Girisa pëpe ala so azia ti fa tënë
1. Ngbanga ti nyen a yeke nzoni e gi ti wa ala so azia ti fa tënë?
1 Mo hinga mbeni zo so azia ti fa tënë? Peut-être lo zia ti ga na bungbi na lo gue yongoro. Peut-être mo tingbi na zo tongaso na ngoi ti fango tënë da na da. A lingbi e girisa pëpe so zo ni angbâ lakue ita ti e. E ye ti fa na lo so e ye lo mingi na e ye ti mû maboko na lo ti kiri na popo ti e na ti kiri na ‘Berger na [surveillant] ti âme ti e.’—1 Pi. 2:25.
2. Tongana nyen e lingbi ti wa mbeni zo so azia ti fa tënë?
2 Fa so mo bi bê na ala: Ti pika singa kete na zo so azia ti fa tënë wala ti gue ti bâ lo alingbi ti fa na lo so e girisa lo pëpe. E lingbi ti tene nyen na lo? E lingbi ti tene mbeni nzoni tënë na lo, na tapande ti tene na lo so e pensé na lo. Sara na lo tënë ti aye so akpengba zo (aPhil. 4:8). E lingbi ti fa mbeni tënë so anzere na e na mbeni bungbi so ahon ade ti ninga pëpe. E lingbi nga ti tisa lo na bungbi ti peko wala na mbeni kota bungbi so ayeke ga, na ti hunda lo ti bata na lo ndo ti duti wala ti sara si lo wara lege ti gue.
3. Tongana nyen mbeni ita-wali akiri ato nda ti fa tënë?
3 A wara na territoire mbeni ita-wali so azia ti fa tënë ahon ngu 20. Atâa so lo ye ti tene a manda na lo Bible pëpe, ita-wali so awara lo akiri abâ lo, na lo zia na lo apériodique ti nze ni. Na peko ti kota bungbi ti district, ita-wali ni asara na lo tënë ti ambeni kota tënë ti kota bungbi ni, na nda ni lo kiri lo to nda ti fa tënë.
4. Tongana nyen a lingbi e sara ye na mbeni zo so akiri ato nda ti ga na bungbi?
4 Tongana mbeni zo akiri: Tongana mbeni ita so azia ti fa tënë akiri ato nda ti ga na bungbi, a lingbi e sara ye na lo tongana nyen? Tongana nyen Jésus asara ye na adisciple ti lo na peko ti so ala zia lo teti mbeni kete ngoi? Na bê ti ndoye, lo tene so ala yeke “aita” ti lo na lo fa so lo zia bê na ala. Lo mû même na ala mbeni kota kusala (Mat. 28:10, 18, 19). Kete na pekoni, ala bi tere ti ala kue na fango nzo tënë na ala “zia pëpe” ti sara ni.—Kus. 5:42.
5. Fa aye so andu dutingo ti mbeni zo so azia ti fa tënë so ayeke nzoni e sara tënë ni na a-ancien.
5 Kozoni ti hunda ti sara étude na mbeni ita so azia ti fa tënë wala kozoni ti tisa mbeni ita so azia ti fa tënë a ninga awe ti fa tënë legeoko na e, a yeke nzoni e hunda a-ancien na ndo ye ti sara. Tongana e wara na yâ ti territoire mbeni wafango tënë so azia kusala ni, a lingbi e fa tënë ni na a- ancien tongaso si ala lingbi ti bâ ye so ayeke nzoni ti sara ti mû maboko na lo.
6. Ngia wa e yeke duti na ni tongana e mû maboko na ala so azia ti fa tënë?
6 Tongana ti so Bible afa polele, gi azo so akpe loro ni juska na nda ni si fade a sö ala (Mat. 24:13). Tongaso, pensé na azo so peut-être apika gere ti ala wala so ague yongoro. Tongana na be-nze-pepe e fa mara ti ndoye ti Jéhovah na fango tâ bingo bê na azo tongaso, e lingbi ti wara kota ngia tongana e bâ ala kiri na yâ kusala ti ala ti nzoni-kue na tere ti e.—Luc 15:4-10.