“Tambela na senda ti Lo”
1. Tongana nyen e lingbi ti ga azo so asara kusala ti Nzapa nzoni?
1 Jésus amanda mbeti na ekole ti amaître ti ndia pëpe, ye oko, na yâ ti mbaï ti azo, a hinga lo tongana mbeni Kota Zo ti kusala ti Nzapa. Singila so a sû peko ti kusala ti lo na mbeti si a bata ni teti nzoni ti e. Ti tene e ga azo so asara kusala ni nzoni, a lingbi e “tambela na senda ti Lo.”—1 Pi. 2:21.
2. Ye wa ayeke mû maboko na e ti duti na mara ndoye ti Christ na mbage ti azo?
2 Fa ndoye na mbage ti azo: Ndoye teti azo agbu lani bê ti Jésus (Marc 6:30-34). “Gua” ate azo mingi ti yâ ti territoire ti e na ala yeke na kota nzara ti tâ tënë (aRom. 8:22). Tongana e bi bê na kpale so azo ayeke na yâ ni nga na ndoye so Jéhovah ayeke na ni na mbage ti ala, a yeke pusu e ti zia pëpe ti fa tënë (2 Pi. 3:9). Na ndo ni, fade azo ayeke yeda hio na tokua ti e tongana ala bâ so e bi bê biani na ala.
3. Na ngoi wa Jésus afa tënë na azo?
3 Fa tënë na alege kue so azi: Jésus agbu alege kue so azi ti fa nzoni tënë na azo (Mat. 4:23; 9:9; Jean 4:7-10). Legeoko nga, e ye ti leke tere ti e ti fa tâ tënë na ngoi so e yeke sara akusala ti e ti lâ oko oko. Ambeni ayeke na Bible nga na ambeti na tere ti ala tongaso ala lingbi ti fa tënë na place ti kua, na ekole, na voyage, na gara wala na ambeni ndo nde.
4. Tongana nyen e lingbi ti sara si tënë ti Royaume aduti mama-tene ti fango tënë ti e?
4 Luti na ndo ti tënë ti Royaume: Nzoni tënë ti Royaume ayeke mama-tene ti fango tënë ti Jésus (Luc 4:43). Atâa so tënë ti Royaume alingbi ti duti lakue pëpe na yâ ti tënë so e yeke fa, a lingbi e bata na li ti e ti mû maboko na zo so ayeke mä e ti bâ so e yeke na bezoin ti Royaume ni. Kamême so e lingbi ti sara tënë ti asioni ye so ayeke tambela na yâ ti dunia so, kozo ye so e ye ayeke ti fa “Tene-nzoni ti nzoye”.—aRom. 10:15.
5. Ti tene e sara nzoni kusala, Bible alingbi ti mû maboko na e tongana nyen?
5 Sara kusala na Bible: Na yâ ti kusala ti Jésus kue, lo sara kusala na Mbeti ti Nzapa. Lo fa ye ti bê ti lo mveni pëpe (Jean 7:16, 18). Tënë ti Nzapa ayeke tongana kobe ti lo, na lo sara kusala na ni tongana Satan atara lo (Mat. 4:1-4). Ti tene e fa ye nzoni na azo, a lingbi e diko Bible lâ oko oko na e sara ye alingbi na ni (aRom 2:21). Tongana e yeke kiri tënë na zo na fango tënë, a lingbi e fa versê ti mû ngangu na tënë ni wala ti diko ni na yâ ti Bible tongana lege ayeke dä. E ye si zo ni abâ so kiringo tënë ti e ayeke bibe ti e mveni pëpe me ayeke tënë ti Nzapa.
6. Jésus asara nyen ti ndu bê ti awamango lo?
6 Ndu bê ti zo na yâ ti fango ye ti mo: Aturugu so akota sacrificateur na aFarizien atokua ala ti gbu Jésus si ala wara lege pëpe atene: “Mbeni zo asara tënë tongaso lâ oko pëpe!” (Jean 7:46). Ahon ti fa gi peko ti ye so asi, Jésus afa ye na mbeni lege so andu bê ti azo so amä lo (Luc 24:32). Lo sara kusala na atapande so azo ahinga ni ti mû maboko na ala ti gbu nda ti tënë ti lo (Mat. 13:34). Jésus afa gbä ti tënë na awamango lo pëpe (Jean 16:12). Lo gboto lê ti ala na ndo ti Jéhovah, me na ndo ti lo mveni pëpe. Tongana Jésus, e lingbi ti ga anzoni wafango ye gi tongana ‘e bâ lege ti fango ye ti e nzoni’.—1 Tim. 4:16, Fini Mbuki, 2001.
7. Ngbanga ti nyen Jésus azia pëpe ti sara kusala ni?
7 Ngbâ dä atâa azo akanga lege wala ala sara nzara ti tënë ni pëpe: Atâa so Jésus asara amiracle mingi, azo mingi ake ti mä lo (Luc 10:13). Même azo ti sewa ti lo atene so “li ti Lo aturne awe!” (Marc 3:21). Me Jésus azia pëpe. Lo duti na nzoni bango ndo ngbanga ti so lo hinga na bê ti lo kue so lo yeke na tâ tënë so alingbi ti zi azo (Jean 8:32). Na mungo maboko ti Jéhovah, e nga e leke na bê ti e ti zia pëpe.—2 aCor. 4:1.
8, 9. Na lege wa e lingbi ti mû tapande ti Jésus na gbanzingo ambeni ye na tere ti e ndali ti nzo tënë?
8 Gbanzi ambeni ye na tere ti mo ti fa tënë mingi: Jésus ake aye ti mitele ndali ti kusala ni (Mat. 8:20). Lo nze pëpe na yâ ti fango tënë, mbeni lâ lo fa tënë juska lakui (Marc 6:35, 36). Lo hinga so lo yeke na ngoi mingi pëpe ti sara kusala so. Teti so “lâ ade mingi pëpe”, e nga kue e ye ti sara tongana Jésus ti mû mbage ti ngoi ti e, ngangu ti e nga na mosoro ti e.—1 aCor. 7:29-31.
9 Akozo Chrétien ayeke azo so asara kusala ni nzoni ngbanga ti so ala manda ye na tere ti Jésus (Kus. 4:13). E nga kue, e lingbi ti sara kusala ti e nzoni tongana e mû tapande ti Kota Zo ti kusala ti Nzapa so ahon tanga ti azo kue.—2 Tim. 4:5.