Mo yeke pusu ni na peko?

Ti pusu nyen? Ti pusu na peko ti sû atënë na ndo ti carte Instructions médicales (DPA) so a mû na aita so awara batême awe. Teti so mo “hinga pëpe ye so ayeke si . . . kekereke”, a yeke kota ye mingi ti mû desizion kozoni na ti fa na lê ti mbeti akode ti kaïngo kobela so mo lingbi ti yeda na ni tongana ye ti ngangu asi (Jacq. 4:14; Kus. 15:28, 29). Ti mû maboko na mo, a sigigi na vidéo Soigner sans transfuser—Besoins et droits du patient. Bâ ni, na pekoni gbu li na yâ ti sambela na ndo ti ye so mo manda dä na lege ti ahundango tënë so ayeke na gbe ni ge.—Kete tënë: Teti so na yâ ti vidéo ni a fa ambeni kete mbage ti akode ti surungo zo, a lingbi ababâ na amama asara ye na ndara ti bâ wala ala na amolenge ti ala ayeke bâ ni.

(1) Ngbanga ti nyen ambeni wanganga ayeke kiri ti bâ atënë na ndo ti mungo mênë na zo? (2) Fa atapande ota ti surungo zo so ahunda kpengba kode ti tene wanganga asara ni, me so alingbi ti sara ni sân ti tene a mû mênë na zo. (3) Awanganga oke na ndo ti sese kue afa so ala yeke nduru ti kaï kobela na sarango kusala na mênë pëpe? Ngbanga ti nyen ala yeke nduru ti sara tongaso? (4) Afini mandango ye na yâ ti ada-nganga afa nyen na ndo ti sarango kusala na mênë? (5) Akpale wa zo alingbi ti wara tongana a mû na lo mênë? (6) Mingi ti awakode ti kaïngo kobela atene nyen na nda ni na ndo ti nzoni ti ayorö so a yeke sara na kusala na place ti mênë? (7) Aye wa ayeke sara si zo ayeke na mênë mingi pëpe? Mênë ti zo alingbi ti kiri na gbe ni juska na ndo wa si zo ni angbâ na fini? A lingbi ti sara nyen ti tene mênë ti zo adü mingi? (8) Nyen la a lingbi ti sara ti tene abengba globule adü mingi na yâ ti tere ti zo ti kobela? (9) Akode wa a yeke sara na kusala ti kanga lege si mênë ayuru mingi pëpe na ngoi ti surungo zo? (10) Ayorö so a yeke mû na place ti mênë alingbi ti sara kusala nzoni na tere ti amolenge wala azo so ayeke nduru ti kui? (11) Wanganga so aye ti kaï kobela ti zo, lo yeke sara ye nzoni tongana nyen na mbage ti zo ti kobela ni? (12) Ngbanga ti nyen a yeke kota ye ti tene aChrétien asoro kozoni akode ti kaïngo kobela na mênë pëpe kozo si tënë ni alondo? E lingbi ti sara ni tongana nyen?

Ti yeda na ambeni kode ti kaïngo kobela so a fa ni na yâ ti vidéo so ayeke mbeni ye so andu desizion ti zo oko oko, so ague oko na yingo-ti-hinga ti lo wani so Bible afa lege na ni. Mo mû desizion ti mo polele awe na ndo ti akode ti kaïngo kobela so mo yeke nduru ti yeda na ni teti mo mveni nga teti amolenge ti mo? Mo sû ye na yâ ti carte DPA ti mo awe? Ti hinga tanga ti atënë ni kue, bâ chapitre 7 ti buku “Ndoye ti Nzapa” nga na ambeni tënë ti yâ ni nde so a tokua zo dä ti bâ ni. Bâ nga supplément ti Kusala ti Royaume ti novembre 2006 so atene “Desizion wa mbi yeke mû na ndo ti aye nde nde so ayeke na yâ ti mênë nga na ndo ti akode ti kaïngo kobela so asara kusala na mênë ti mbi wani?” Na nda ni, bâ mbilimbili wala mo sû nzoni na ndo ti carte DPA ti mo atënë ti bê ti mo so andu kode so mo soro ti tene a kaï na kobela ti mo. A lingbi zo so mo soro lo ti bâ tënë ti seni ti mo na ngoi so ye ti ngangu asi na mo (personne de confiance) wala sewa ti mo so ayeke Témoin ti Jéhovah pëpe ahinga desizion ti mo tâ nzoni.

[Encadré na lembeti 3]

• Mo soro awe kode so mo ye si a sara kusala na ni ti kaï na kobela ti mo nga na ti amolenge ti mo?

• Hinga pëpe mbeni ye asi na mo, mo yeke ka lakue na carte DPA ti mo, so mo sû atënë ni kue dä awe, na tere ti mo?