“Ga mo mû peko ti mbi”
1. Mandango Bible ti Congrégation na anze so ayeke ga ayeke mû ande lege na e ti sara nyen?
1 A-Évangile osio so asara tënë na ndo ti fini ti Jésus lani so lo yeke na sese afa aye mingi na ndo ti Molenge ti Nzapa. Teti so a lingbi aChrétien amû “tâ gi peko ti gere ti lo mbilimbili”, ti to nda ni na yenga ti lango 1 ti mars, fade e yeke manda na ngoi ti Mandango Bible ti Congrégation buku “Ga mo mû peko ti mbi”. Tongaso a yeke nzoni e leke tere ti e nzoni na e dengi mê nzoni na ndembe so e yeke manda buku ni (1 Pi. 2:21; Marc 10:21). Ye so ayeke nzoni ti sara ayeke ti gbu li mingi na ndo ti aye nde nde so Jésus asara na yâ ti fini ti lo so alingbi ti kpengba e na yâ ti fango tënë.
2. So lani Jésus agbu ngangu, a mû maboko na e tongana nyen?
2 Tapande so Jésus azia: A si na mo awe ti tene mbeni zo ake ti mä mo na ngoi so mo yeke fa tënë da na da? Tongana ye tongaso asi, ge la e yeke gbu nda ti tënë ti Jésus so: “So azo ni asara ye ti ngangu na mbi, ala yeke sara ande ye ti ngangu na ala nga.” (Jean 15:20). Ti tâ tënë ni, tongana azo ake ti mä e, a ye lakue ti tene pëpe so sarango ye ti ngangu na e la. Ye oko, ti Jésus, a yeke ngia so a zia na gbele lo si amû lege na lo ti gbu ngangu na yâ ti atara nde nde. E nga kue e lingbi ti gi ti nzere na lê ti Jéhovah nga ti zia lê ti e na ndo ti futa so lo mû zendo ni na e tongana e ngbâ be-ta-zo na lo. Ye so ayeke mû maboko na e ande ti “woko pëpe” nga ti tene “ngangu ahunzi na âme ti [e] kue kue kue pëpe.” (aHéb. 12:2, 3; aProv. 27:11). Na ngoi so e ngbâ lakue ti fa tënë, Christ Jésus ayeke mû maboko na e nga.—Mat. 28:20.
3. Tongana ti Jésus, a yeke nzoni e bâ kusala ti fango tënë tongana nyen?
3 “A yeke ndali ni si a tokua mbi”: Fango tënë ti Royaume ayeke kusala so aga na kozo ndo na yâ ti fini ti Jésus (Luc 4:43). Lo mû tere ti lo kue na ni. Lo bâ ni tongana mbeni kota ye na lê ti lo, ni la lo gi lakue lege ti sara tënë ti Royaume ni na azo. So e mû peko ti Jésus so, a pusu e ti sara nyen? Na yâ ti akusala ti e ti lâ oko oko, ambeni zo ayeke dä so e lingbi ti fa nzoni tënë na ala? Zia si ndoye so Christ ayeke na ni apusu e ti sara kue ti fa tënë na azo mingi!—2 aCor. 5:14.
4. Tongana nyen e lingbi ti sara si fango ye ti e aga nzoni ahon ti kozo?
4 “Mbeni zo asara tënë tongaso lâ oko pëpe”: Lege so lani Jésus afa ye na ni apika bê ti awamango lo mingi (Jean 7:46; Mat. 7:28, 29). Nyen la asara si lo yeke nde na tanga ti awafango ye? Lo ye tâ tënë so lo fa, lo ye azo so lo fa ye na ala nga lo sara kua na akode nde nde ti fa ye na azo. Na mungo tapande ti Kota Wafango ye, e lingbi ti sara si fango ye ti e aga nzoni ahon ti kozo.—Luc 6:40.
5. Na ngoi so e yeke manda buku “Ga mo mû peko ti mbi”, nyen la a lingbi e zia na gbele e ti sara?
5 So ayeke gi ambeni pendere ye so e manda na ndo ti fini ti Jésus la. Ambeni pendere ye nde wa mo lingbi ti wara na yâ ti buku so? Na ndembe so mo yeke manda tënë na ndo ti fini ti Jésus na ngoi ti Mandango Bible ti Congrégation, zia na gbele mo ti “hinga ndoye so Christ ayeke na ni” na lege so mo yeke gi ti sara tënë na ti sara ye tongana lo.—aÉph. 3:19.