Duti zo so ahinga ti mû maboko na fango tënë
1. Aye ti nzoni wa e yeke wara na sarango kusala na tere ti mbeni ita na fango tënë?
1 Mbeni lâ, Jésus atokua adisciple ti lo 70 ti fa tënë, na lo “tokua ala use use”. (Luc 10:1). Kite ayeke pëpe so ye so lo sara so amû lege na adisciple ni ti mû maboko na mba na ti wa tere na popo ti ala tongana ala yeke fa tënë. Tongana e na mbeni wafango tënë e yeke fa tënë, e lingbi ti mû maboko na lo tongana nyen?
2. Tongana nyen nga ngbanga ti nyen a yeke nzoni e mä mba ti e na ngoi so lo yeke fa tënë?
2 Na mango lo: Mä mba ti mo ni nzoni tongana lo yeke fa tënë (Jacq. 1:19). Tongana a yeke diko mbeni versê, diko ni nga na yâ ti Bible ti mo. Bâ zo so ayeke sara tënë, atâa a yeke mba ti mo ni wala zo ti da ni. Tongana mo dengi mê nzoni na lisoro ni, a yeke sara nga si zo ni adengi mê nzoni.
3. Na ngoi wa atënë ti e ayeke mû maboko na mba ti e?
3 Na hingango nzoni ngoi ti sara tënë: Tongana a yeke mba ti e la ayeke fa tënë, e yeke fa so e ne lo na ziango lege na lo ti sara tënë (aRom. 12:10). A yeke nzoni e fâ tënë na yanga ti lo pëpe. Tongana lo girisa tënë so lo ye ti tene wala zo ni abi mbeni tënë na sese wala lo hunda mbeni tënë, na mba ti e ni ahunda ti tene e mû maboko na lo, e sara ngangu ti zia mbeni tënë na ndo ti tënë so lo tene ahon ti yôro mbeni fini tënë nde na yâ ni (aProv. 16:23; Zo-ti. 3:1, 7). Tongana e yeke sara tënë, a yeke nzoni atënë ti e ni ague oko na tënë so mba ti e afa.—1 aCor. 14:8.
4. Nyen la ayeke mû ande maboko na e ti wara ngia na yâ ti kusala ti e na ti tene kusala ni aga nzoni?
4 Tongana adisciple 70 so Jésus akangbi yâ ti ala use use ahunzi fango tënë ti ala, ala ‘kiri na ngia na bê ti ala’. (Luc 10:17). E nga kue e yeke wara ande ngia nga kusala ti e ayeke ga nzoni tongana e dengi mê na e hinga mbilimbili ngoi ti sara tënë tongana e yeke mû maboko na ala so e na ala e yeke fa tënë.