Mû maboko na azo ti ‘yeda’ na bê kue
1. Ye wa Jéhovah ahunda na awavorongo lo?
1 Mbeni kota ye so Jéhovah ahunda na ala so ayeke voro lo ayeke ti mä yanga ti lo (Deut. 12:28; 1 Pi. 1:14-16). Na yâ ti kete ngoi, fade ngbanga ti Nzapa ayeke tï na ndo ti “azo so ahinga Nzapa pëpe, na ala so ake ti mä Tene-nzoni ti Seigneur ti e Jésus.” (2 aThes. 1:8). Tongana nyen si e lingbi ti mû maboko na azo ti tene ‘bê ti ala ayeda’ na fango ye ti Tënë ti Nzapa?—aRom. 6:17.
2. Ngbanga ti nyen a yeke kota ye ti mû maboko na azo ti wara mabe so akpengba?
2 Sala si ala maï mabe na ndoye: Na yâ Bible, mabe na mango yanga ague oko. Bazengele Paul atene lani so ‘Nzapa ayeke kpunakpu; lo mû yanga si a fa tënë ni so na azo ti amara ti dunia kue ti tene ala mä na bê, si ala mä yanga ti lo.’ (aRom. 16:26, Fini Mbuki, 2001 ). Na yâ mbeti ti aHébreu chapitre 11, a fa atapande ti azo mingi so ayeke na mabe. Na mingi ti azo so afa mabe ti ala na lege ti salango akusala so Jéhovah ahunda na ala ti sala (aHéb. 11:7, 8, 17). Nde na so, zo so amä yanga ti Nzapa pëpe, lo yeke na mabe pëpe (Jean 3:36; aHéb. 3:18, 19). Tongaso, e yeke na bezoin ti maï akode ti e ti salango kusala na Bible si e lingbi ti mû maboko na azo ti wara mabe so apusu ala ti mä yanga.—2 Tim. 2:15; Jacq. 2:14, 17.
3. (a) Kamba wa ayeke na popo ti ndoye na mango yanga? (b) E lingbi ti sala nyen ti mû maboko na awamandango Bible ti ndoye Jéhovah?
3 Na nga, tongana mbeni zo andoye Nzapa, lo yeke mä yanga ti lo (Deut. 5:10; 11:1, 22; 30:16). Kozo mbeti ti Jean 5:3 atene: ‘So ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe.’ E lingbi ti sala nyen ti mû maboko na awamandango Bible ti ndoye Jéhovah? Gi alege kue na ngoi ti mandango ye ni ti sala si lo bâ asalango ye ti Jéhovah na nene ni. Fa so mo mveni mo ye Nzapa mingi. Mû maboko na wamandango ye ni ti bi bê na ndo lege so lo lingbi ti lë songo na Jéhovah. Ahon ye kue, a yeke ndoye ti e na mbage ti Jéhovah si ayeke pusu e nga na ambeni zo nde ti mä yanga ti lo na bê kue.—Mat. 22:37.
4. (a) Ngbanga ti nyen tapande ti e ayeke kota ye? (b) A lingbi e sala nyen ti wara bê so amä yanga?
4 Zia tapande na ala: Tapande ti e ayeke kota ye so alingbi ti pusu azo ti yeda na nzo tënë. Tongaso, a hunda ti tene e ngbâ lakue ti sala ngangu ti wara “bê ti ndara”, wala bê so amä yanga (1 aGbia 3:9; aProv. 4:23). Aye wa a lingbi e sala? A lingbi e kamata kobe ti yingo na lege ti mandango Bible lakue nga na guengo na bungbi (Ps. 1:1, 2; aHéb. 10:24, 25). Gi ti lë songo na ala so ayeke voro Jéhovah na beoko (aProv. 13:20). Sigigi na fango tënë lakue, duti na nzara ti mû maboko na azo ti yâ ti territoire ti mo. Sambela Jéhovah ti fa na mo lege ti wara bê so ayeke nzoni (Ps. 86:11). Kpe aye so alingbi ti buba bê ti mo, aye tongana pitan wala angia ti ngangu. Tomba peko ti aye so alingbi ti sala si mo ga ndulu mingi na Jéhovah na so alingbi ti sala si songo ti mo na lo akpengba.—Jacq. 4:7, 8.
5. Anzoni ye wa mango yanga ayeke ga na ni?
5 Jéhovah adë bê ti azo ti lo ti giriri so fade adeba nzoni ayeke ga na ndo ti ala tongana ala mä yanga ti lo (Deut. 28:1, 2). Laso nga, Jéhovah ayeke hiri deba nzoni mingi na ndo ti “ala so amä Lo.” (Kus. 5:32). Tongaso, na lege ti fango ye nga na tapande ti e, zia e mû maboko na azo ti mä yanga na bê kue.