Zia na gbele mo ti manda Bible na azo
1 “I yä lê ti i, i bâ le-kobe ti yaka abe alingbi na fango ni.” (Jean 4:35). Atënë ti Jésus so alingbi biani na kusala so e aChrétien e yeke sara laso.
2 A ngbâ lakue ti wara azo so bê ti ala ayeke nzoni na so aye ti tene a fa lege ti Jéhovah na ala. A yeke ye so e bâ polele na lege ti wungo ti afini disciple so ayeke wara batême ngu oko oko. Tongana mo ye biani ti manda Bible na azo, ye wa mo lingbi ti sara?
3 Zia mbeni ye na gbele mo: Kozoni, zia na gbele mo ti to nda ti manda Bible na mbeni zo. Bata ye so na li ti mo na ngoi so mo yeke fa tënë. Teti kusala so amû na e aChrétien ayeke ti fa ye na ti fa tënë na azo, a lingbi e kue e gi alege ti sara mingi na yâ ti kusala ti mandango Bible na azo.—Mat. 24:14; 28:19, 20.
4 Ambeni ye ti bata na li: Ti sambela na bê kue ayeke ye so a hunda na awafango tënë ti Royaume. Ngoi na ngoi, e yeke wara azo so asambela ti tene mbeni zo aga amû maboko na ala ti hinga Nzapa. So tâ tufa ti Nzapa si e yeke na ni ti tene Jéhovah asara kusala na e ti wara mara ti azo tongaso na ti fa ye na ala!—Ag. 2:7; Kus. 10:1, 2.
5 Mbeni ita-wali asambela ti wara étude, na pekoni, lo zia na place ti kua ti lo tract Mo Ye ti Hinga Ye Mingi Ahon na ndo Bible? Tongana mbeni wali amû oko lo diko ni kue, na lo sû iri ti lo na place so a hunda ti zia adresse dä, ita-wali ni asara lisoro na lo, na lo to nda ti manda Bible na wali ni.
6 Amba ti mo awafango tënë so ahinga akode ti tongo nda ti mandango Bible na azo alingbi ti mû maboko na mo ti wara lege ti manda Bible na mbeni zo. Sambela Jéhovah na ndo ti ngangu so mo yeke sara ti gi ti manda Bible na azo, na yeda na maboko so a mû na mo ti gi ti sara ni. Peut-être na yâ ti kete ngoi mo yeke duti ande na ngia ti manda Bible na mbeni zo.