A-étude so e luti na nduzu ti sala ni wala so e sala na lege ti téléphone
1, 2. Tongana nyen si e lingbi ti leke yâ ti kapa ti e ti mandango Bible na azo ti mû maboko na ala so ayeke na akua mingi?
1 Azo ti laso ayeke na akua mingi ti sala ni. Ye oko, mingi ti ala ayeke nga na nzara ti aye ti yingo. Tongana nyen e lingbi ti mû maboko na ala ti kaï nzara ti ala na lege ti yingo? (Mat. 5:3). Mingi ti awafango tënë awara lege ti manda Bible na azo gi na lutingo na nduzu na yanga-da ti ala wala na lege ti téléphone. Mo lingbi ti kono yâ ti kusala ti mo na alege so?
2 Tongana e leke tele ti e kozoni ti fa lege so a yeke sala na étude ti Bible, ye so ayeke mû lege na e ti mû angoi kue ti to nda ti manda Bible na azo. Tongana nyen nga na ndo wa e lingbi ti sala ni?
3. Ngbanga ti nyen a yeke nzoni ti fa lege so e yeke sala ka na étude gi na kozo lisoro, na tongana nyen a lingbi ti sala ni?
3 Na ngoi so mo yeke luti na yanga-da: Tongana mo wara mbeni zo so ayeda ti sala lisoro na ndo Bible, me lo mû na mo pëpe ye ti duti, ku pëpe ti zi mbeti so mo ye ti manda na lo na paragraphe so mo leke ni kozo awe; a lingbi ti duti kozo paragraphe ti ye ti manda 1 ti brochure Ahunda, na to nda ti manda ni na lo. Diko paragraphe ni, bâ hundango tënë ni na sala lisoro na ndo versê oko wala use ti yâ ti paragraphe ni. Fani mingi, a lingbi ti sala ni gi na ngoi so mo luti na yanga-da ti zo. A hunda ti mû gi apenze-ngbonga oku wala bale-oko tongaso ti sala ni. Tongana lisoro ni anzere na zo ni, leke mbeni kapa ti kiri ti bâ mbeni paragraphe oko wala use na lo na lango ti peko.—Mo lingbi ti wara ambeni wango-tene na ndo lege ti tene na zo polele so mo ye ti manda Bible na lo na yâ Kusala ti Royaume ti nze ti janvier ti ngu 2002, na l. 6.
4. Tongana nyen e lingbi ti to nda ti mbeni étude gi na lutingo na nduzu na ngoi so e kiri ti sala vizite?
4 E lingbi ti sala kusala na oko kode so ti to nda ti mbeni étude na ngoi so e yeke kiri ti sala avizite. Na tapande, mo lingbi ti fa na zo ni brochure Ahunda. Na pekoni, gue na ye ti manda 2. Sala lisoro na ndo paragraphe 1 nga na 2 ti gboto lê ti lo na ndo iri ti Nzapa. Na vizite ti peko, mo lingbi ti sala kusala na paragraphe 3 nga na 4 ni ti fa na lo ye so Bible afa na ndo asalango ye ti Jéhovah. Na yâ lisoro so ayeke ga na peko, mo lingbi ti bâ paragraphe 5 na 6 nga na foto ti lembeti 5 ti fa na lo tongana nyen mandango Bible ayeke mû maboko na e ti hinga Jéhovah. E lingbi ti sala aye so kue gi na ngoi so e luti na yanga-da ti zo ni.
5, 6. (a) Ngbanga ti nyen ambeni azo alingbi ti yeda ti manda Bible na lege ti téléphone? (b) Wango-tene wa e lingbi ti sala na kusala tongana e yeke tisa azo ti manda Bible?
5 Na lege ti téléphone: Ambeni zo aye si a manda Bible na ala na lege ti téléphone ahon ti tene a ga a bâ ala. Bâ tapande so a fa ni ge: na ngoi so mbeni ita-wali ayeke fa tënë da na da, lo tingbi na mbeni mama ti molenge so ade maseka na nga ayeke na mbeni kua ti nginza so amû ngoi ti lo kue. Teti so a yeke ngangu na ita-wali ni ti wara mama ti molenge so na yanga da ti lo, lo soro ti iri lo na téléphone. Maseka-wali ni afa na lo polele so lo yeke na mbeni kete ngoi pëpe ti sala lisoro na ndo Bible. Ita-wali ni atene: “Gi na yâ ti penze-ngbonga 10 wala 15, mo lingbi ti manda mbeni fini ye, atâa na lege ti téléphone.” Na wali ni akiri tënë: “Biani, mbi lingbi ti sala ni tongana a yeke na lege ti téléphone.” A ninga mingi pëpe, mbeni mandango Bible na lege ti téléphone ato nda ni.
6 Ambeni zo so mo yeke sala vizite na ala ayeke yeda ti manda Bible na lege ti téléphone? Mo lingbi ti sala kusala na awango so e bâ ni ge, wala mo lingbi ti tene na ndulu tënë: “Tongana mo yeda, e lingbi ti sala lisoro na ndo Bible na lege ti téléphone. Mo bâ ni a yeke nzoni?” Tongana e leke akapa ti salango a-étude ti e ti lingbi na ti azo, e yeke mû maboko na ala ti “hinga Nzapa.”—aProv. 2:5; 1 aCor. 9:23.