E mû peko ti Christ na sarango ye so amû gonda na Nzapa
1. Tongana nyen kota li ti tënë ti kota bungbi ti ngu so ague oko na tënë ti mungo gonda na Nzapa?
1 Bible afa so Jéhovah ayeke Gbia ti dunia so ‘ayü yango-iri.’ (Ps. 104:1). Sarango ye ti Jésus nga tënë ti yanga ti lo amû gonda lakue na Babâ ti lo nga na aye so Babâ ti lo aleke (Jean 17:4). Zo oko oko na popo ti e ayeke wara ande lege ti mû tapande ti Jésus nga ti mû gloire wala gonda na Jéhovah na ngoi ti akota bungbi ti district so ayeke ga “E mû peko ti Christ!”
2. Tongana nyen lekengo tere ti e ti duti dä na abungbi ni kue amû gonda na Jéhovah?
2 Mbeni vorongo so amû gonda na Nzapa: E lingbi ti mû gonda na Jéhovah na lekengo tere ti e ti duti dä na matanga ti yingo so lo leke ndali ti e. Mo sara tënë ni na patron ti mo awe, na mo leke tere ti mo awe ti gue na lango oko oko kue ti kota bungbi ni, même na vendredi? Mo leke ti ga na l’heure ti hinga place ti duti ti mo na ti mû mbage na bia nga na sambela so ayeke zi yanga ti bungbi ni? Mo pensé na kobe ti mo ti midi so mo lingbi ti te kâ mo na aita ti mo? Na tongo nda ti bungbi oko oko tongana président ni ayeke iri azo ti duti kozoni si mozoko alondo, a yeke nzoni e kaï hio lisoro ti e na e duti si kapa ni ato nda ni.
3. Tongana nyen ti dengi mê na programme ni a mû gonda na Nzapa ti e?
3 Dengingo më nzoni na programme ni ayeke mû nga gonda na Babâ ti e ti so ayeke na yayu. Na peko ti so lo bâ mbeni kota bungbi ti district na kodoro ti lo, mbeni wasungo sango atene so tongana azo aga fade ti bâ ye so ayeke tambela, ka bê ti ala ayeke pika “na nzoni sarango ye ti azo so aga, na lege so azo ni aduti kpô na yekiango ndo ti mä ye so a yeke tene nga ti bâ mungo bê ti azo ni kue na aye ti yingo.” Lo sara nga tënë ti “gbâ ti amolenge . . . , so bê ti lo apika ti bâ so ala kue asara ye nzoni na même ala zia bê ti ala ti gi aversê na yâ Mbeti ti Nzapa ti ala.” Na ngoi so bungbi akomanse, a yeke pëpe ngoi ti sara tënë senge senge, ti tokua mbeti na lege ti téléphone, ti te kobe wala ti fono senge senge na nduzu. A lingbi amolenge aduti na tere ti babâ na mama ti ala tongaso si a mû maboko na ala ti bâ nzoni na lege ti programme ni (Deut. 31:12; aProv. 29:15). Sarango ye tongaso afa so e yekia amba ti e nga e bâ na nene ni kpengba kobe ti yingo so a yeke mû.
4. Ngbanga ti nyen a yeke nzoni e sara tere ti e pendere na ngoi ti kota bungbi?
4 Lekengo tere so ane zo: Azo mingi akiri singila ndali ti dango bê so a mû na ngu so ahon na kota bungbi ti district na yâ diskur so li ni atene “Fa nengo tere ti Chrétien na ngoi kue”; a fa so a lingbi awakua ti Nzapa asara kue ti fa nengo tere ti Chrétien na yâ yungo bongo nga na sarango tere ti ala pendere. Ti ngu so, e ye ti kiri mbeni ti bâ tënë so nzoni. Lekengo tere ti e afa ye so ayeke na bê ti e na mbage ti Jéhovah nga na dutingo ti e tongana aTémoin ti lo. A lingbi e yü bongo lakue tongana azo so ayeke “bata tënë ti Nzapa.”—1 Tim. 2:9, 10.
5. Tongana nyen e lingbi ti bata nzoni yungo bongo na ngoi ti wungo tere na peko ti kapa ti kota bungbi ni?
5 A lingbi e yü bongo pendere gi tongana e yeke gue na kota bungbi ni? Girisa pëpe so azo mingi ayeke bâ ande e na abadge ti e na tere ti e na ngoi ti kota bungbi ni. A lingbi yungo bongo ti e afa so e yeke nde na tanga ti azo kue. Tongaso, même na ngoi ti wungo tere, tongana e sigigi ti gue ti te mbeni ye na peko ti kapa ni, a lingbi e yü bongo tongana ti so a lingbi na azo ti kusala ti Nzapa so aga na kodoro ni ndali ti kota bungbi ti aChrétien, na a lingbi e yü pëpe abongo tongana djine, culotte na tichorte. Ti sara tongaso a yeke duti ande tënë ti témoin teti azo na yâ ti kodoro ti e! Jéhovah ayeke na ngia tongana yungo bongo ti e afa so e yeke azo ti kusala ti lo.
6. Aye ti nzoni wa ayeke ga tongana tambela ti e amû gonda na Nzapa?
6 Aye ti nzoni so aga na pekoni: Tongana e fa na azo na ngoi ti akota bungbi sarango ye ti aChrétien so amû gonda na Nzapa, a yeke zi lege na e ti fa tënë na alege kue so azi, na fade azo so ayeke bâ e asara nzoni tënë ti e. Na nda ti mbeni kota bungbi, mbeni kota zo atene: “Ade e bâ lâ oko azo asara ye nzoni tongaso pëpe. Tambela ti ala afa ye so Nzapa aku na mbage ti e.” Ti sara ye na nengo tere afa so e kpe na e ndoye amba ti e nga e mû gloire na Jéhovah (1 Pi. 2:12). A fa so e kpe mbeto ti Nzapa na e yekia matabisi ti duti azo so Babâ ti e ti yayu afa ye na ala (aHéb. 12:28). Zia si sarango ye ti e amû gonda na Nzapa tongana e bi bê na kota bungbi ti ngu so “E mû peko ti Christ!”