A mû na e mbeni mosoro
1 Bazengele Paul abâ na nene ni mingi kusala so Nzapa amû na lo ti fa tënë na lo sara tënë ni tongana mbeni “mosoro”. (2 aCor. 4:7). Na ngoi so lo sara kusala so, lo hon na yâ ti angangu kpale nga na aye ti ngangu so a sara na lo. Lo nze pëpe ti fa tënë na zo kue so lo tingbi na lo. Lo sara angangu voyage mingi na yâ ti akodoro nga na lê ti ngu. Tongana nyen e lingbi ti mû tapande ti Paul na ti fa so e ye kusala ti e mingi? (aRom. 11:13). Ye wa asara si kusala ti e ayeke mbeni mosoro so mara ni ayeke use pëpe?
2 Mbeni mosoro ti kota ahon kue: Mingi ni, amosoro ti sese so ayeke ga na vundu, na anzoni ye ti pekoni ayeke ninga lakue pëpe. Me ti kusala ti e, a ga na e nga na amba ti e aye ti nzoni so aninga (1 Tim. 4:16). A mû maboko na azo so bê ti ala aye Nzapa ti hinga Jéhovah, ti gbian aye so a hunda na yâ fini ti ala na ti wara tâ beku ti fini ti lakue lakue (aRom. 10:13-15). Na bango kusala ti e tongana ye ti ngere ngangu, e wara mbeni nzoni ye ti sara na gigi ti e, e yeke bâ lakue so e yeke sara mbeni nzoni kusala nga e wara mbeni beku teti kekereke so akpengba e.—1 aCor. 15:58.
3 Fa so mo mû na nene ni mosoro ti mo: Mingi ni, e yeke fa ngere so e bâ na mbeni ye na lege ti ye so e yeke nduru ti mû ndali ni. So pendere matabisi si e yeke na ni ti mû ngoi ti e na ngangu ti e ti sepela Jéhovah! (aEph. 5:16, 17). A yeke nzoni lege so e yeke sara kusala na ngoi ti e afa so e mû na kota ngere mingi aye ti yingo ahon gingo nginza wala akungba. Teti so e yeke na mbeni pendere ye ti kangbi na azo, biani e yeke na nzara ti fa tënë na wâ na e yeke nduru ti fa nzo tënë na alege kue so azi na e.
4 A yeke honde pëpe amosoro ti ngere ngangu, me a yeke zia ni na gigi ti tene azo abâ. Tongana e bâ kusala ti e tongana mbeni mosoro, azo ayeke bâ ni polele na yâ fini ti e (Mat. 5:14-16). Na singila na bê, zia e mû lakue tapande ti bazengele Paul na e gbu alege kue so azi na e ti fa so e bâ biani na nene ni kusala ti e, e bâ ni tongana mbeni mosoro.