Fini Tour ti Ba Ndo ti Anglais so akpengba pëpe
E YEKE na ngia ti tene na ala so e yeke sigigi na Tour ti Ba Ndo na yanga ti Anglais so akpengba pëpe. E yeke to nda ni na numéro ti lango 15 ti juillet 2011. E yeke tara ni teti ngu oko. A yeke sigigi na ni legeoko na Tour ti Ba Ndo ti Anglais so a yeke sigigi ka na ni ti manda ni. A yeke wara na yâ ni a-article ti mandango ni na tongana place ayeke dä, a yeke zia ambeni article nde na yâ ni. E yeke na beku so Tour ti Ba Ndo so ayeke mû ande maboko na aTémoin ti Jéhovah mingi ti kaï nzara ti ala na lege ti yingo. Ngbanga ti nyen?
Anglais ayeke yanga ti kodoro so aita ti e ayeke tene ka na yâ ti akodoro tongana Fidji, Ghana, Kenya, Libéria, Nigéria, Papouasie-Nouvelle-Guinée, nga na Îles Salomon. Atâa so aita ti e so ayeke na yâ ti akodoro so ayeke tene yanga ti kodoro so a yeke tene ni na kodoro ti ala, wala ambeni kete yanga ti kodoro, mingi ti ala ayeke sara abungbi nga ala yeke fa tënë na Anglais. Ye oko, Anglais so ayeke na yâ ti ambeti ti e akpengba ahon Anglais so ala yeke tene ni. Nga, a lingbi ambeni ita ti e so ague na ambeni kodoro nde so a yeke tene yanga ti Anglais dä atene Anglais atâa so ala hinga ni mingi pëpe. Na ndo ni, ala lingbi pëpe ti gue na congrégation so a yeke sara bungbi na yanga ti kodoro ti ala.
A-article so e yeke manda na Mandango Tour ti Ba Ndo yenga oko oko ayeke kota ye so na lege ni e yeke wara kobe ti yingo na ngoi so alingbi. Ni la, ti mû maboko na azo kue so aga ti wara ye ti nzoni na lege ti Mandango Tour ti Ba Ndo, a sigigi na fini Tour ti Ba Ndo so Anglais ni akpengba pëpe. Ndo ni ayeke ti lo nde. Akete li ti tënë ni, aparagraphe ni, ahundango tënë ti dango bê ni, nga na afoto ti yâ ni ague oko na mbeni ti Anglais ni so. Tongaso, azo kue alingbi ti sara kusala na ti so bê ti ala aye ti mû mbage na Mandango Tour ti Ba Ndo. Ti fa kangbi so ayeke na popo ti Anglais ti aTour ti Ba Ndo so, bâ tapande so ayeke na gbe ni ge, so a mû na yâ ti paragraphe use ti kozo article ti mandango ni ti Tour ti Ba Ndo so.
E ye si fini Tour ti Ba Ndo so aduti kiringo tënë na sambela ti azo mingi so asambela Jéhovah atene: “Mû na mbi ndara ti hinga nda ti tënë si mbi lingbi manda commandement ti Mo.” (Ps. 119:73). E yeke na beku so a yeke duti ande ngangu pëpe na aita so ahinga Anglais mingi pëpe nga na ambeni maseka ti leke tere ti ala nzoni ndali ti Mandango Tour ti Ba Ndo yenga oko oko. Jéhovah ‘andoye sewa ti e ti aita kue,’ na e kiri singila na lo so lo yeke sara kusala na “ngbâa be-ta-zo so ayeke sara ye na ndara” ti mû na e gbâ ti kobe ti yingo.—1 Pi. 2:17; Mat. 24:45.
Bebungbi ti aTémoin ti Jéhovah