Atënë so i hunda

◼ A yeke na lege ni ti pika maboko na ndo ti ambage oko oko kue ti Ekole ti Kusala ti aChrétien na ti Bungbi ti Kusala?

Lani so Jéhovah, Wasarango ye asara sese, “atongoro ti ndapre asara bia, na amolenge ti Nzapa kue adekongo na ngia.” (Job 38:7). A-ange so ayeke amolenge ti Nzapa asepela Jéhovah ndali ti kota kusala so lo sara, so ayeke fini lege so lo fa na gigi ndara, nzobe nga na ngangu ti lo.

A yeke nzoni ti tene e fa na gigi tënë ti bê ti e ndali ti ngangu so aita ti e asara ti fa na e kusala wala devoir ti ala. Na tapande, mingi ni e yeke pika maboko ndo ti adiskur na adevoir so a sara na ngoi ti akota bungbi. A mû ngoi mingi ti leke akusala so a sara kâ. Pikango maboko ti e afa so e bâ na nene ni gi pëpe ngangu kusala ti wamungo diskur ni, me nga fango ye so Jéhovah amû na lege ti Tënë ti lo nga na bungbi ti lo.​—Es. 48:17; Mat. 24:45-47.

Ka ti pika maboko na ndo ti adevoir so a sara na Ekole ti Kusala nga na Bungbi ti Kusala ayeke tongana nyen? Mbeni ndia ti kanga lege na ni ayeke pëpe tongana pikango maboko ni alondo na bê; na tapande, ti pika maboko na ndo ti mbeni élève so alondo ti sara kozo devoir ti lo. Ye oko, pikango maboko lakue lakue alingbi ti ga mbeni ngobo so nda ni ayeke dä pëpe. Ni la, e yeke pika maboko lakue pëpe na ndo ti adevoir oko oko kue so a sara.

Atâa so e yeke pika maboko pëpe na ndo ti mingi ti akusala so a sara na ngoi ti abungbi use so, ambeni lege ayeke dä so e lingbi ti fa singila ti bê ti e teti ye so a fa nga teti ngangu ti azo so asara ni. E lingbi ti sara ni na dutingo kpô nga ti dengi mê nzoni na azo so ayeke sara tënë. Na peko ti bungbi, mingi ni e mveni e lingbi ti ga nduru na azo ni ti fa na ala singila ti bê ti e teti ngangu so ala sara.​—aEph. 1:15, 16.