Mo hinga ye ti sara tongana akpale ti ndagigi asi?
1. Ngbanga ti nyen a yeke lege ti ndara ti leke tere kozo ndali ti akpale ti ndagigi?
1 Ngu oko oko, azo kutu mingi na ndo sese, so na popo ni aita ti e mingi, awara akpale na lege ti yengingo ti sese, atsunami, apupu ti ngu, akota pupu na angu so asuku si amû ndo. Teti akpale ti ndagigi ayeke si na ngoi so e hinga pëpe na alingbi ti ga na kpale na e kue, lege ti ndara ayeke ti leke tere ti e kozoni.—aProv. 21:5.
2. Ngbanga ti nyen a yeke nzoni e fa na a-ancien ndo ti lango ti e nga na numéro ti singa ti e?
2 Ye ti sara kozoni: A lingbi ti si so akota zo ti kodoro ato mbela na ndo mbeni kpale so ayeke ga. A yeke nzoni ti dengi mê na atongo mbela so (aProv. 22:3). Na yâ ti aye tongaso fade a-ancien ayeke gi lege ti ndu azo kue na yâ ti kongregation ti mû maboko na ala ti leke tere ti ala nzoni. Na peko ti kpale ni, fade a-ancien ayeke sara nga kue ti ndu azo kue ti kongregation ti bâ wala ala yeke nzoni na ti bâ ye ti sara ti mû maboko na ala. Ngoi mingi alingbi ti hon senge senge tongana a-ancien ahinga lege ti wara aita pëpe. Tongaso, a yeke nzoni ti tene awafango tënë afa na secrétaire ti kongregation ti ala nga na surveillant ti bungbi ti mandango buku ti ala ndo ti lango ti ala na numéro ti singa ti ala.
3. Tongana nyen e lingbi ti mû maboko na a-ancien tongana e lango na ndo so kpale ti ndagigi ayeke si dä ngoi na ngoi?
3 Tongana aita alango na mbeni ndo so akpale ti ndagigi ayeke si dä ngoi na ngoi, a-ancien alingbi ti hunda na awafango tënë ti mû na ala iri na numéro ti singa ti afami wala andeko ti ala so alango na mbeni ndo nde na so a lingbi ti ndu ala hio tongana kpale asi. Ye so ayeke mû lege na a-ancien ti hinga ndo so ala kpe ague dä. A-ancien alingbi nga ti zia na sese mbeni ye ti sara hio na ngoi ti akpale ni teti kongregation; na tapande ti mû na zo oko oko mbeti ti molongo ti aye so a lingbi ala duti na ni, aye so a leke ti tokua aita na mbeni ndo na ti mû maboko na ala so dutingo ti ala ayeke nde. A yeke kota ye mingi ti sara kusala maboko na maboko na aye so a leke na ndoye.—aHéb. 13:17.
4. Ye wa a lingbi e sara tongana kpale ti ndagigi asi na ndo so e yeke dä?
4 Na peko ti kpale ni: Ye wa mo lingbi ti sara tongana kpale ti ndagigi asi na ndo so mo yeke dä? Gi kozoni ti hinga wala sewa ti mo amanke mbeni ye pëpe. Tongana mo lingbi ti sara ni, mû nga maboko na ambeni zo so kpale ni asi na ala. Gi ti ndu wala ti wara hio surveillant ti bungbi ti mandango buku ti mo wala mbeni ancien. Mo lingbi ti sara ni atâa mo yeke nzoni wala mo yeke na bezoin ti mbeni ye pëpe. Tongana mo yeke na bezoin ti mbeni ye, zia mo hinga so aita ti mo ayeke sara kue ti mû maboko na mo (1 aCor. 13:4, 7). Girisa pëpe so Jéhovah ahinga ye so asi na mo; zia bê ti mo na lo ti mû maboko na mo (Ps. 37:39; 62:9). Duti nduru ti wa ambeni zo nga na lege ti yingo na ti dë bê ti ala (2 aCor.1:3, 4). Kiri mo gbu akusala ti mo ti yingo hio tongana lege ayeke dä.—Mat. 6:33.
5. Tënë ti akpale ti ndagigi so ayeke hara sese andu e aChrétien tongana nyen?
5 Tongana mbeni kpale ti ndagigi aye ti si, azo mingi ayeke gi bê ti ala. Me ti e, e lingbi ti bâ kekereke na beku. Na yâ ngoi kete, fade akpale ti ndagigi kue ayeke ga aye so ahon awe (Apoc. 21:4). Me ti ku na ngoi so, e lingbi ti bâ ambilimbili ye ti sarango ni fadeso ndali ti angoi ti akpale, nga na oko ngoi ni ti bata wâ ti e na yâ fango nzo tënë na azo.