Dë bê ti azo so bê ti ala afâ awe

¹ Laso, ahon tanga ti angoi kue ti mbaï, azo ayeke na bezoin mingi ti wara dengo bê. Na mungo peko ti tapande ti Jésus Christ, Gbia ti e, e nga kue e yeke sara kusala ti “sara si bê ti zo so afâ awe aga nzoni”.​—Es. 61:1.

² Akode ti sarango ni: Ti dë bê ti azo, a lingbi fango tënë ti e aduti nzoni nga e sara kusala na tënë so amû ngangu na zo. Tongana e luti mingi pëpe na ndo ti asioni sarango ye ti azo nga atënë ti nzapa ti wataka, kota ye so alingbi ti duti na yâ ti lisoro ti e ayeke tâ tënë so ayeke na yâ ti Mbeti ti Nzapa nga apendere zendo ti beku ti dengo bê so Nzapa amû. A ye ti tene pëpe so e lingbi ti sara lisoro pëpe na ndo ti Harmaguédon. A tokua e “ti fa tënë ti ngu ti grâce ti L’Eternel, na lâ ti futango kula ti Nzapa ti e”, nga “ti wa zo ti sioni ti ke sio lege ti lo”. Ye oko, a lingbi tënë ti Harmaguédon nga futingo so lo yeke ga na ni akanga ndo ti mama-tene ti Tene-nzoni ti Royaume ti Nzapa pëpe.​—Es. 61:2; Ezéch. 3:18; Mat. 24:14.

³ Fango tënë da na da: A yeke ngangu pëpe ti wara azo so bê ti ala anze ndali ti kobela, kui ti mbeni zo so ala ndoye lo, aye ti kirikiri wala akpale ti nginza. So e yeke mû tapande ti Christ, na ngoi so e tingbi na mara ti azo tongaso na fango tënë, e yeke bâ “mawa” ti ala na e yeke sara nzobe na ala (Luc 7:13, Fini Mbuki, 2001; aRom. 12:15). Atâa so e diko versê oko wala use ti sara tënë ti kpale ni, a lingbi e duti nduru ti ‘mä ndo’, ye so a yeke mû lege na zo ni ti fa tënë ti bê ti lo (Jacq. 1:19). Na peko ti so e mä lo awe, e lingbi biani fadeso ti dë bê ti lo.

⁴ Na mbeni ngoi so alingbi na yâ ti lisoro ni, e lingbi ti tene na zo ni: “Mbi ye ti fa na mo mbeni tënë ti Bible so alingbi ti dë bê ti mo.” A lingbi e duti na nzoni bango ndo si e kpe ti ke atënë oko oko kue so ayeke na lege ni pëpe so zo ni afa. Nde na so, ye so e ye ayeke ti sara kusala na Bible ti wa lo nga ti dë bê ti lo. Na ndo ti tënë so, e lingbi ti sara kusala na buku Comment raisonner à partir des Écritures, lembeti 119-122 na gbe ti li ti tënë “Encouragement.” Wala mo lingbi ti mû na zo ni tract “De l’aide pour les déprimés”, na bâ legeoko na lo awango ti yâ ni.

⁵ Gi alege ti dë bê ti azo: Mo hinga mbeni voizin ti mo, wala mbeni zo so mo na lo ayeke sara kua ndo oko, mbeni kamarade ti mo ti ekole wala mbeni zo ti sewa ti mo so ayeke na bezoin ti tene a dë bê ti lo? Ngbanga ti nyen ti gue pëpe ti sara vizite na mara ti azo tongaso na ndo ti ala na ziango na gbele mo ti dë bê ti ala na lege ti Mbeti ti Nzapa? Na hingango ngbanga ti nyen ala yeke na bezoin ti tene a dë bê ti ala, a lingbi ti mû maboko na mo ti leke tere ti mo ti lingbi na dutingo ti zo oko oko. Ti mû maboko na azo, ambeni ita ayeke sû lettre wala apika singa na ala. Tâ ndoye teti azo so ayeke nduru na e ayeke pusu ande e ti fa be-nzoni na ala na ti mû na ala dengo bê na lege ti Mbeti ti Nzapa.​—Luc 10:25-37.

⁶ Biani, a tokua e ti dë bê ti azo so atoto mbeni zo ti ala so akui, ti zi vundu so ayeke na yâ ti bê ti azo na ti mû na ala beku ti mbeni pendere gigi ti kekereke. So ayeke tâ dengo bê so azo ti sese kue ayeke na bezoin ni. Sarango nzoni lisoro na ndo ti gbâ ti apendere ye so Nzapa amû zendo ni ayeke dë bê nga ayeke mû beku na azo ti nzoni bê. Zia e girisa lâ oko pëpe ti gi ti “sara si bê ti zo so afâ awe aga nzoni”.