Lege ti to nda ti a-étude na yâ ti buku Bible afa
Mingi ti e ayeke duti ande na ngia ti sara étude na zo me kpale ni ayeke ti to nda ni. Fini buku Bible afa nyen biani? alingbi ti mû maboko na e. A leke akozo tënë ti buku ni, so ayeke na lembeti 3-7, ti mû lege na e ti sara lisoro ti Bible na azo. Même ala so ayeke na akode ti fango tënë mingi pëpe ayeke bâ so a yeke ngangu pëpe ti to nda ti manda Bible na azo na lege ti buku so.
◼ Mo lingbi ti tara kode so ti gboto lê ti zo na ndo lembeti 3:
Na pekoni so mo sara tënë na mbeni zo na ndo ti mbeni sango wala mbeni kpale so agbu bê ti azo ti territoire ti mo, gboto lê ti zo ni na ndo ahundango tënë so a sû gere ni nde na lembeti 3, na tisa lo ti sara tënë. Na pekoni, bâ lembeti 4-5.
◼ Wala peut-être mo ye ti to nda ni na gbotongo lê ti zo ni na ndo lembeti 4-5:
Mo lingbi ti tene: “A yeke nzere ande na mo pëpe ti bâ aye agbian tongana ti so a fa ni na yâ ti afoto so ge?” Wala mo lingbi ti hunda: “Azendo wa so a sara tënë ni ge mo ye ti tene aga tâ tënë?” Mä kiringo tënë ti zo ni nzoni.
Tongana mbeni versê so mo fa na zo ni agbu bê ti lo mingi, mo lingbi ti bâ aparagraphe ti yâ ti buku ni so asara tënë na ndo ti versê ni ti fa na lo ye so Bible afa na ndo ni. (Bâ encadré so ayeke na lembeti so.) Sara lisoro na ndo ni legeoko tongana ti so mo yeke sara ka na étude. Gi na lutingo na nduzu na kozo gango ti mo, mo lingbi ti sara ni gi na yâ ti apenze-ngbonga oku ti si na bale-oko.
◼ Mo lingbi ti tisa zo ti fa tënë ti bê ti lo tongana mo gboto lê ti lo na ndo ti lembeti 6:
Gboto lê ti zo ni na ndo ti ahundango tënë so ayeke na gbe ti lembeti ni, na hunda lo: “Mo hunda tere ti mo lâ oko awe na ambeni tënë so ge?” Tongana mbeni hundango tënë ni agbu bê ti lo, fa na lo aparagraphe ti yâ ti buku ni so amû kiringo tënë ni. (Bâ encadré so ayeke na lembeti so.) Na ngoi so mo yeke bâ kiringo tënë ni legeoko na lo, mo yeke sara étude na lo la.
◼ Mo lingbi ti sara kusala na lembeti 7 ti fa na zo lege so a yeke sara na étude:
Diko akozo bungbi ti atënë ota ti lembeti ni, na pekoni, bâ chapitre 3 na sara kusala na paragraphe 1-3 ti fa na zo lege so a yeke sara na étude. Leke ti kiri ti sara lisoro na ndo akiringo tënë na ahundango tënë so ayeke na paragraphe 3.
◼ Lege ti leke ti kiri ti bâ zo ni:
Na ngoi so mo hunzi kozo étude ni awe, leke ti kiri ti bâ zo ni. Mo lingbi gi ti tene: “Gi na yâ ti apenze-ngbonga kete, e manda fade ye so Bible afa na ndo ti mbeni kpengba tënë. Na lango ti peko, e lingbi ti sara tënë na ndo [fa na lo mbeni tënë so ala lingbi ti bâ ande ni]. Mbi lingbi ti ga na oko lango so na yenga ti peko?”
Na ngoi so e yeke ga nduru mingi na lâ ni so Jéhovah adiko ni awe, lo ngbâ ti leke e ti sara kusala so a mû na e ti sara (Mat. 28:19, 20; 2 Tim. 3:17). Zia e sara kusala nzoni na pendere fini gbakuru so ti to nda ti a-étude.
[Encadré na lembeti 5]
Aversê so e lingbi ti sara lisoro na ndo ni, so ayeke na lembeti 4-5
◻ Apocalypse 21:4 (l. 27-28, par. 1-3)
◻ Esaïe 33:24; 35:5, 6 (l. 36, par. 22)
◻ Jean 5:28, 29 (l. 72-73, par. 17-19)
◻ Psaume 72:16 (l. 34, par. 19)
Akiringo tënë na ahundango tënë so ayeke na lembeti 6
◻ Ngbanga ti nyen e yeke bâ pasi? (l. 108-109, par. 6-8)
◻ Tongana nyen e lingbi ti zia si agingo bê ti fadeso ahon ndo ti e pëpe? (l. 184-185, par. 1-3)
◻ Ye nyen e lingbi ti sara ti tene sewa ti e awara ngia ahon ti kozo? (l. 143, par. 20)
◻ Ye nyen ayeke si na e na peko ti kuâ? (l. 58-59, par. 5-6)
◻ E lingbi mbeni lâ ti kiri ti wara tere na azo ti e so akui? (l. 72-73, par. 17-19)
◻ Tongana nyen e lingbi ti hinga biani so azendo so Nzapa amû teti kekereke ayeke ga ande gi tâ tënë? (l. 25, par. 17)