E yeke kangbi na novembre mbeni Réveillez-vous! so ayeke nde!
1 Azo mingi ayeke na ambeni hundango tënë na ndo ti Bible so agbu bê ti ala. Tongana a yeke azo si asû ni, ngbanga ti nyen a iri ni Mbeti ti Nzapa? Ngbanga ti nyen ti zia bê na ni ti fa lege na fini ti mbi? Tongana mbi mû ngoi ti diko na ti manda Bible, aye ti nzoni wa mbi yeke wara na pekoni? Mara ti Bible wa a lingbi mbi diko? So ayeke ambeni ti ahundango tënë mingi so kiringo tënë ni ayeke na yâ ti Réveillez-vous! ti novembre, so ayeke nde, so li ti tënë ni ayeke “Pouvez-vous avoir confiance en la Bible?” wala “Mo lingbi ti zia bê kue na Bible?”
2 E ye si a kangbi Réveillez-vous! so mingi na yâ territoire ti e. Tongana lege ayeke dä, fa tënë da na da na kongregation ti mo na asamedi kue ti novembre. Fa Réveillez-vous! so na afami ti mo, avoizin, amba ti mo ti place ti kua, awafango mbeti, akamarade ti ekole nga na avizite ti mo. Mû ni na tere ti mo tongana mo yeke gue ti vo ye wala na voyage. A-ancien akiri asara mbeni commande ti apériodique so na ndo ti so kongregation ayeke wara ka, ti mû lege na kongregation ti wara ni ande mingi.
3 To nda ti étude na zo: Tongana mo mû périodique so na mbeni zo, mo lingbi ti zia gere ti mbeni étude kozoni si mo hunzi lisoro ti mo. Na tapande, mo lingbi ti tene: “Ti peko, mbi ye ti fa na mo kiringo tënë na hundango tënë so: ‘Ye wa Nzapa aleke ti sara teti sese?’ ” Na kiringo ti mo, ga na buku Bible afa, na fa na zo ni lembeti 4-5, wala bâ legeoko na lo paragraphe 1-3 ti chapitre 3 ti buku ni. Mo lingbi nga ti tene: “Ti peko, mbi ye ti sara lisoro na mo na ndo mbeni prophétie ti Bible so ayeke ga tâ tënë na ndembe so.” Tongana mo kiri, zi na chapitre 9 ti buku ni, na ala bâ legeoko paragraphe 1-3. Wala mo lingbi ti tene gi nduru na zo ni: “Azo mingi abâ so a yeke ngangu na ala ti gbu nda ti ye so ala yeke diko na yâ ti Bible. Ti peko, mbi ye ti fa na mo tongana nyen mo lingbi ti gbu nda ti Bible ti mo nzoni.” Na ngoi ti vizite ni, sigigi na buku Bible afa, na fa na lo kode ti mandango ni.
4 Gi Bible oko si ayeke “Mbeti ti nzoni-kue ti Nzapa,” so alingbi ti mû na e “ndara ti wara salut”. (2 Tim. 3:15). Tongaso, zia e kue e mû mbage mingi na kangbingo numero ti Réveillez-vous! so ti mû maboko na azo ti zia bê ti ala mingi na Bible!