Bâ na nene ni kua ti mo ti fango tënë
1. Mingi ti azo laso abâ kua ti e ti fango tënë tongana nyen?
1 Mingi ti azo na yâ ti dunia ti Satan abâ kua ti e ti fango tënë tongana “ye ti buba”. (1 aCor. 1:18-21). Tongana e sara hange pëpe, mara ti sioni bango ndo ni so alingbi ti sara si e nze nga e kiri na peko (aProv. 24:10; És. 5:20). Araison wa apusu e ti bâ na nene ni pasa so e yeke na ni ti duti aTémoin ti Jéhovah?—És. 43:10.
2. Ngbanga ti nyen a lingbi ti tene so kua ti fango tënë ayeke mbeni “kusala so ayeke nzoni-kue”?
2 Mbeni “kusala so ayeke nzoni-kue”: Bazengele Paul atene so kua ti fango tënë ayeke “kusala so ayeke nzoni-kue”. (aRom. 15:15, 16). Kua ni so ayeke “nzoni-kue” tongana nyen? Ti mû mbage dä ayeke sara si “e yeke sara kusala maboko na maboko” na Jéhovah, “Lo so ayeke nzoni-kue”, nga a yeke sara si iri ti lo aga nzoni-kue (1 aCor. 3:9; 1 Pi. 1:15). Jéhovah abâ fango tënë ti e tongana mbeni “sandaga ti gonda” so e yeke mû na lo, tongaso fango tënë ayeke kota ye mingi na yâ ti vorongo so e yeke voro na lo.—aHéb. 13:15.
3. Nyen la asara si fango nzoni tënë ayeke mbeni kota pasa?
3 Fango nzoni tënë ayeke mbeni kota pasa so mingi ti azo ayeke na ni pëpe. A-ange alingbi fade ti duti na ngia mingi ti sara kua ni so na même ti sara ni pendere mingi (1 Pi. 1:12). Me, Jéhovah asoro e azo so e yeke awasiokpari, “ata ti sese,” ti sara pendere kua so.—2 aCor. 4:7.
4. E yeke fa so e bâ na nene ni kua ti e ti fango tënë tongana nyen?
4 Mbeni kota kusala: Teti so e bâ tâ na nene ni pasa so e yeke na ni, fango tënë ayeke mbeni oko ti “aye so ayeke akota ye mingi ahon atanga ni” na yâ ti fini ti e (aPhil. 1:10). Ni la, e yeke mû mbage dä yenga oko oko. Mbeni zo ti pikango mozoko na yâ ti bungbi ti pikango mozoko so iri ni awu mingi so abâ na nene ni kua ti lo ayeke leke tere ti lo ndali ti abia nde nde so lo yeke gue ti pika nga lo yeke sara kue ti maï akode ti lo. Legeoko nga, e yeke leke tere ti e kozo ti gue na fango tënë tongaso si e lingbi ti “sara kusala na lege ni na tënë so ayeke tâ tënë,” nga e yeke sara kue ti maï ‘kode ti e ti fango ye na zo.’—2 Tim. 2:15; 4:2.
5. Kua ti e ti fango tënë anzere na azo wa?
5 Zia si sioni bango ndo ti mingi ti azo asara si mo nze pëpe. Girisa pëpe so ambeni zo ayeke dä na yâ ti territoire ti e so a yeke nzere na ala tongana e ga ti fa tënë na ala. Me, e yeke gi ti nzere na azo pëpe. Kota ye ni kue ayeke bango ndo so Jéhovah ayeke na ni na ndo ti kua ti e ni, na lo bâ na nene ni mingi angangu so e yeke sara.—És. 52:7.