Jéhovah Amu Ngangu na Zo so Anze

“[Jéhovah a] mu ngangu na zo so anze; na zo so ayeke na ngangu pepe, Lo sala si ngangu ti lo awu.”​—ESAÏE 40:29.

1. Mu tapande ti fa ngangu so ayeke na yâ ti aye so Nzapa aleke.

KATIKATI ti ngangu ti Jéhovah ayeke dä pepe. Na so tä kpengba ngangu si ayeke na yâ ti aye so lo leke! Atome, so ayeke kete kete mingi, ayeke brique so aleke aye kue, na a yeke kete mingi si a lingbi ti wara wungo ni ngbundangbu ngbangbo oko fani ngbundangbu oko gi na yâ ti lê ti ngu oko so atï.a Fini kue na ndo sese ti e aluti na ndo ngangu so aba gigi na lege ti akusala ti a-atome na ndo lâ. Me kota ti ngangu ti lâ so ahunda ti tene abata fini na ndo sese ayeke so wa? Na yâ ti ngangu kue so lâ ayeke sigigi na ni, sese ayeke wara gi mbeni nzene nzene mbage ni. Ye oko, nzene nzene mbage ti ngangu ti lâ so ayeke tï na ndo sese ayeke kota fani mingi ahon angangu kue so ayeke sala na kusala na yâ ti andokua ti sese kue.

2. Ngbongboro tene so Esaïe 40:26 atene na ndo ngangu ti Jéhovah ayeke so wa?

² Atä e bi bê na ndo atome wala na mbage ti ndagigi so akono mingi, kpengba ngangu ti Jéhovah ayeke dö bê ti e. Tongaso lo lingbi biani ti tene: “I yä lê ti i na nduzu, i ba Lo so acréé ye so, Lo so asala ye kue ti nduzu ti sigigi na lege ti wungo ti ala; Lo di iri ti ala oko oko kue na lege ti iri ti ala; na lege ti kota ngangu ti Lo, na teti Lo yeke na ngangu mingi, oko ti ala atia pepe”! (Esaïe 40:26) Tâ tene, Jéhovah ayeke “na ngangu mingi,” na lo yeke Lingu ti “kota ngangu” so a sala kusala na ni ti leke ndagigi kue.

A Hunda Ngangu so Ahon ti Senge Ni

3, 4. (a) Ambeni ye so alingbi ti sala si e nze ayeke so wa? (b) Hundango tene wa a lingbi e bi lê na ndo ni?

³ Atä so katikati ti ngangu ti Nzapa ayeke dä pepe, azo ayeke nze. Na ndo kue so e gue dä, e ba so azo anze. Na ngoi so ala zingo, ala nze awe, ala nze na ngoi so ala gue na kua wala na ekole, tongana ala kiri na kodoro ala nze awe, na tongana ala gue ti lango ala nze ti kete pepe me ahon ndo ni. Ambeni aye ti gue na mbeni ndo nde na ti wu tele nzoni alingbi. Tongana awakua ti Jéhovah, e nga e yeke nze, teti fini ti e so e mu kue na Nzapa ahunda e ti sala ngangu mingi. (Marc 6:30, 31; Luc 13:24; 1 Timothée 4:8) Nga, ambeni ye nde mingi ayeke dä so asala si ngangu ti e ahunzi.

⁴ Atä so e yeke aChrétien, a bata e pepe yongoro na akpale so ayeke si na azo kue. (Job 14:1) Kobela, atene ti nginza so agbian ngangu, wala ambeni kpale so ayeke si ka na yâ fini alingbi ti sala si bê ti e anze, na aye so aga na pekoni awoko e. Nde na akpengba ye so e lingbi ti hon ndo ni, e wara nga atara so asi na azo so asala ngangu na ala teti mbilimbili. (2 Timothée 3:12; 1 Pierre 3:14) Ndali ti angangu so lâ oko oko sese ayeke sala na ndo e nga kangango lege na kusala ti e ti fango tene ti Royaume, ambeni na popo ti e alingbi ti nze mingi si ala ba so ala ye ti kiri na peko na yâ kusala ti Jéhovah. Na ndo ni, na yâ ngangu so lo yeke sala ti futi dutingo be-biani ti e na Nzapa, Satan Diable ayeke sala kusala na alege kue so lo yeke na ni. Tongaso, tongana nyen e lingbi ti wara ngangu na lege ti yingo so a hunda ti tene e nze na e zia lege ni pepe?

5. Ngbanga ti nyen a hunda ngangu so ahon ti zo ti ngbâ lakue ti sala kusala ti e ti Chrétien?

⁵ Ti wara ngangu na lege ti yingo, a lingbi e zia bê na ndo Jéhovah, Wasalango ye ti ngangu ahon kue. Bazengele Paul afa so kusala ti Chrétien ayeke hunda ye mingi ahon gi senge ngangu ti azo so ayeke mbilimbili-kue pepe. Lo sû na mbeti: “E yeke na mosoro so na yâ ata ti sese, si ngangu so ahon ti senge ni alingbi duti ti Nzapa me ti e mveni pepe.” (2 aCorinthien 4:7, NW) A-Chrétien so asa yingo na ndo ti ala ayeke sala “kusala ti kiri ti leke songo” na mungo maboko ti afon ala so ayeke na beku ti ngbâ na sese. (2 aCorinthien 5:18, NW; Jean 10:16; Apocalypse 7:9) Teti so e so e yeke mbilimbili-kue pepe e yeke sala kusala ti Nzapa na gbele salango ngangu, e lingbi pepe ti sala ni gi na lege ti ngangu ti e mveni. Jéhovah amu maboko na e na lege ti yingo ti lo ti nzoni-kue, na tongaso wokongo ti e asepela ngangu ti lo. Na ba tongana nyen bê ti e adë ti hinga so “L’Eternel [“Jéhovah,” NW] abata azo ti mbilimbili”!​—Psaume 37:17.

‘Jéhovah Ayeke Ngangu ti Fini ti E’

6. Tongana nyen Mbeti ti Nzapa adë bê ti e so Jéhovah ayeke Lingu ti ngangu ti e?

⁶ Babâ ti e ti yayu ayeke na “ngangu mingi” na lo lingbi fade fade ti mu na e ngangu. Biani, a tene na e: “[Jéhovah a] mu ngangu na zo so anze; na zo so ayeke na ngangu pepe, Lo sala si ngangu ti lo awu. Même fade ngangu ti amolenge awe, na ala nze, na fade apendere koli atï. Me azo so aku L’Eternel, fade ala kiri ala wara ngangu; fade ala ma na nduzu na kpangbi tongana angualo; fade ala kpe, me ala nze pepe; fade ala tambela, me ngangu ti ala awe pepe.” (Esaïe 40:29-31) Teti akpale angbâ ti gue na li ni, ngoi na ngoi e lingbi ti ba so e yeke tongana mbeni wakpengo loro so ngangu ti lo kue awe na so agere ti lo aye mbeni pepe ti gue na lo na li ni. Me nda ti kpengo loro teti fini ayeke tâ na gbele e, na a lingbi e zia pepe. (2 Chronique 29:11) Wato ti e, Diable, ayeke tambela “tongana bamara so atoto,” na lo ye ti sala si e luti. (1 Pierre 5:8) Zia e dabe e so ‘Jéhovah ayeke ngangu nga na vala ti e,’ na lo leke aye mingi ‘ti mu ngangu na azo so anze.’​—Psaume 28:7.

7, 8. Ye wa afa so Jéhovah amu ngangu na David, Habaqouq, na Paul?

⁷ Jéhovah amu na David ngangu so ahunda ti ngbâ ti gue na li ni na gbele akota ye so aye ti kanga lege. Tongaso, na mabe na ziango bê so alingbi kue, David asû na mbeti: “Na lege ti Nzapa, fade e hon na ngangu; teti a yeke Lo so fade Lo doro awato ti e na sese.” (Psaume 60:14 [60:12, NW]) Jéhovah amu ngangu nga na Habaqouq si lo lingbi hunzi kusala ti lo ti prophète. Habakuk 3:19 atene: “Seigneur L’Eternel [“Jéhovah,” NW] ayeke ngangu ti mbi. Fade Lo sala si gere ti mbi aga tongana gere ti tagba, fade Lo sala si mbi tambela na ndo-nduzu ti mbi.” A lingbi e ba nga pendere tapande ti Paul, so asû na mbeti: “Mbi wara ngangu teti aye kue na lege ti [Nzapa] so amu na mbi ngangu.”​—aPhilippien 4:13, NW.

⁸ Legeoko tongana David, Habaqouq, na Paul, a lingbi e fa mabe na gigi na yâ ngangu so Nzapa ayeke na ni ti kpengba e nga na yâ ngangu ti lo ti sö e. Na hingango so Gbia Seigneur Jéhovah ayeke Lingu ti “ngangu mingi” ti e, zia e ba fadeso ambeni lege ti wara ngangu ti yingo na lege ti gbä ti aye so Nzapa aleke.

Aye ti Yingo so Aleke ti Mu Ngangu na E

9. Kusala wa ambeti ti aChrétien ayeke sala na yâ mungo kobe na e?

⁹ Mandango Bible na bê kue nga na mungo maboko ti ambeti ti aChrétien alingbi ti mu ngangu na e na abata e. Wasungo psaume ahe bia: “Ngia ayeke na zo so . . . ye so anzere na lo ayeke na yâ ndia ti Jéhovah, nga na yâ ndia ti lo, lo yeke diko na kete go lâ na bï.Tongaso fade lo ga biani tongana mbeni keke so alu na tele ti angu so asua, so ayeke lë lengo na ngoi ti lo, nga so akugbe ni ayeke hule pepe, na fade ye kue so lo sala aga nzoni.” (Psaume 1:1-3, NW) Legeoko tongana ti so a lingbi e te kobe si e bata ngangu ti e na lege ti mitele, a lingbi nga e te kobe ti yingo so Nzapa amu na lege ti Tene ti lo na ti ambeti ti aChrétien, ti bata ngangu ti e na lege ti yingo. Tongaso, mandango ye nzoni nga gbungo li na ndo ni ayeke kota ye.

10. E lingbi ti wara ngoi na ndo wa ti manda ye na ti gbu li?

¹⁰ A yeke ga biani na futa ti gbu li na ndo “akpengba ye ti Nzapa.” (1 aCorinthien 2:10, NW) Me e lingbi ti wara ngoi na ndo wa ti gbu li? Isaac, molenge ti Abraham, ‘atambela na yâ yaka ti gbu li na lakui.’ (Genèse 24:63-67) David, wasungo psaume, ‘agbu li na ndo Nzapa na ngoi ti abï so lango akpe na lê ti lo.’ (Psaume 63:7 [63:6, NW]) E lingbi ti manda Tene ti Nzapa na ti gbu li na ndo ni na ndapelele, na lakui, na bï, biani, na ngoi kue. Mara ti mandango ye nga gbungo li tongaso ague na mbeni ye nde so Jéhovah aleke ti mu ngangu na lege ti yingo: sambela.

11. Ngbanga ti nyen a lingbi e ba sambelango Nzapa lakue na nene ni mingi?

¹¹ Ti sambela lakue na Nzapa amu maboko ti kpengba e. Tongaso, a lingbi e “zia ti sambela pepe.” (aRomain 12:12) Na ambeni ngoi, a lingbi e hunda polele ti wara ndara na ngangu ti luti na gbele mbeni tara. (Jacques 1:5-8) Zia e kiri nga singila na e sepela Nzapa tongana e ba tambela ti aye so lo leke ti sala wala tongana e ba so lo kpengba e ti gue na li ni na yâ kusala ti lo. (aPhilippien 4:6, 7) Tongana e ngbâ ndulu na Jéhovah na yâ sambela, fade lo zia e lâ oko pepe. David ahe bia: “Ba, Nzapa ayeke Zo ti sala na mbi.”​—Psaume 54:6 (54:4, NW).

12. Ngbanga ti nyen a lingbi e hunda Nzapa ti wara yingo ti lo ti nzoni-kue?

¹² Babâ ti e ti yayu ayeke mu ngangu na akpengba e na lege ti yingo ti lo ti nzoni-kue, wala ngangu ti lo ti sala kua. Paul asû na mbeti: “Mbi kuku na likuni ti mbi na gbele Babâ, . . . mbi sambela Lo ti mu na i, alingbi na mosoro ti gloire ti Lo, ngangu si zo-ti-ya-ni akpengba na lege ti Yingo ti Lo.” (aEphésien 3:14-16) A lingbi e sambela ti wara yingo ti nzoni-kue, na ziango bê kue so fade Jéhovah ayeke mu ni na e, ye so ayeke mbeni deba nzoni. Jésus afa nda ti tene tongaso: Tongana mbeni molenge ahunda susu, fade babâ ti lo so ayeke na ndoye amu na lo ngbo? Oko pepe. Tongaso, lo ko nda ni: “Tongana i so i yeke [awasiokpari na tongaso] sioni, i hinga lege ti mu matabisi ti nzoni na amolenge ti i, fade Babâ ti i na yayu aye mingi ahon pepe ti mu Yingo Vulu na ala so ahunda Lo?” (Luc 11:11-13) Zia e sambela na mara ti ziango bê kue tongaso na e dabe e lakue so a lingbi ti sala si awakua be-ta-zo ti Nzapa ‘awara ngangu’ na lege ti yingo ti lo.

Kongrégation Ayeke Mbeni Maboko so Akpengba Zo

13. A lingbi e ba abungbi ti aChrétien tongana nyen?

¹³ Jéhovah ayeke mu ngangu na e na lege ti abungbi ti kongrégation ti aChrétien. Jésus atene: “Na ndo so azo use wala ota abungbi na iri ti mbi, mbi yeke dä na popo ti ala.” (Matthieu 18:20, NW) Na ngoi so Jésus amu zendo so, lo yeke sala la ni lisoro na ndo ambeni tene so a lingbi azo so amu li ni na yâ ti kongrégation abi lê dä. (Matthieu 18:15-19) Ye oko, a lingbi ti tene so atene ti lo andu abungbi na akota bungbi ti e kue, so ayeke to nda ni nga ako nda ni na lege ti sambela na iri ti lo. (Jean 14:14) Tongaso a yeke mbeni matabisi ti gue na abungbingo ti aChrétien tongaso, atä tongana wungo ti azo so ague ayeke kete wala saki mingi. Ni la, zia e fa na gigi bê ti kiri singila teti angoi so aleke ti kpengba e na lege ti yingo na ti wa e ti duti na ndoye na ti sala nzo kusala.​—aHébreu 10:24, 25.

14. Ye ti nzoni wa e wara na lege ti ngangu so aChrétien so ayeke ancien ayeke sala?

¹⁴ A-Chrétien so ayeke a-ancien ayeke mu maboko na wango ti kpengba zo na lege ti yingo. (1 Pierre 5:2, 3) Paul amu maboko na akpengba akongrégation so lo sala kusala dä, gi tongana ti so asurveillant so ague na ndo nde nde ayeke sala laso. Biani, lo ku la ni kungo ti tingbi na afon lo wamabe si ala lingbi kpengba na awa tele na popo ti ala. (Kusala 14:19-22; aRomain 1:11, 12) Zia e ngbâ lakue ti fa bê ti kiri singila teti a-ancien ti kongrégation ti e na teti ambeni Chrétien nde so ayeke surveillant, so asala kota kusala na yâ kpengbango e na lege ti yingo.

15. Tongana nyen afon e wamabe na yâ kongrégation ayeke ‘azo so amu maboko ti kpengba e’?

¹⁵ Afon e wamabe so abungbi na yâ kongrégation ti e alingbi ti ‘mu maboko ti kpengba e.’ (aColossien 4:10, 11) Tongana ‘atâ kamarade,’ ala lingbi ti mu maboko na e na angoi ti vundu. Na tapande, na ngu 1945, tongana a zi awakua 220 ti Nzapa na yâ kando ti sana ti Sachsenhausen so aduti na gbe ti aturugu ti aNazi, ala yeke na gbele mbeni ngangu tambela ti akilomètre 200. Ala bungbi na ndo oko na ngoi ti tambela ni, ala so akpengba kete agboto ala so awoko mingi na yâ ti akete charette. Ye ti pekoni? Na yâ tambela ti kuâ so afâ azo ahon 10 000 so akanga ala na yâ akando ti salango sana na zo, mbeni Témoin ti Jéhovah oko akui pepe. Mara ti atondo tongaso, so asigigi na yâ ti ambeti ti Watch Tower, so na popo ni a yeke wara Annuaire des Témoins de Jéhovah na Les Témoins de Jéhovah: Prédicateurs du Royaume de Dieu, afa so Nzapa amu ngangu na azo ti lo, si ala zia pepe.​—aGalate 6:9.b

Kusala ti E ti Fango Tene Akpengba E

16. Tongana nyen mungo mbage lakue na fango tene ayeke kpengba e na lege ti yingo?

¹⁶ Mungo mbage lakue na kusala ti fango tene ti Royaume ayeke kpengba e na lege ti yingo. Kusala tongaso ayeke mu maboko na e ti bata lê ti e kue gi na ndo Royaume ti Nzapa na ti bata na li tene ti ngoi so nda ni ayeke dä pepe nga na apendere beku ti lo. (Jude 20, 21) Azendo ti Mbeti ti Nzapa so e yeke sala tene ni na yâ fango tene ti e amu beku na e na a lingbi ti sala si e leke na bê kue ti sala ye, tongana ti so prophète Mika atene: “Fade e tambela na iri ti Jéhovah Nzapa ti e teti ngoi so adiko nda ni pepe, biani teti lakue lakue.”​—Michée 4:5, NW.

17. Awango wa amu na ndo amandango Bible na da ti azo?

¹⁷ Songo ti e mveni na Jéhovah ayeke kpengba tongana e sala kusala mingi ahon na Mbeti ti Nzapa ti fa ye na ambeni zo. Na tapande, tongana e yeke mu li ni na yâ ti amandango Bible na da ti azo na salango kusala na buku Hingango Ye So Ague na Fini ti Lakue Lakue, a yeke nzoni ti diko na ti sala lisoro na ndo ambeni aversê so afa peko ti tene ni. So ayeke mu maboko na wamandango ye ni na a sala si gbungo nda ti ye ti yingo ti e mveni akpengba ahon. Tongana wamandango ye ni ayeke na kpale ti gbu nda ti mbeni kota tene wala tapande ti Bible, a lingbi ti kangbi yâ ti chapitre oko ti buku Hingango Ye so akara lo na popo ti ambeni ngoi ti amandango ye. Ba tongana nyen e yeke na ngia ti leke tele nzoni na ti sala ngangu mingi ahon ti mu maboko na ambeni zo ti ga ndulu na Nzapa!

18. Fa tongana nyen a yeke sala kusala nzoni na buku Hingango Ye.

¹⁸ Ngu oko oko, a sala kusala nzoni na buku Hingango Ye ti mu maboko na azo saki mingi ti ga awakua so amu tele kue na Jéhovah, na so andu nga azo mingi so kozoni ahinga ye oko pepe na ndo Bible. Na tapande, na ngoi so lo de kete, mbeni koli so ayeke Hindou na Sri Lanka amä mbeni Témoin na salango tene na ndo Paradis. Ngu kete na pekoni, lo ga ndulu na ita-wali ni, na fade fade koli ti ita-wali ni ato nda ti manda Bible na koli so. Biani, maseka-koli so aga ti manda ye lâ oko oko, na a hunzi buku Hingango Ye na yâ kete ngoi. Lo to nda ti gue na abungbi kue, lo zia ngbele lege ti vorongo ti lo, na lo ga wafango tene ti Royaume. Na ngoi so lo wara batême, lo to nda ti manda Bible awe na mbeni kamarade ti lo.

19. Na ngoi so e gi Royaume kozoni, e lingbi ti hinga ye wa na bê ti e kue?

¹⁹ Ti gi Royaume kozoni aga na e ngia so akpengba zo. (Matthieu 6:33) Atä so e yeke wara atara nde nde, na ngia nga na wâ, e ngbâ lakue ti fa nzo tene. (Tite 2:14) Mingi na popo ti e ayeke lingbi na aye so ahunda ti duti na yâ kusala ti pionnier na ngoi kue, na ambeni ayeke sala kusala na ndo so a hunda ti wara awafango tene mingi ahon. Atä, na ngia, e gi ti maï aye ti Royaume na alege so wala na ambeni nde, e hinga na bê kue so fade Jéhovah ayeke glisa pepe kusala ti e nga ndoye so e fa teti iri ti lo.​—aHébreu 6:10-12.

Gue na Li ni na Yâ Ngangu ti Jéhovah

20. Tongana nyen e lingbi ti fa so e bi lê na mbage ti Jéhovah ti wara ngangu?

²⁰ Na bê kue, zia e fa so beku ti e ayeke na Jéhovah na e bi lê na mbage ti lo ti wara ngangu. E lingbi ti sala ni na ziango tele ti e kue na gbe ti aye ti yingo so lo leke na lege ti ‘ngba ti be-ta-zo.’ (Matthieu 24:45) Mandango Tene ti Nzapa e mveni nga legeoko na kongrégation na lege ti ambeti ti aChrétien, sambela so alondo na bê kue, mungo maboko ti a-ancien na lege ti yingo, pendere tapande ti afon e wamabe so aduti be-ta-zo, nga mungo mbage lakue na kusala ti fango tene ayeke na popo ti aye so aleke so akpengba songo ti e na Jéhovah na amu ngangu na e ti gue na li ni na yâ kusala ti lo ti nzoni-kue.

21. Tongana nyen abazengele Pierre na Paul afa nene ni ti wara ngangu so Nzapa amu?

²¹ Atä wokongo ti e ti zo, fade Jéhovah amu ngangu na e ti sala ye so bê ti lo aye tongana e zia bê kue na ndo lo ti wara maboko. Na hingango nene ti wara maboko tongaso, bazengele Pierre asû na mbeti: “Tongana mbeni zo asala kusala, a lingbi lo sala na ngangu so Nzapa amu na lo.” (1 Pierre 4:11) Na Paul afa so lo zia bê kue na ndo ngangu so Nzapa amu tongana lo tene: “Mbi wara ngia na yâ awokongo, na yâ azonga, na yâ aye so atia zo, na yâ asalango ngangu na zo nga na akpale, teti Christ. Teti tongana mbi woko, a yeke na ngoi so si mbi wara ngangu.” (2 aCorinthien 12:10, NW) Zia e nga e fa na gigi so e hinga ye biani na bê ti e tongaso, na e mu gloire na Gbia Seigneur Jéhovah, so amu ngangu na zo so anze.​—Esaïe 12:2.

[Akete Tene na Gbe Ni]

Mo Yeke Kiri Tene Tongana Nyen?

• Ngbanga ti nyen a hunda ti tene azo ti Jéhovah awara ngangu so ahon senge ni?

• Aye wa na yâ ti Bible afa so Nzapa amu ngangu na awakua ti lo?

• Ambeni ye ti yingo so Jéhovah aleke ti kpengba e ayeke so wa?

• Tongana nyen e lingbi ti fa so e bi lê na mbage ti Nzapa ti wara ngangu?

[Foto na lembeti 22]

Songo ti e mveni na Jéhovah ayeke kpengba tongana e sala kusala na Bible ti fa ye na ambeni zo