Fa na afini zo tongana nyen ti fa tënë

1. Bê ti mo ayeke lani tongana nyen na kozo lango so mo to nda ti fa tënë?

¹ Mo dabe ti mo na kozo lango so mo to nda ti fa tënë da na da? Âmanke bê ti mo afâ mingi na ngoi ni so. Tongana lani mo yeke fa tënë na tere ti zo so amanda Bible na mo wala na mbeni wafango tënë nde, a nzere lani na mo ti wara mungo maboko ti lo. So mo kpengba na yâ ti kua ti fango tënë awe so, mo lingbi fadeso ti fa na afini zo tongana nyen ti fa tënë nzoni.

2. A yeke nzoni a fa nyen na afini wafango tënë?

² Afini wafango tënë ayeke na bezoin ti manda tongana nyen ti to nda ti lisoro na mbeni zo, ti sara kusala na Bible na yanga-da ti azo, ti sara avizite, ti to nda ti mbeni étude na azo na ti ngbâ ti sara ni. A yeke nzoni ala hinga nga tongana nyen ti fa tënë na alege nde nde, na tapande ti fa tënë na ndo ti lege nga ti sara tënë na azo na place ti dengo buze ti ala. Tapande ti mo nga na awango ti mo alingbi ti sara si ala fa tënë nzoni na alege nde nde so.

3. Tapande ti e alingbi ti mû maboko na afini wafango tënë tongana nyen?

³ Duti tapande ni: Jésus afa lani na adisciple ti lo tongana nyen ti fa tënë na lo zia nga tapande ni (Luc 8:1; 1 Pi. 2:21). Tongana mo leke ti fa tënë na mbeni fini wafango tënë, leke mbeni kode ti fango tënë so akpengba pëpe so wafango tënë ni alingbi ti haka pekoni. Peut-être mo lingbi ti sara kusala na mbeni kode so ayeke na yâ ti ambeti ti e. Na pekoni, tene na lo so mo yeke sara da oko wala use si lo mä tënë so mo yeke tene. Na popo ti ada use, mo lingbi ti hunda wafango tënë ni ti fa tënë ti bê ti lo na ndo ti kode ni so. Ye so ayeke mû ande maboko na lo ti bâ nene ti fa tënë na tere ti amba ti lo na ayeke sara si lo yeke yeda hio na wango kue so mo yeke mû na lo na peko ti so lo fa tënë.

4. Na peko ti so e mä atënë ti fini wafango tënë ni awe, e lingbi ti mû maboko na lo tongana nyen?

⁴ Mû wango: Jésus amû nga wango na adisciple ti lo, lo fa na ala tongana nyen ti fa tënë (Mat. 10:5-14). Mo lingbi ti sara tongaso ti mû maboko na mbeni fini wafango tënë. Tongana a yeke lo la si ayeke fa tënë, dengi mê na tënë ti lo ni. Na pekoni tongana ala hon awe, gonda lo ndali ti mbeni ye ti nzoni so lo sara, atâa so mo bâ so a lingbi lo leke ambeni ye na yâ ti fango tënë ti lo ni. Kozo si mo mû wango, mo lingbi ti ku ti bâ wala lo yeke sara ni nzoni na mbeni yanga-da nde. Peut-être a yeke gi mbeto la asara lo. Nga girisa pëpe so wafango tënë oko oko ayeke na kode ti lo wani, nga so nzoni fason ti sarango mbeni ye ayeke nde nde.​—1 aCor. 12:4-7.

5. Tënë wa e lingbi ti tene tongana e ye ti mû wango?

⁵ Na ambeni ngoi mbeni fini wafango tënë alingbi ti hunda wango na mo. Me tongana lo hunda pëpe, ku pëpe ti mû wango na lo na lege ti ndara. Tongana nyen? Ambeni wafango tënë so aninga na yâ ti kusala ni ayeke hunda atënë so: “Mbi lingbi ti mû na mo mbeni kete wango?” wala “Mo bâ fango tënë ti mo ni tongana nyen?” Mo lingbi ti tene nga: “Lani so mbi fa tënë fini fini, a yeke ngangu na mbi ti . . . , me mbi bâ so ti . . . amû maboko na mbi mingi.” Na ambeni ngoi a yeke nzoni ti tene mo na zo ni abâ buku Comment raisonner. Ti tene li ti lo aga kirikiri pëpe, mû wango na lo gi na ndo ti mbeni ye oko so lo sara na fango tënë.

6. Na fango tënë, tongana nyen si ‘wen asara si yanga ti mbeni wen aza’?

⁶ Wen asara si yanga ti mbeni wen aza: Paul awa lani Timothée, so ahinga kua ti fango tënë mingi, ti ngbâ ti mû bê ti lo kue na fango ye na azo na ti sara si azo abâ maïngo ti lo (1 Tim. 4:13, 15). Atâa a sara angu mingi awe la mo to nda ti fango tënë, ngbâ lakue ti maï akode ti mo. Manda ye na mbage ti awafango tënë so mo na ala ayeke fa tënë, même ala so ade ti ninga mingi pëpe na yâ ti kua ti fango tënë. Duti nga nduru ti mû maboko na amba ti mo na nzoni bê, mingi ni na afini zo, ti tene ala ga awafango tënë so ayeke na anzoni kode.​—aProv. 27:17.