A hunda mungo maboko ti mo
1 “Singila mingi teti ye kue so ala sala ngbanga ti e. A mû maboko na e biani.” Atënë so afa nzoni bê ti kiri singila so e yeke na ni teti a-ancien na aserviteur ti mungo maboko so ayeke na popo ti e. Teti so bungbi ti Nzapa angbâ ti gue na li ni, a yeke lakue na bezoin ti akoli-biazo ti sala kua na yâ akongregation ndulu na 100 000 na ndo lê sese kue. Tongana mo yeke mbeni ita-koli so awara batême awe, a hunda mungo maboko ti mo.
2 ‘Gi kusala’: Tongana nyen mo lingbi ti gi ambeni matabisi ti kusala? (1 Tim. 3:1). Ti mbilimbili ni, a yeke na lege ti dutingo na mbeni nzoni tapande na yâ ambage kue ti fini ti mo (1 Tim. 4:12; Tite 2:6-8; 1 Pi. 5:3). Mû mbage mingi na yâ fango tënë, na mû maboko na ambeni zo ti sala legeoko (2 Tim. 4:5). Bi bê kue na nzoni duti ti aita ti mo awamabe (aRom. 12:13). Duti mbeni nzoni wamandango Tënë ti Nzapa, na maï “kode ti fango ye”. (Tite 1:9, NW; 1 Tim. 4:13). Mû bê ti mo kue na akusala so a-ancien ahunda na mo ti sala (1 Tim. 3:10). Tongana mo yeke babâ ti sewa, ‘komande da ti mo mveni nzoni’.—1 Tim. 3:4, 5, 12.
3 Ti ga mbeni ancien wala serviteur ti mungo maboko a hunda ti sala kua ngangu nga ti duti na bibe ti gbanzi ye na tele (1 Tim. 5:17). Ni la, na gingo amatabisi so, gi ti sala na amba ti mo na tâ be-ti-molenge (Mat. 20:25-28; Jean 13:3-5, 12-17). Gbu li nzoni na ndo bibe ti Timothée, na gi lege ti sala tongana lo (aPhil. 2:20-22). Na tapande ti lo, zia nzoni tambela ti mo afa so mo lingbi na kusala ni (Kus. 16:1, 2). Tongana mo yeke gi asalango ye ti yingo so a hunda ti yô ambeni kungba nga ti sala ye alingbi na awango kue so a mû na mo ti tene mo gue na li ni, fade “azo kue alingbi bâ lege so mo yeke kpengba.”—1 Tim. 4:15.
4 Ababâ na mama, i fa na amolenge lege ti mû maboko: Amolenge alingbi ti to nda ti manda ti mû maboko na ngoi so ala ngbâ kete. I fa na ala ti dengi mê nzoni na abungbi, ti fa tënë na ti duti na nzoni tambela na Da ti Royaume nga na ekole. I fa na ala ti wara ngia ti sala na azo, na tapande na yâ akusala tongana mungo maboko na sukulango Da ti Royaume, mungo maboko na akangba na ambeni ye tongaso. I mû lege na ala ti hinga ngia so aga na lege ti mungo ye (Kus. 20:35). Mara ti fango ye tongaso alingbi ti mû maboko na ala ti ga apionnier, aserviteur ti mungo maboko na a-ancien ti kekereke.