“Lo mû ngangu na zo so anze”
1 A yeke si ka so ngoi na ngoi e kue e nze. A lingbi ti duti ndali ti mbeni kua wala mbeni ye nde so e sara, me nga ndali ti akpale so e tingbi na ni na “lâ ti ye ti ngangu” so (2 Tim. 3:1). E awakua ti Jéhovah, tongana nyen e yeke wara ngangu na lege ti yingo ti kiri na peko pëpe na yâ kusala ti e? A yeke gi na lege so e zia bê ti e na Jéhovah, lo so ayeke na “ngangu mingi”. (Es. 40:26). Lo hinga ye so atia e na lo ye biani ti mû maboko na e.—1 Pi. 5:7.
2 Mungo maboko ti Jéhovah: Jéhovah ayeke kpengba e na lege ti yingo vulu ti lo, oko kota ngangu so lo mû lani ti sara na yayu na sese. Yingo ti Nzapa amû maboko na e ti ‘kiri ti wara ngangu’ tongana e nze (Es. 40:31). Hunda tere ti mo: ‘Ndangba lango so mbi sambela mbilimbili Nzapa ti tene lo mû na mbi yingo ti lo ti sara kusala ti mbi ti Chrétien ayeke lawa?’—Luc 11:11-13.
3 Tongana e diko Mbeti ti Nzapa lâ oko oko na e gbu li ti e na ndo ni, nga e te kobe ti yingo na lege so e manda ambeti ti e lakue, e yeke ga tongana pendere “keke so a lu na tere ti ngu so ayeke sua, keke so alë na ngoi ti lo, kugbe ti lo ahule nga pëpe.”—Ps. 1:2, 3.
4 Jéhovah ayeke sara nga kusala na aita ti e ti yingo ti ‘kpengba’ e (Kus. 14:22). Ala yeke kpengba e na lege ti anzoni lisoro ti ala, akiringo tënë ti ala na ngoi ti abungbi nga na lege ti adiskur na adevoir (Kus. 15:32). Mbilimbili a-ancien ayeke mû maboko na lege ti yingo nga na awango so amû ngangu na e.—Es. 32:1, 2.
5 Fango tënë: Tongana mo bâ so mo komanse ti nze, zia ti fa tënë pëpe! Nde na ambeni kusala mingi, ti fa tënë lakue ayeke mû ngangu na e (Mat. 11:28-30). Ti fa nzo tënë ayeke sara si e zia lê ti e gi na ndo Royaume ti Nzapa nga e bata na li ti e beku ti fini ti lakue lakue nga na aye ti nzoni so e yeke wara ande.
6 E yeke na kusala mingi ti sara kozoni si a futi sioni sese so. Aye mingi afa na e so a yeke na lege ni ti tene e gbu ngangu na yâ kusala ti e, na lege ti “ngangu so Nzapa amû” na e (1 Pi. 4:11). Na mungo maboko ti Jéhovah, e yeke hunzi kusala ti e, ngbanga ti so “Lo mû ngangu na zo so anze”.—Es. 40:29.