Lege ti to nda ti étude na peko ti ziango apériodique na zo
1. Ye wa e zia na gbele e tongana e yeke zia apériodique na azo?
1 Lakue na samedi, e yeke fa tënë na azo na lege ti Tour ti Ba ndo na Réveillez-vous! Ye oko, kozo ye ti sara ti si na ye so e ye ayeke so: ti fa tâ tënë na azo ti nzoni bê. Na gbe ni ge, e yeke na ambeni wango so afa tongana nyen ti zia na azo buku Bible afa na ngoi so e kiri ti bâ ala nga ti to nda ti manda Bible na ala. Mo lingbi ti sara kusala na awango so na lege ti atënë ti mo mveni ti lingbi na territoire ti mo. Mo lingbi nga ti sara kusala na ambeni kode nde so mo bâ ayeke nzoni.
2. Tongana nyen ti sara kusala na lembeti 4-6 ti buku Bible afa ti to nda ti mbeni étude?
2 Sara kusala na lembeti 4-6 ti buku ni: Tongana mo kiri, mo lingbi ti tene: “Ambeti so mbi zia na mo lani agboto lê na ndo ti Bible. Bâ ngbanga ti nyen a yeke kota ye ti diko Bible.” Diko Esaïe 48:17, 18; Jean 17:3; wala mbeni versê nde so mo bâ a yeke nzoni. Na peko ti so mo fa buku Bible afa na mo mû mbeni oko na zo ni awe, mo lingbi ti tene tongaso:
◼ “Bible amû na e tâ beku teti kekereke.” Fa na zo ni lembeti 4-5 na hunda lo: “Na popo ti azendo so, so wa mo ye si aga tâ tënë?” Fa na zo ni chapitre so asara tënë ti zendo ti Mbeti ti Nzapa so lo soro ni, na sara lisoro na lo kete na ndo mbeni paragraphe oko wala use tongana lo yeda.
◼ Wala mo lingbi ti tene: “Bible akiri tënë na akota hundango tënë so andu fini ti zo.” Fa na zo ni lembeti 6, na hunda lo wala lâ oko lo hunda tere ti lo awe na ndo atënë so a zia na gbe ni. Zi chapitre so akiri tënë na ahundango tënë so, na sara lisoro kete na ndo mbeni paragraphe oko wala use.
◼ Wala mo lingbi ti zi buku ni na li ti atënë ni na hunda lo chapitre wa si anzere na lo. Gue na chapitre ni, na fa na lo kete tongana nyen a yeke manda Bible.
3. Tongana nyen ti to nda ti mbeni étude na peko ti so e zia na zo ni apériodique so asara tënë ti (a) bubango ti aye na ndo sese? (b) sewa? (c) aye so afa so Bible atene tâ tënë?
3 Hunda mbeni tënë na kozo vizite ni: Mbeni ye ti sara ayeke ti leke gere ti vizite ti peko na kozo tingbingo tere ti mo na zo ni. Na peko ti so zo ni amû apériodique ni, hunda mbeni tënë na lo, na tene na lo so mo yeke kiri tënë na ni na gango ti mo ti peko. Gi ti mä tere nzoni na lo, na sara kue ti kiri na lango so ala fa (Mat. 5:37). Tongana mo ga ti peko, dabe ti zo ni na hundango tënë ni. Diko kiringo tënë ni na yâ buku Bible afa, na sara lisoro dä kete. Mû na lo ti lo buku ni si lo lingbi ti bâ atënë ni legeoko na mo. Bâ ambeni tapande:
◼ Tongana périodique so mo zia asara tënë ti bubango ti aye na ndo sese, mo lingbi ti tene: “Ti peko e yeke bâ kiringo tënë ti Bible na hundango tënë so: Aye wa Nzapa ayeke gbian ande na ndo ti sese?” Sara kusala na lembeti 4-5 tongana mo kiri. Wala mo lingbi ti hunda tënë so: “Nzapa la aye si akota ye ti vundu asi?” Na gango ti mo ti peko, fa na zo ni paragraphe 7-8 ti chapitre 1.
◼ Tongana périodique so mo zia asara tënë ti sewa, kozo ti gue, mo lingbi ti hunda tënë so: “Ye wa zo oko oko na yâ ti sewa alingbi ti sara si sewa ni aduti na ngia mingi?” Tongana mo kiri, bâ paragraphe 4 ti chapitre 14.
◼ Tongana périodique so mo zia asara tënë ti aye so afa so Bible atene tâ tënë, mo lingbi ti hunda tënë so ndali ti lisoro ti peko: “Tënë ti Bible na tënë ti senda-ye ague oko?” Na gango ti mo ti peko, bâ paragraphe 8 ti chapitre 2.
4. Ye wa e lingbi ti sara tongana zo ni ake ti mû buku Bible afa?
4 Na hunzingo ti lisoro oko oko, hunda mbeni tënë so mo yeke kiri ande tënë dä na gango ti mo ti peko. Tongana gere ti étude ni aluti nzoni awe, komanse ti manda buku ni na kozo chapitre ni juska na nda ni. Ka tongana zo ni ake ti mû buku Bible afa? Mo lingbi ti ga na lo lakue apériodique na ti sara lisoro na lo na ndo Bible. Na ngoi so mo ngbâ ti zia nzara ti tënë ni na bê ti lo, peut-être lo yeke yeda mbeni lâ ti sara étude ni.
5. Ngbanga ti nyen a lingbi e sara kue ti zia gi périodique na azo pëpe?
5 Tour ti Ba Ndo na Réveillez-vous! alingbi ti zia na yâ ti zo nzara ti manda ye so Bible afa biani. Ni la, zia e sara ngangu kue ti to nda ti manda Bible na azo so amû périodique. Tongana e sara tongaso, fade e yeke mä wango ti Jésus so ahunda ti tene e ‘sara adisciple, na ti fa ye na ala’.—Mat. 28:19, 20.