Leke tere nzoni teti Mémorial

So kota ngia na pasa si awamungo peko ti Christ ayeke na ni ti leke tere nzoni teti bï so e yeke bungbi ti dabe na kui ti Jésus Christ! (Luc 22:19). E lingbi ti sara nyen ti leke tere ti e teti Mémorial?

◼ Ngbonga nga na ndo ni: A lingbi zo oko oko ahinga mbilimbili ngbonga nga na ndo so a yeke sara Mémorial ni dä. Tongana acongrégation mingi ayeke bungbi na yâ ti Da ti Royaume oko, a yeke nzoni ti si na l’heure na ti kiri hio na pekoni, teti ngoi so akangbi popo ti abungbi ni ayeke mingi pëpe. E yeke sara kue ti tene azo ahon ndo ni senge senge pëpe na yanga ti da, na tere ti lege nga na ndo so a yeke bata akutukutu dä.

◼ Ambeti ti tisango ndo: Awafango tënë kue awara ambeti ti tisango ndo ni awe? na ala hinga tënë ti yâ ni kue nzoni? Mo manda kode ti ziango ni na azo awe? Mo yeke mû ande mbeti ti tisango ndo ni na zo wa? Fade a sara kue ti tene a kangbi ambeti ti tisango ndo ni kue.

◼ Yongo zo: Ambeni zo so aye tënë ti tâ tënë nga na ambeni ita alingbi ti duti na bezoin ti tene a yô ala wala ti mû maboko na ala ti ga na Mémorial ni. Nyen la ala leke awe ti mû maboko na ala?

◼ Mapa na vin: Ala leke ti tene mapa na vin ni ahon pëpe kozoni si lâ akui. A lingbi ala leke ti tene a mû mapa na vin na azo kue so a soro ala na lege ti yingo vulu so azin na so alingbi pëpe ti gue na bungbi ni. Fade a gi mapa na vin so alingbi, na a leke ni kozo na Mémorial ni.​—Bâ Tour ti Ba Ndo ti 15 février 2003, lembeti 14, paragraphe 14.

◼ Da ti Royaume: A lingbi ala leke kozoni yâ ti da so a yeke sara bungbi ni dä nzoni. Fade a ga na asembe, averre, mbeni table na bongo ti ndo ni so alingbi, na a zia aye so kue na place ni kozoni si bungbi ni ato nda ni. Tongana a sara bungbi ni na mbeni ndo nde, ala leke ti tene fonono atoto nzoni tongaso si azo kue alingbi ti mä wamungo diskur ni nzoni. A yeke soro azo ti yambango azo na ala so ayeke hon na mapa nga na vin, na a yeke fa na ala kozoni atënë na ndo ti kusala ti ala nga lege ti sara ni, nga ti yü bongo so alingbi na ti leke tere pendere.

Na kota ngoi ti dango bê na kui ti Jésus Christ so, e ye ti tene zo oko oko aleke tere ti lo nzoni legeoko na congrégation. Biani, e yeke na beku so Jéhovah ayeke iri tënë nzoni na ndo ti azo kue so afa singila ti bê ti ala teti ye kue so lo sara ndali ti azo ti dunia kue na lege ti sandaga ti Molenge ti lo so lo ndoye lo mingi, Jésus Christ.