Lege ti sala kusala na atapande ti fango tënë
1. Tongana nyen a lingbi e bâ atapande ti fango tënë na apériodique nga na abuku?
1 Kusala ti Royaume ayeke sigigi lakue na atapande ti fango tënë na apériodique nga na abuku so e yeke zia na maboko ti azo. Na ngoi so e yeke mû mbage na yâ ti kusala ti fango tënë, a hunda na e pëpe ti tene tâ gi peko ti atënë ni oko oko tongana ti so a sû na yâ ti Kusala ti Royaume ni. A sû atënë so ti fa na e akpengba ye so e lingbi ti sala tënë ni. Fango tënë ti e ayeke lë lengo ande mingi tongana e fa ni na atënë ti e mveni. Salango atënë so alondo tâ gi na e mveni ayeke mû maboko na zo so e yeke fa tënë na lo ti mä e nzoni nga afa na gigi so e sala tënë ni na bê ti e kue na e yeda na ni.—2 aCor. 2:17; 1 aThes. 1:5.
2. Ngbanga ti nyen a lingbi e bâ salango ye ti azo ti ndo so e yeke dä tongana e yeke leke tele ti gue na fango tënë?
2 Gbian yâ ti atënë ti mo: Salango ye ti azo ti ndo so e yeke dä ayeke sala ngangu mingi na ndo lege so e yeke fa na tënë ti e. A lingbi mo bala zo ni kozoni si na pekoni mo to nda ti fango tënë ti mo? Wala azo ti territoire so mo yeke dä ahunda ti sala tongaso pëpe? Salango tongaso ayeke gbian na ando nde nde même ngoi na ngoi na gbele azo nde nde. A hunda nga ti bâ yâ ti ye nzoni na ngoi so e yeke hunda atënë. Ambeni hundango tënë so ayeke nzoni na lê ti azo ti mbeni ndo alingbi ti duti sioni na lê ti azo ti ambeni ndo nde. Tongaso, a lingbi e sala kusala na nzoni bango yâ ti ye ti sala si lege so e yeke fa na tënë ti e agbian alingbi na ndo so e yeke dä.
3. Ngbanga ti nyen ti bâ mara ti dutingo nde nde ti azo so e yeke fa tënë na ala nga lege so ala yeke bi bê ti ala na ni?
3 Nga, tongana e yeke leke tele ti e ti gue na fango tënë, a lingbi e bâ mara ti dutingo nde nde ti azo ti territoire ti e nga lege so ala yeke bi bê ti ala na ni. Na tapande, peut-être lege so e yeke sala lisoro na ndo Matthieu 6:9, 10 na mbeni kota Catholique ayeke duti nde mingi na lisoro so e yeke sala ni na mbeni zo so ahinga pëpe tënë ti “sambela ti Babâ ti e so ayeke na yayu”. Na mungo ngoi ti gbu li dä kozo, fani mingi e lingbi ti gbian yâ ti lege ti fango tënë ti e ti sala si a nzere mingi na azo so e yeke wara ala na yâ kusala ti fango tënë.—1 aCor. 9:20-23.
4. Ngbanga ti nyen nzoni lekengo tele ayeke kota ye?
4 Même tongana e leke ti sala kusala na mbeni kode ti fango tënë gi tongana ti so a sû ni biani na mbeti awe, ye so akanga lege na e pëpe ti leke tele ti e nzoni. A lingbi e diko article wala chapitre so e leke ti gboto lê na ndo ni, na e gi ambeni tënë so alingbi ti gbu bê ti zo. Na pekoni, e yôro ni na yâ kode ti fango tënë ti e. A yeke gi na lege ti dikongo lakue anzoni sango so e wara ni na yâ abuku ti e si e lingbi ti sala tënë na bê kue tongana e ye ti zia ni na maboko ti azo.
5. Ngbanga ti nyen e lingbi ti leke mbeni kode ti fango tënë nde? Na e lingbi ti sala ni tongana nyen?
5 Ambeni kode ni nde: A hunda na mo ti sala kusala gi na akode ti fango tënë so a fa na yâ Kusala ti Royaume? Oko pëpe. Tongana a yeke ngangu na mo pëpe ti sala kusala na mbeni kode ti fango tënë wala na mbeni versê nde, mo sala kusala na ni. Mingi ni, na apériodique, duti ndulu ti mû alege kue so azi na mo ti sala kusala na ambeni article ti yâ ni ti lingbi peut-être na mbeni ye so agbu bê ti azo ti territoire ti mo. Tongana a yeke sala adémonstration na ndo fango tënë na ngoi ti Bungbi ti Kusala, a lingbi a leke ni ti gue oko na akode so a sala kusala na ni na yâ territoire ti kongregation ni. Salango tongaso alingbi ti mû maboko na azo kue ti fa nzo tënë na lege ni.