Mo soro ti mo nyen?

Na yâ ti ada-nganga mingi mingi fadeso na sese ti États-Unis, a yeke suru azo sân ti mû na ala mênë. Mo hinga awe atënë mbilimbili na ndo ti akode nde nde so mo lingbi ti soro na ndo ti tënë ti kaïngo kobela sân ti mû mênë? A lingbi mo hinga ni kozoni si mo mû desizion na ndo ti kode ti kaïngo kobela nga na surungo zo. Bâ vidéo Pas de sang: la médecine relève le défi. Na pekoni, sambela na kiri mo bâ ye so mo manda awe na lege ti ahundango tënë so ayeke na gbe ni ge.—Kete tënë: Teti so limon ni afa ambeni kete mbage ti akode ti surungo zo, a yeke nzoni ababâ na amama asara ye na ndara tongana ala yeke bâ kasete ni na akete molenge.

(1) Mbilimbili raison so ndali ni aTémoin ti Jéhovah ake ti mû mênë ayeke nyen? (2) Na ndo ti tënë ti mungo yorö ti kaï na kobela, nyen la si e ye? (3) Azo ti kobela ayeke na droit ti sara nyen? (4) Ngbanga ti nyen ti soro mbeni kode ti kaïngo kobela sân ti mû mênë ayeke na lege ni nga afa so e yeke bâ tënë ti seni ti e na nene ni? (5) Tongana mênë ti zo ayuru mingi, aye use wa a lingbi awanganga asara hio kozoni? (6) Akode ti surungo zo sân ti mû mênë na lo aluti na ndo ti akota tënë osio: a yeke so wa? (7) Tongana nyen awanganga alingbi (a) ti sara si mênë ti zo ti kobela ayuru mingi pëpe? (b) ti bata abengba globule ti lo? (c) ti sara si mênë ti lo angbâ ti dü? na (d) ti sara si mênë ti lo so ayuru akiri aga gbani? (8) Fa nda ti kode so a iri ni (a) hémodilution na (b) récupération du sang épanché. (9) Mo ye ti tene docteur ti mo afa nyen na mo na ndo ti akode nde nde ti kaïngo kobela na place ti mênë? (10) A lingbi ti sara angangu opération na zo sân ti mû mênë na lo? (11) Aye ti nzoni wa ayeke bâ gigi fadeso na popo ti awanganga?

Ti yeda na ambeni kode ti kaïngo kobela so a fa na yâ ti limon ni ayeke ti zo oko oko ti mû desizion na lege ti yingo-ti-hinga ti lo so Bible afa lege na ni. Na ndo ti ayorö nga na akode ti kaïngo kobela so mo bâ alingbi na mo nga na amolenge ti mo, mo hinga ati so mo ye na mo sû ni na ndo ti carte DPA ti mo awe? Ti hinga tënë kue na ndo ni, kiri mo diko nzoni “Atënë so azo ahunda” na yâ ti Tour ti Ba Ndo ti 15 juin 2004, nga na Tour ti Ba Ndo ti 1 novembre 2000. Na pekoni, diko supplément ti Kusala ti Royaume ti novembre 2006, “Desizion wa mbi yeke mû na ndo ti aye nde nde so ayeke na yâ ti mênë nga na ndo ti akode ti kaïngo kobela so asara kusala na mênë ti mbi wani?”, ti sû desizion ti mo na ndo ti ye so mo ye na so mo ke. Na nda ni, bâ nzoni si ye so mo soro aduti mbilimbili ye so mo sû na lê ti carte DPA ni. A lingbi awanganga ti mo nga asewa ti mo so ayeke aTémoin ti Jéhovah pëpe ahinga tënë nzoni na ndo ti desizion kue so mo mû.