Apendere gbiango ye na yâ Tour ti Ba Ndo!
1 Na tongo nda ti ngu so, akongregation amä mbeni pendere tokua: ti to nda ni na janvier ti ngu 2008, fade Tour ti Ba Ndo ayeke sigigi use, oko ayeke ti kangbi na azo na mbeni ayeke ti sewa ti e ti aita! Peut-être mo hunda tere ti mo: ‘Kangbi wa ayeke duti ande na popo ti aTour ti Ba Ndo so? Nzoni ti duti na Tour ti Ba Ndo use, nde nde, ayeke so wa? E yeke wara ande ambeni fini ye na yâ ni?’
2 Kangbi so ayeke dä: Numero ti kozo lango ti nze ayeke duti ande ti fango na tënë. A leke atënë ti yâ ni na ndo atënë so agbu bê ti azo ti gigi. Numero ti lango 15 ti nze ni ayeke duti ande ti mandango ni, na a yeke mû ni na azo na fango tënë pëpe. A yeke wara na yâ ni a-article kue ti mandango ni teti nze oko nga na ambeni article so andu aChrétien so amû tere ti ala awe na Jéhovah. Tour ti Ba Ndo ti fango na tënë ayeke nzere gi na aTémoin oko pëpe, me a yeke nzere nga mbilimbili na ala so ayeke aTémoin pëpe, so amä na bê na Mbeti ti Nzapa. Réveillez-vous! ayeke ngbâ ande ndali ti azo nde nde so ayeke diko ni, so na popo ni mo yeke wara azo so adë kite na ndo tënë ti nzapa nga ala so ayeke aChrétien pëpe.
3 Anzoni ye so ayeke dä: Na yâ numero ti mandango ni, e yeke fadeso na bezoin pëpe ti fa nda ti atënë tongana “pionnier”, si azo so ayeke aTémoin pëpe alingbi ti hinga nda ni. Mo lingbi ti wara nga na yâ ti numero so ambeni kota tënë so ayeke gi ndali ti aTémoin na awamandango Bible so ague na li ni na lege ti yingo. Ka ti numero ti fango na tënë ni a yeke tongana nyen? Teti so atënë ti yâ ni nga na kode so a sû na ni ayeke ti tene agbu bê ti azo kue, zo so ayeke Témoin pëpe alingbi ti diko périodique ni kue. Biani, Témoin ti Jéhovah oko oko ayeke wara ande ye ti nzoni na lege ti dikongo apériodique so oko oko kue. Teti so na yâ ti nze oko e yeke fa gi Tour ti Ba Ndo oko nga na Réveillez-vous! oko na fango tënë, e yeke wara ande ngoi ti maï anzoni kode ti kangbingo ni.
4 Afini ye so ayeke dä: A zia ambeni fini tënë na yâ numero ti Tour ti Ba Ndo so ayeke ti fango na tënë. Mbeni ayeke fa akota tënë ti Bible na mbeni lege so akpengba pëpe. Ti mbeni, lo yeke fa tongana nyen Mbeti ti Nzapa alingbi ti mû maboko na asewa. A zia nga ambeni tënë na ndo Bible ti mû lege na amaseka ti tara tere ti ala. Numero oko oko kue ayeke na mbeni article so agboto lê na ndo ambeni versê ti Bible so afa ye na e na ndo Jéhovah.
5 E sambela Jéhovah ti iri tënë nzoni na ndo fini lekengo ye so andu Tour ti Ba Ndo. Zia si Tour ti Ba Ndo nga na Réveillez-vous! andu azo mingi mingi so alingbi na nzo tënë.—Mat. 10:11.