Mbage 11 ni: Salango a-étude so ayeke gue na li ni
Leke afini wafango tënë ti kiri ti bâ azo
1 Tongana mbeni wamandango Bible ato nda ti fa tënë awe, lo yeke tingbi ande na azo so asala nzara ti tënë ni. Tongana nyen e lingbi ti mû maboko na mbeni fini wafango tënë ti sala avizite nzoni nga ti maï nzara ti tënë ni na yâ bê ti azo so ayeda na ni?
2 Lekengo tele ndali ti mbeni fini vizite ato nda ni na kozo tingbingo na zo ni. Wa fini wafango tënë ni ti mû bê ti lo kue na azo so lo yeke sala tënë na ala (aPhil. 2:4). Yeke yeke, fa na lo lege ti sigigi na tënë so ayeke na yâ bê ti azo. Fa nga na lo ti dengi mê na tënë ti ala nga ti sû na mbeti atënë so agbu bê ti azo ni. Tongana mbeni zo asala nzara ti tënë ni, hunda na fini wafango tënë ni ti sû na mbeti anzene nzene tënë ti lisoro ni. Fa na lo ti sala kusala na atënë ni so lo sû na mbeti tongaso si lo leke na tele ti lo teti avizite ti peko.
3 Lekengo tele ti kiri: Sala lisoro na ndo kozo vizite ni. Na pekoni, fa na wamandango ye ni ti soro mbeni tënë oko so andu ye so Royaume ti Nzapa ayeke sala ande na so ayeke nzere na bê ti azo so lo yeke fa tënë na ala (1 aCor. 9:19-23). Mo na wamandango ye ni aleke legeoko mbeni ndulu tënë so alingbi na mbeni versê ti Bible nga so ague oko na atënë ti paragraphe ti mbeni mbeti so a yeke manda Bible na azo na yâ ni. Ala leke nga mbeni tënë so a lingbi ti hunda ni na hunzingo ti lisoro ni. Hundango tënë ni ayeke zia gere ti vizite ti peko. Fa na fini wafango tënë ni lege ti kono hingango ye ti mbeni zo na ndo Tënë ti Nzapa na ngoi ti vizite oko oko.
4 A yeke nga nzoni ti fa na wamandango ye ni mbeni tënë ti tongo nda ni so akpengba pëpe. Na pekoni so lo bala zo ni awe, lo lingbi ti tene: “Kozo lisoro so e sala lani anzere na mbi mingi, ni la mbi kiri mbi ga ti fa na mo mbeni ye na ndo [fa li ti tënë ni].” Mo lingbi nga ti fa na fini wafango tënë ni tongana nyen lo lingbi ande ti kiri tënë tongana, na kiringo ti lo ti peko, lo wara gi mbeni zo nde na yanga-da ni.
5 Kiri lakue ti bâ azo ni: Wa fini wafango tënë ni ti duti mbeni nzoni tapande na lege ti kiringo hio ti bâ azo kue so asala nzara ti tënë ni. Ti wara azo na yanga-da ti ala alingbi ti hunda ti kiri fani mingi. Fa na wamandango ye ni tongana nyen ti sala arendez-vous ti kiringo ti bâ mbeni zo. Mû maboko na lo ti bâ na nene ni arendez-vous so lo mû na ambeni zo ti kiri ti bâ ala (Mat. 5:37). Fa na fini wafango tënë ni so, teti a yeke kusala ti gingo azo so ayeke tongana angasangbaga nga ti maï nzara ti tënë ni na bê ti ala, a lingbi lo sala ye na nzobe nga na yekiango ndo.—Tite 3:2.