Tongana nyen ti fa tënë na afami ti e?
1. Ngbanga ti nyen a hunda ti bâ yâ ti aye nzoni tongana e yeke fa tënë na afami ti e?
1 A yeke tâ ye ti kota ngia mingi teti e ti lï na yâ fini sese legeoko na asewa ti e, so e na ala e bungbi oko ti voro Jéhovah! Na fango tënë na afami ti e, pendere beku so alingbi ti ga tâ tënë. Ye oko, ti sala ni na mbeni lege so adë bê, a hunda ti bâ yâ ti aye ni nzoni. Mbeni surveillant ti circonscription atene: “Ala so awara ye ti nzoni ayeke ala so azia nzara ni na yâ ti afami ti ala na fango tënë na ala ngoi na ngoi.” Tongana nyen e lingbi ti sala ni?
2. Tongana nyen tâ bingo bê na asewa ti e alingbi ti mû maboko na e ti zia nzara ti tâ tënë na yâ ti ala?
2 Zia nzara ni na yâ ti ala: Gbu li ti mo nzoni kozoni na ndo lege so mo lingbi ti zingo nzara ni na yâ ti afami ti mo (aProv. 15:28). Aye wa si ala gi bê ti ala dä? Akpale wa ala yeke tiri na ni? Peut-être mo lingbi ti fa na ala mbeni article wala ti fa mbeni pendere versê na ndo mbeni tënë so agbu bê ti ala mingi. Tongana afami ti mo alango ndulu na mo pëpe, peut-être mo lingbi ti sû atënë ni na mbeti wala ti pika singa na ala. Na salango tënë mingi mingi na ala pëpe, lu alê ti tâ tënë na bâ ndo na mbage ti Jéhovah ti tene lo sala si a maï.—1 aCor. 3:6.
3. Na lege wa bibe so afami ti e ayeke na ni na mbage ti e alingbi ti mû lege na e ti fa tënë na ala?
3 Jésus atene lani na mbeni koli so lo tomba ayingo sioni na yâ ti lo: “Mo gue na kodoro ti mo na aita ti mo, mo fa na ala kota ye so Seigneur asala teti mo, na lege so Lo sala be-nzoni na mo.” (Marc 5:19). Tara ti bâ na li ti mo tongana nyen ye so asi na koli so apika bê ti asewa ti lo! Atâa so mara ti ye ti dongo bê tongaso alingbi ti si na mo pëpe, peut-être bê ti afami ti mo ayeke nzere teti kusala ti mo wala na ndo akusala so amolenge ti mo ayeke sala. Ti sala tënë na ndo mbeni diskur so mo mû na Ekole ti Kusala ti aChrétien, mbeni assemblée so mo gue dä, mbeni Béthel so mo gue mo bâ ni wala mbeni pendere ye so asi na mo na lege ti yingo alingbi ti zi lege na mo ti fa na ala ambeni ye na ndo Jéhovah na bungbi ti lo.
4. Agbanda wa a lingbi e kpe ni tongana e yeke fa tënë na afami ti e?
4 Bâ ye nzoni: Na ngoi so mo yeke fa tënë na asewa ti mo, sala tënë mingi pëpe na ala na ngoi oko. Na dango bê na ngoi so lo to nda ti manda Bible, mbeni ita-koli atene: “Na ngoi ni kâ, mbi diko tënë mingi na mama ti mbi ti fa na lo ye kue so mbi yeke manda lani na ndo Bible, na ye so aga na papa lakue, mbilimbili na babâ ti mbi.” Même tongana mbeni sewa asala nzara ti tënë so Bible afa, kiri tënë na mbeni lege so alingbi ti sala si lo duti na nzara ti hinga ye mingi na ndo ni (aProv. 25:7). Fa lakue yekiango ndo, nzobe na be-nze-pepe, legeoko tongana mo yeke sala ka ni na mbage ti azo so mo hinga ala pëpe na fango tënë.—aCol. 4:6.
5. Ye nyen e lingbi ti sala tongana afami ti e ayeda pëpe na tënë so e fa na ala?
5 Na mbeni ngoi, afami ti Jésus atene li ti lo aga kirikiri awe (Marc 3:21). Me na pekoni, ambeni na popo ti ala amä na bê (Kus. 1:14). Tongana mo sala ngangu ti fa tâ tënë na afami ti mo si ala yeda pëpe, kiri na peko pëpe. Aye so ayeke si na ala nga dutingo ti ala alingbi ti gbian. Tongaso, ngbâ ti gi mbeni lege ti sala tënë ti mbeni ye so alingbi ti zingo nzara ni na yâ ti ala. Mo lingbi ti wara ngia ti mû maboko na ala ti tambela na ndo lege ti fini ti lakue lakue.—Mat. 7:13, 14.