Atënë so i hunda

◼ Babâ na mama use kue alingbi ti diko ngoi so ala mû teti mandango ye na sewa?

Atâa so kozo kusala ti ababâ ayeke ti bata amolenge ti ala na ti “fa lege na ala na wango ti Seigneur”, a yeke ala use kue si amû mbage na fango ye na amolenge ti ala (aEph. 6:4). Bible awa amolenge: “Molenge ti mbi, mo mä wango tënë ti babâ ti mo, na mo zia lege ti wango tënë ti mama ti mo pëpe.” (aProv. 1:8). Kota mbage ti kusala ti babâ na mama na yâ ti fango ye na amolenge ayeke mandango Bible na sewa.

Giriri, a yeke gi babâ wala mama so amanda ye na amolenge ti lo so ade ti wara batême pëpe si ayeke diko ngoi, même tongana ala use kue si amû mbage ti ala na lisoro ni. Ye oko, ye so agbian awe. Tongana, na ngoi ti mandango ye na sewa, babâ na mama use kue amû mbage na fango ye ni, ala use kue alingbi ti mû l’heure oko na yâ ti yenga oko tongana kusala so ala sara na fango tënë. Biani, ababâ na amama ayeke mû ka ngoi mingi ahon so yenga na yenga ti fa ye na amolenge ti ala. Fango ye na amolenge ahunda na babâ na mama ti sara ngangu lakue (Deut. 6:6-9). Ye oko, a lingbi rapport ti nze oko oko afa kozoni kue ye so a sara biani na yâ ti fango tënë. Tongaso, a lingbi a diko gi l’heure oko na yâ ti yenga oko, même tongana mandango ye ni aninga ahon l’heure oko, wala a sara ni fani mingi na yâ ti yenga, wala a manda Bible na amolenge ni nde nde. Gi zo oko si ayeke diko étude nga na vizite so a sara yenga na yenga.