Mo yeke fa lakue so Mbeti ti Nzapa atene tâ tënë?
1 Na yâ ti sese so azo ayeke tene ka asioni tënë na ndo ti Bible, atâa Chrétien ayeke sara nzoni tënë ti Bible. Teti e hinga so “Tënë kue ti Mbeti ti Nzapa alondo na yanga ti Nzapa,” e yeda na tënë so Jésus Christ atene na yâ sambela na Jéhovah, lo tene: “Tënë ti Mo ayeke tene-biani.” (2 Tim. 3:16; Jean 17:17). Tongana nyen e lingbi ti sara nzoni tënë ti Bible?
2 Hinga aversê na li: Jésus azia bê ti lo lani ti manda Mbeti ti Nzapa. Ye so amû lege na lo ti fa ye lakue na azo na lege ti atënë so ayeke na yâ ni (Luc 4:16-21; 24:44-46). Tongana nyen ti hinga aversê mingi na li ti e ti fa na tënë? A yeke na dikongo Bible lâ oko oko nga na gbungo li na ndo mbeni versê so e bâ ayeke nzoni teti fango tënë. Na ngoi so e yeke manda ye teti bungbi, a yeke nzoni e gi na e diko na yâ ti Bible aversê so a fa tënë ti yâ ni pëpe, na peut-être ti leke mbeni tënë ti tene ande na ndo ni. Na bungbi, a yeke nzoni e bâ aversê ni na yâ ti Bible ti e legeoko na lo so ayeke sara tënë. Ti hinga aversê na li ti e ayeke leke e ti ‘fa nda ti tene-biani na lege ni.’—2 Tim. 2:15.
3 Fa gi ye so Bible atene: Na fango tënë, a yeke nzoni e fa gi ye so Bible atene. Na tapande, tongana lege ayeke dä ti sara ni, a yeke nzoni e gi ti diko mbeni versê na zo ni na e sara lisoro na ndo ni. Tongana lo hunda mbeni tënë wala lo ke tënë so e tene, a yeke nzoni mingi ti mû Bible ti kiri tënë na lo. Tongana zo ni ayeke na ye mingi ti sara, e lingbi lakue ti fa na lo mbeni tënë so ayeke na yâ ti Bible; e lingbi ti tene: “Kozoni si mbi gue, mbi ye ti diko gi mbeni versê oko na mo.” Tongana lege ayeke dä, diko versê ni tâ gi na yâ ti Bible, na tisa lo ti bâ ni legeoko na mo.
4 Mbeni lâ tongana a fa na mbeni zo aversê so ake tënë ti Nzapa ota na yâ oko, lo tene: “Ngbene ye so mbi yeke gue na eglize, mbi hinga mbi tene Bible atene tënë tongaso pëpe!” Lo yeda hio ti manda Bible. Jésus atene so angasangbaga ti lo ayeke mä go ti lo (Jean 10:16, 27). Mbilimbili lege ti tene azo so aye tënë ti Nzapa ahinga tâ tënë ayeke ti bâ ni tâ gi na yâ ti Mbeti ti Nzapa. Tongaso, zia si e fa lakue so Mbeti ti Nzapa atene tâ tënë!