Fa apériodique so asara tënë ti tâ tënë
1. Kusala ti Tour ti Ba Ndo na Réveillez-vous! ayeke nyen?
1 Tour ti Ba Ndo Afa Tene Ti Royaume ti Jéhovah na Réveillez-vous! ayeke na kozo ndo na yâ ti kusala ti fango tënë ti Royaume na ti sarango adisciple (Mat. 24:14; 28:19, 20). E yeke na ngia ti fa tënë lakue na ambeti-sango use so na ngoi so e yeke bi tere ti e na yâ ti ambage nde nde ti kusala ti Royaume.
2. Agbiango ye wa e bâ na yâ ti Tour ti Ba Ndo na Réveillez-vous!? Ngbanga ti nyen?
2 A sara angu mingi awe so e bâ agbiango ye na ndo ti ambeti so, so andu konongo ni, atënë ti yâ ni nga na akode ti kangbingo ni. A gbian aye so ti sara si ambeti ni aduti pendere na asara kua nzoni, si tokua ti Royaume andu bê ti azo kue, si ala ‘wara salut, na ala hinga tene-biani mbilimbili.’—1 Tim. 2:4.
3. Tongana nyen e yeke sara ande kusala na apériodique na fango tënë?
3 A to nda ni na janvier 2006, e hinga nzoni mingi ti sara kusala na akode nde nde ti kangbi Réveillez-vous! so ayeke sigigi fani oko na yâ ti nze. Ti fadeso, e yeke sara nga kusala na oko kode so ti kangbi na yâ ti kusala ti e ti fango tënë oko ti a-Tour ti Ba Ndo use so ayeke sigigi nze na nze na Français, ti Sango ayeke sigigi fani oko nze na nze. A zia na ndangba lembeti ti Kusala ti Royaume atënë ti fa na ambeti use so. Mingi ni atënë so agboto lê na ndo ti akozo article ti yâ ti périodique ni, me a lingbi ti gboto lê na ndo ti ambeni article ti yâ ni so agbu bê ti azo mingi. E lingbi ti sara kusala na atapande so nzoni gi tongana e hinga nzoni article so a luti na ndo ni, na ti fa ni na lege ti atënë ti e wani so alingbi na territoire ti e.
4. Ngbanga ti nyen a lingbi ti duti nzoni ti sara kusala na ambeni kode nde na ati so a zia na yâ ti Kusala ti Royaume?
4 Atâa so Kusala ti Royaume afa akode use ti fango tënë ndali ti périodique oko oko, mo lingbi ti sara kusala na akode ti mo wani. Oko nda ti tënë so apusu e ti sara tongaso ayeke so mbeni article nde ti yâ ti périodique ni alingbi ti ndu bê ti azo mingi ti yâ ti territoire ti mo. Wala mo bâ so mo lingbi ti fa tënë nzoni mingi na sorongo mbeni article so mo bâ anzere mingi na mo.
5. Kozoni si mo leke mbeni tënë ti fa na périodique, a lingbi mo sara nyen?
5 Tongana nyen ti leke tënë ti mo: Kozoni kue, a lingbi mo hinga nzoni article so mo soro ti sara tënë na ndo ni. Peut-être mo yeke hinga ande nzoni a-article oko oko kue pëpe ti périodique ni kozoni si mo fa tënë na ni. Ye oko, a lingbi mo duti na ngia na mo sara tënë na bê kue na ndo ti article so mo soro ti sara tënë na ndo ni. Mo lingbi ti sara ni gi tongana mo hinga nzoni atënë so mo fa.
6. Tongana nyen ti leke atënë ti e mveni teti fango tënë?
6 Na pekoni, gbian yâ ti akozo tënë ti mo na lekengo ni. Ti to nda ti lisoro, mo lingbi ti sara kusala na mbeni hundango tënë so andu article ni so apusu zo ti sara tënë. Zia bê ti mo lakue na ndo ti ngangu so Tënë ti Nzapa ayeke na ni ti ndu bê ti zo (aHéb. 4:12). Soro mbeni versê so alingbi na tënë ti mo ni, mbilimbili mbeni versê so a zia na yâ ni wala so a fa tënë ti yâ ni na yâ ti article so mo yeke sara tënë na ndo ni. Bâ tongana nyen mo lingbi ti tingbi versê so na article ni.
7. Tongana nyen e lingbi ti leke yâ ti akode ti fango tënë ti e si aduti pendere?
7 Na alege kue so azi: Ti tene mbeni kode ti fango na tënë alë lengo, a lingbi a sara kusala na ni. Fa tënë legeoko na kongregation na samedi ti kangbi apériodique. Mû apériodique na azo so ayeda kozo na ambeni mbeti ti e nde. Mû ni nga na azo so mo yeke manda Bible na ala nga azo so mo lingbi ti wara ala na ngoi so mo yeke kiri ti sara avizite. Mo lingbi nga ti mû ni na azo so mo yeke sara lisoro na ala na ngoi so mo yeke gue ti vo ye, na ngoi so mo yeke gue na voyage wala mo yeke ku docteur. Tara ti leke yâ ti akode ti mo ti fango tënë na yâ ti nze ni kue si aduti pendere.
8. Na alege wa Tour ti Ba Ndo na Réveillez-vous! ayeke nde mingi?
8 Tour ti Ba Ndo na Réveillez-vous! ayeke nde mingi. Ala mû gonda na Jéhovah tongana Gbia ti dunia (Kus. 4:24). Ala dë bê ti azo na lege ti nzoni tënë ti Royaume ti Nzapa, na awa azo ti mä na bê na Jésus Christ (Mat. 24:14; Kus. 10:43). Na ndo ni, ala yeke bâ ndo na ndo ti aye so ayeke tambela na ndo ti sese, aye so afa gango tâ tënë ti aprophétie ti Bible (Mat. 25:13). Mû maboko na azo ti territoire ti mo ti wara ye ti nzoni na lege ti ambeti-sango so na lekengo tere ti mo ti mû ni na ala na alege kue so azi na mo!
9. Tongana nyen e lingbi ti zia gere ti fini vizite?
9 Tongana mo wara lege ti zia périodique na mbeni zo, wala ti sara lisoro na mbeni zo na ndo ti tënë ti Nzapa, leke mbeni hundango tënë wala mbeni tënë so ayeke zi lege na mo ti kiri ti sara lisoro na lo na ndo ti aye ti yingo na vizite ti peko. Tongana e sara kue ti lu alë ti tâ tënë na bê ti zo, e lingbi ti hinga biani so fade Jéhovah ayeke zi bê ti azo so ayeke tâ na nzara ti hinga lo na ti sara na lo.—1 aCor. 3:6.