Atënë so i hunda

◼ Tongana zo amanda Bible na sewa ti lo, lo lingbi ti zia ni na ndo rapport?

Tongana mbeni babâ wala mama Chrétien ayeke manda Bible na sewa ti lo, so a ndu nga amolenge so ade ti wara batême pëpe, a lingbi babâ wala mama ni adiko na yâ rapport ti lo gi ngbonga oko na fini vizite oko teti yenga oko oko, nga étude oko nze oko oko. Ye so andu étude so asala ni même aninga ahon ngbonga oko, nga a sala ni ahon fani oko na yâ yenga ni, wala tongana a sala ni na molenge oko oko.​—Bâ buku Notre ministère, l. 104-105.

Tongana azo kue ti yâ ti da ni ayeke aTémoin so awara batême awe, ge, a lingbi pëpe ti diko ngbonga ni wala étude ni mveni na ndo rapport (a lingbi ti sala ni gi tongana mbeni molenge ni angbâ ti manda use buku ni na peko ti batême ti lo). A yeke tongaso ngbanga ti so arapport ti kusala ti kongregation andu kozoni kue ye so e yeke sala na yâ kusala ti fango nzo tënë nga na fango tâ tënë ti Bible na ala so ade ti ga pëpe awakua ti Jéhovah so amû tele ti ala na lo na awara batême (Mat. 24:14; 28:19, 20). Atâa so a yeke bi pëpe mbeni rapport teti mara ti mandango ye tongaso, a yeke kota ye ti ngbâ ti sala ni lakue .

A yeke kungba ti ababâ na mama Chrétien ti manda ye na amolenge ti ala. Ala so aye ti wara mungo maboko ti zia na sese wala ti sala si mandango ye na sewa ti ala aga nzoni ahon ti kozo alingbi ti hunda ni na mbage ti a-ancien. Tongana ambeni ye asi so a hunda ti tene mbeni wafango tënë nde amanda Bible na mbeni molenge so ade ti wara batême pëpe ti mbeni sewa ti aChrétien so ayeke na yâ kongregation ni, a lingbi a sala tënë ni kozoni na surveillant président wala na surveillant ti kusala. Tongana a yeda na mara ti mandango ye tongaso, ita so amû li ni na mandango ye ni alingbi ti zia ni na ndo rapport legeoko tongana ti so lo yeke sala teti ambeni mandango Bible nde.

Ti fa lege na amolenge na yâ alege ti Jéhovah ahunda ngoi nga na ngangu mingi ahon ye so e yeke zia na ndo mbeni rapport ti kusala ti fango tënë (Deut. 6:6-9; aProv. 22:6). Ababâ na mama Chrétien alingbi na gonda teti salango ye alingbi na nene kungba ti ala so ayeke ti bata amolenge ti ala na yâ “wango-tene nga na fango lege ti bibe ti Jéhovah.”​—aEph. 6:4, NW.