E kpengba mba na ngoi ti fango tënë
1 E kue e ye ti mä “tënë so zo atene so alingbi na lege ni” (aProv. 25:11). Na ngoi so e na amba ti e e yeke fa tënë, e lingbi ti sara nyen ti tene lisoro ti e akpengba mba?
2 Lisoro so akpengba zo: A yeke ye ti kpengba zo tongana e yôro na yâ ti lisoro ti e atënë ti yingo na ngoi so e yeke fa tënë! (Ps. 37:30). E lingbi ti sara lisoro na ndo ti tënë so e londo ti fa na mbeni zo, wala ti fa peko ti ambeni pendere ye so asi na e na fango tënë so ade ti ninga pëpe (Kus. 15:3). E wara ambeni nzoni tënë na yâ ti dikongo Bible ti e wani, na yâ ti afini périodique wala na ngoi ti mbeni bungbi ti kongregation so e lingbi ti sara lisoro na ndo ni? E lingbi ti sara lisoro na ndo ti diskur so e mä ade ti ninga pëpe na dä ti Royaume.
3 Bê ti e alingbi ti woko tongana mbeni zo so e fa tënë na lo ake tënë ti e ni na e hinga tënë ti kiri na lo pëpe. A yeke duti nzoni ti tene e na ita so e fa tënë e mû akete penze-ngbonga, na peko ti so e zia zo ni, ti gbu li ti bâ tongana nyen si ti peko e lingbi ti hon ndo ti mara ti ye tongaso; e lingbi ti bâ buku Comment raisonner. Tongana e bâ mbeni nzoni ye na lege ti fango tënë ti ita ni, e lingbi ti gonda lo ndali ni ti mû ngangu na lo.
4 E mû li ni: Na bungbi ti e ti mandango buku, ambeni zo ayeke dä so a ninga e na ala e fa tënë pëpe? Tongana e tisa ala ti fa tënë legeoko na e, a yeke sara si ‘e kue e kpengba na lege ti mabe ti e.’ (aRom. 1:12). Apionnier permanent na apionnier auxiliaire aye mingi ti tene ambeni ita afa tënë legeoko na ala, mbilimbili hio na ndapre wala na lakui na ngoi so awafango tënë mingi afa tënë pëpe. E lingbi ti mû maboko na apionnier tongana e fa tënë legeoko na ala. Mbeni wafango tënë ayeke dä so kpale ti seni akanga lege na lo ti fa tënë mingi? Ti mä tere na zo tongaso ti fa tënë legeoko na e, peut-être ti gue ti sara étude ti mbeni zo, a lingbi ti duti nzoni mingi teti e na lo.—aProv. 27:17.
5 Gondango ndo na tënë ti singila ayeke kpengba zo même na yâ ti akete kete ye. A yeke nzoni ti bata ye so na li na ngoi so e na amba ti e e yeke fa tënë, teti e ye ti “kpengba” tere na popo ti e.—1 aThes. 5:11.