Leke amolenge ti mo ti ga awafango tënë
1. Psaume 148:12, 13 apusu ababâ na amama so ayeke aChrétien ti sara nyen?
1 Jéhovah atisa amaseka ti sepela lo (Ps. 148:12, 13). Tongaso, a yeke ti ababâ na amama so ayeke aChrétien ti fa ye mingi na amolenge ti ala ahon gi ti fa na ala atâ tënë so ayeke na yâ ti Bible nga na andia ti Nzapa na ndo ti nzoni sarango ye. Ala yeke fa nga ye na ala ti tene ala ga awafango nzoni tënë. Tongana nyen ala lingbi yeke na yeke ti sara ni?
2. Nzoni tapande ti ababâ na amama ayeke sara ye ti nzoni wa na ndo ti amolenge ti ala?
2 Nzoni tapande: Juge Gédéon atene na azo ti lo so wungo ti ala ayeke 300 atene: “I bâ mbi, na i sara legeoko tongana mbi sara.” (aJu. 7:17). Amolenge ayeke bâ ka aye so ababâ na amama ti ala ayeke sara na ala yeke haka peko ti ala. Mbeni babâ ayeke sara kua ti bï, me tongana lo kiri na yanga-da na samedi na ndapre, ahon ti gue ti lango, lo yeke sigigi na fango tënë lo na amolenge ti lo atâa so lo fatigué mingi. Sân tënë lo yeke fa na amolenge ti lo so fango tënë ayeke kozo ye na yâ ti fini ti lo (Mat. 6:33). Na bango mo amolenge ti mo ayeke bâ so anzere na mo ti bi tere ti mo kue na yâ ti vorongo Nzapa na lege ti aye tongana sambela, dikongo Bible, mungo acommentaire nga na fango tënë? Tâ tënë, mo lingbi ti duti tapande so alingbi kue pëpe. Me amolenge ti mo ayeke duti ande nduru ti yeda na fango ye so mo yeke sara ngangu ti fa na ala ti voro Jéhovah tongana ala bâ so mo mû tere ti mo kue na vorongo lo.—Deut. 6:6, 7; aRom. 2:21, 22.
3. Aye ti yingo wa a yeke nzoni ababâ na amama amû maboko na amolenge ti ala ti zia na gbele ala na ti si dä yeke yeke?
3 Zia aye na gbele ala ti si dä yeke yeke: Ababâ na amama ayeke sara kue ti fa na amolenge ti ala ti tambela, ti sara tënë, ti yü bongo na ti sara ambeni ye tongaso. Tongana amolenge ayeke maï tongaso, ababâ na amama ayeke zia ambeni fini ye na gbele ala. Tongana ababâ na amama ni ayeke aChrétien, ala yeke mû nga maboko na amolenge ti ala ti zia ambeni ye ti yingo na gbele ala so alingbi na ngu ti ala nga na ngangu ti ala na ti si dä (1 aCor. 9:26). Ala yeke fa na amolenge ti ala ti mû acommentaire so alondo na bê ti ala wani nga ti leke adevoir ti ala ti Ekole ti Kusala ti aChrétien ala wani? (Ps. 35:18). Ala yeke fa na ala ti fa tënë na alege nde nde kue? Ala yeke zia na gbele amolenge ti ala tënë ti batême nga na kusala ti ngoi kue? Ala yeke mû maboko na amolenge ti ala ti sara kamarade na aita so ayeke sara kusala ti ngoi kue na so ayeke na ngia na yâ ni ti tene aita ni akpengba ala?—aProv. 13:20.
4. Tongana ababâ na amama ato nda ti leke amolenge ti ala ti ga awafango tënë na ngoi so ala ngbâ kete a yeke ga na aye ti nzoni wa na amolenge ni?
4 Mbeni wasungo psaume atene: “O Nzapa, a komanse tongana mbi de molenge, Mo fa lege na mbi; na juska fadeso mbi fa tënë ti kota kusala ti Mo.” (Ps. 71:17). To nda ti leke amolenge ti mo gi na ngoi so ala ngbâ kete ti tene ala ga awafango tënë. Kite ayeke pëpe so gere ti aye ti yingo so ala yeke mû maboko na amolenge ti ala ti lu ni ayeke ga ande na ala aye ti nzoni na ngoi so ala ga kota!—aProv. 22:6.