a lingbi ti mû ambeni fango lege na ndo ni na azo so amû tele kue na Nzapa awe, na so alingbi ti wara fango lege so? Zia i hinga biani so serviteur oko oko ti mungo maboko ahinga nzoni ando so lo yeke na bezoin ti maï dä ti gue na li ni. Nga, i aita-koli so i wara batême awe, i gi ti wara ye ti nzoni na yâ mungo maboko so i yeke wara. I gbu alege kue so azi ti maï akode ti i, hingango ye ti i, nga na ye so i yeke manda. Fade Jéhovah ayeke hiri biani deba nzoni na ndo mara ti programme ti mungo maboko na ndoye so.—Esaïe 61:5.

[Kete Tene na Gbe Ni]

[Encadré na lembeti 30]

Ye so Aserviteur ti Mungo Maboko Alingbi ti Sala

Atâa so a hunda na a-ancien ti fa lege na aserviteur ti mungo maboko, aye mingi ayeke dä so aserviteur ti mungo maboko alingbi ti sala ti maï ala mveni na lege ti yingo.

—A lingbi aserviteur ti mungo maboko asala kusala ti ala na lege ni, na aduti azo so a lingbi ti ku ti tene ala bi bê nzoni na kungba ti ala. A lingbi ala gi ti lë anzoni ngobo ti mandango ye. Mingi ni, guengo na li ni aga na lege ti mandango ye, nga salango ye alingbi na aye so a manda.

—Tongana mbeni serviteur ti mungo maboko ayeke leke tele ti mû diskur na mbeni bungbi ti aChrétien, a lingbi lo gi bê ti lo pëpe ti hunda na mbeni ancien so ayeke na kode, ti wara awango na ndo lege ti sala na diskur ni.

—Serviteur ti mungo maboko ni alingbi nga ti hunda na mbeni ancien ti bâ tongana nyen lo yeke mû diskur ni, na ti mû na lo wango na ndo lege ti sala nzoni ahon.

A lingbi aserviteur ti mungo maboko agi wango ti a-ancien, ayeda na ni, na asala ye alingbi na ni. Na lege so, “azo alingbi ti bâ” guengo na li ni ti ala.—1 Timothée 4:15, NW.