‘Zia mbeto asara mo pëpe’
1. Akpale wa so ayeke tongana ti Jérémie e lingbi ti wara?
1 Na ngoi so Jéhovah ahunda na Jérémie ti ga prophète, Jérémie abâ so lo lingbi na kusala ni pëpe. Me Jéhovah adë bê ti lo atene: “Zia mbeto . . . asara mo pëpe,” nga na nzoni bê Jéhovah akpengba lo ti sara kusala so (Jér. 1:6-10). Laso, kamene wala so e bâ tere ti e e tene e lingbi pëpe alingbi ti sara ye mingi na ndo ti fango tënë so e yeke fa. Mbeto ti tene azo asara ye nzoni na e pëpe na fango tënë wala ti tene ala bâ e na sioni lê alingbi ti sara si na ambeni ngoi e fa tënë pëpe. E lingbi ti hon ndo ti mara ti ambeto so tongana nyen? Nga aye ti nzoni wa e yeke wara na pekoni?
2. Tongana nyen lekengo tere ayeke mû maboko na e ti zi mbeto na yâ ti e na fango tënë?
2 E Leke tere ti e kozoni: Lekengo tere nzoni alingbi ti mû maboko mingi ti zi mbeto na yâ ti e. Na tapande, tongana e bâ kozoni atënë ti kangango lege na lisoro, a yeke leke e ti kiri tënë na atënë so azo ayeke tene ka ti ke na tënë so e yeke fa (aProv. 15:28). E lingbi peut-être ti mû ngoi ti Mandango tënë ti Nzapa na sewa ti tara tere na ndo ti akpale nde nde so e lingbi ti wara na ekole nga na fango tënë.—1 Pi. 3:15.
3. Tongana e zia bê ti e na Jéhovah, a yeke mû maboko na e tongana nyen ti hon ndo ti mbeto?
3 E zia bê ti e na Jéhovah: Tâ yorö ti zingo mbeto na yâ ti e ayeke ti zia bê ti e na Nzapa. Jéhovah wani atene na e so lo yeke mû maboko na e (És. 41:10-13). E lingbi ti gi bê ti e pëpe. Na ndo ni, Jésus adë bê ti e so même tongana mbeni ye so e ku tere ti e na ni pëpe asi, yingo vulu ti Nzapa ayeke mû lege na e ti fa tënë na lege ni (Marc 13:11). Tongaso, e sambela Jéhovah lakue lakue ti wara yingo vulu ti lo.—Luc 11:13.
4. Tongana e ngbâ ti fa tënë atâa akpale so e yeke wara, aye ti nzoni wa e yeke wara?
4 Aye ti nzoni: Tongana e ngbâ ti fa tënë atâa akpale so e yeke wara, ye so ayeke mû ngangu na e ti luti na lê ti atara so ayeke ga. E yeke zi mbeto na yâ ti e: a yeke ye so a hinga na azo so ayeke na yingo vulu la (Kus. 4:31). Nga, tongana na ngangu ti Jéhovah e yeke hon ndo ti ambeto ti e wani, mabe ti e ayeke kpengba na e yeke zia bê ti e kue na lo ti sö e (És. 33:2). Nga, ti hinga so e yeke sara ye so anzere na Babâ ti e ti yayu ayeke mû ngia na e (1 Pi. 4:13, 14). Tongaso, zia e sara mbeto pëpe ti fa tënë ti Royaume, e hinga lakue so Jéhovah ayeke na e!