Ngbâ ti “lë mingi”
1 Na lege ti fä, Jésus atene ni yeke tâ vigne, Babâ ti ni ayeke Zo ti bata vigne ni, wala Wafango ni, na adisciple ti lo so a sa yingo na ndo ti ala ayeke amaboko ni so alë mingi. Na sarango tënë ti kusala ti Wafango yaka ti vigne ni na lege ti fä, Jésus agboto lê na ndo nene ti ngbâ ngangu na tere ti vigne ni (Jean 15:1-4). Tënë ni ge ayeke so zo kue so ayeke na kota songo na Jéhovah, a lingbi lo duti tongana maboko ti “tâ Vigne” ni, Jésus Christ, so alë lengo. A lingbi e ngbâ ti lë “lengo ti Yingo” nga lengo ti Royaume mingi.—aGal. 5:22, 23; Mat. 24:14; 28:19, 20.
2 Lengo ti Yingo: A lingbi ti bâ guengo na li ni ti e na lege ti yingo na lege so e yeke fa lengo ti yingo so na gigi. Mo yeke sara kue ti lë lengo ti yingo ti Nzapa so na mandango Bible nga na gbungo li na ndo ni? (aPhil. 1:9 11). Zia si tere ti mo ane pëpe ti sambela ti wara yingo vulu; yingo so alingbi ti dü na yâ mo asarango ye so amû gonda na Jéhovah na so alingbi ti mû maboko na mo ti gue na li ni lakue na lege ti yingo.—Luc 11:13; Jean 13:35.
3 Ti lë lengo ti yingo ayeke mû nga ande maboko na e ti fa tënë ngangu. Na tapande, ndoye nga na mabe ayeke pusu e ti mû mbeni ngoi ti fa tënë lakue atâa so e yeke na ye mingi ti sara. Aye tongana siriri, be-nze-pepe, nzobe, tâ be-ti-molenge na ngangu ti kanga nzara ti tere ayeke mû lege na e ti sara ye na lege ni na gbele awato ti e. Tâ ngia ayeke sara si e duti na vundu pëpe na yâ kusala ti e même tongana azo asara ye pëpe alingbi na ye so e fa na ala.
4 Lengo ti Royaume: E ye nga ti lë lengo ti Royaume. Lengo so andu nga ‘mungo sacrifice ti merci, sacrifice so ayeke lengo ti yanga so asepela iri ti Jéhovah.’ (aHéb. 13:15). E sara ni na lege so e fa nzo tënë ngangu nga e zia lege ni pëpe. Mo yeke sara kue ti lë lengo ti Royaume mingi na lege so mo yeke maï kode ti fango tënë ti mo?
5 Jésus afa so adisciple be-ta-zo ti lo ayeke lë nde nde (Mat. 13:23). Tongaso, a yeke nzoni e haka kusala ti e na ti amba ti e pëpe, me e sara na Jéhovah alingbi na ngangu ti e (aGal. 6:4). Tongana e mveni e bâ dutingo ti e mbilimbili na lege ti Mbeti ti Nzapa, a yeke mû maboko na e ti ngbâ ti gonda Jéhovah na lege so e “lë mingi”.—Jean 15:8.