E gi ti sara mingi na yâ kusala ti e
1 Bazengele Paul awa aChrétien ti tambela na lege ti Nzapa na ti ngbâ ti “tambela nzoni ahon.” (1 aThes. 4:1). Tënë so aye ti tene nyen teti e? Mbeni oko ye ti sara ayeke ti ngbâ ti gi lege ti sara mingi na yâ akusala ti yingo, na sarango ngangu lakue ti ‘sara kusala ti e kue.’—2 Tim. 4:5.
2 Ye so apusu e: A yeke nzara ti sara na Wasarango e mingi ahon ti kozo si apusu e ti gi lege ti sara mingi na yâ kusala ti e. E ye ti kono na lege ti yingo na ti gi alege ti maï na yâ kusala ni. Ti bata mbeni nzoni kapa nga ti duti na nzoni bibe ayeke mû maboko na e ti si na aye ti yingo so e zia na gbele e.—Ps. 1:1, 2; aPhil. 4:6; aHéb. 10:24, 25.
3 Gingo lege ti kono yâ ti kusala ti e ahunda ti tene e maï bibe ti mû ye mingi na ti gbanzi ye na tere. Zo alingbi ti maï bibe so na gbungo li na yâ sambela na ndo nzoni tapande ti Jésus (Mat. 20:28). Na yâ kusala ti lo, Jésus awara ngia mingi na lege ti sarango na azo (Kus. 20:35). E lingbi ti sara tongana Jésus na bingo bê biani na azo na ti duti nduru ti gbu alege so azi na e ti sara mingi na yâ kusala ti e.—Es. 6:8.
4 Kusala ti ababâ na amama: A lingbi ti yôro na yâ ti amolenge na ngoi so ala ngbâ kete nzara ti sara na amba ti ala nga ti kono yâ ti kusala ti ala. Amolenge ayeke bâ tongana nyen azo ti sewa ti ala ayeke mû tere ti ala kue nga na ngangu ti ala ti kono yâ ti kusala ti ala. Na ngoi so lo ngbâ kete, mbeni ita-koli asara akusala ti kongregation na tere ti âta ti lo ti koli na ye so apusu lo ti duti na nzara ti sara kusala mingi. Na bango mungo tere kue ti âta ti lo na kua nga na ngia ti lo, apusu lo ti gi alege ti sara na aita ti lo. Laso lo yeke serviteur ti mungo maboko.
5 A yeke na bezoin ti aita-koli: “Tongana zo agi kusala . . . , lo ye nzo kusala.” (1 Tim. 3:1). Tënë so awa aita-koli ti gi ti sara akusala na yâ ti bungbi ti Jéhovah. Ti sara ni a hunda pëpe na zo ti duti na akpengba kode so a dü lo na ni. Ita-koli so agi kusala ayeke gi kozoni Royaume na lo yeke fa tënë na ngangu ti lo kue (Mat. 6:33; 2 Tim. 4:5). Fade lo yeke sara kue ti duti nzoni tapande teti amba ti lo.
6 Na ndo sese kue: Jéhovah asara si kusala ti bungbingo azo ayeke gue na loro (Es. 60:22). A hunda mingi na ala so ayeke mû tapande ti Jésus ti bi tere mingi ahon ti kozo na yâ ti fango tënë. Tondo ti ngu ti kusala 2006 afa so azo 248 327 akamata batême. So ti tene a batize azo nduru na 680 lâ oko oko! Ni la, zia e kue e ngbâ ti gi alege ti sara kusala ti e mingi ahon ti kozo.