Fa na amolenge ti mo ti sepela Jéhovah
1. Akete molenge alingbi ti sepela Jéhovah?
1 Psaume 148:12, 13 awa amolenge ti “sepela iri ti L’Eternel”. Mbeti ti Nzapa afa atapande mingi ti amolenge so asara tongaso. Na tapande, “Samuel asara kusala na gbele L’Eternel, lo de molenge”. (1 Sam. 2:18). A yeke ândö mbeni kete molenge-wali si atene na wali ti Naaman so prophète ti Jéhovah na kodoro ti Israël alingbi ti zi kobela ti ngiba na tere ti Naaman (2 aGbia 5:1-3). Tongana Jésus alï na yâ ti temple na lo sara aye ti kpene mingi, “amolenge” adë kongo, ala tene: “Hosanna na Molenge Ti David!” (Mat. 21:15). Tongana nyen ababâ na mama alingbi ti fa na amolenge ti ala ti sepela Jéhovah?
2. Ngbanga ti nyen a lingbi ababâ na mama azia nzoni tapande na amolenge ti ala?
2 Zia na ala tapande: Ândö na sese ti Israël, kozoni si ababâ ayôro tâ tënë na yâ bê ti amolenge ti ala, a tene na ababâ ti ndoye Jéhovah kozoni nga ti sara si komandema ti lo aduti na bê ti ala (Deut. 6:5-9). Tongana mo sara nzoni tënë ti fango tënë nga mo wani mo yeke sigigi na fango tënë yenga oko oko, a yeke pusu amolenge ti mo ti bâ kusala ni na nene ni nga tongana mbeni ye so amû ngia na zo.
3. Tongana nyen tapande ti babâ na mama ti mbeni ita-wali asara nzoni na lo?
3 Mbeni ita-wali atene na ngia na bê ti lo: “Na kete ti mbi, fango tënë ayeke na popo ti akusala so sewa ti e ayeke sara yenga na yenga. Babâ na mama ti mbi ayeke lani na ngia ti fa tënë. Na ngoi so e yeke kono, e bâ fango tënë tongana mbeni ye so amû ngia mingi.” Ita-wali so aga wafango tënë na ngu mbasambala kozoni si lo wara batême, na lo sara fadeso ngu 33 na yâ kusala ti ngoi kue.
4. Ti fa ye na amolenge yeke yeke aye ti tene nyen?
4 Fa ye na ala yeke yeke: Mû na amolenge ti mo mbeni ye ti sarango ni na fango tënë. Peut-être ala lingbi ti pika yanga-da, ti mû tract na zo, wala ti diko mbeni versê. Ye so ayeke kono ngia ti ala na ayeke mû maboko na ala ti bâ so ala lingbi ti mû mbage na fango tënë ti Royaume. Tongana ala yeke kono, fade mungo mbage ti ala na fango tënë ayeke gue na li ni. Tongaso, mû maboko na ala ti gue na li ni na ti zia aye ti yingo na gbele ala so alingbi ti mû lege na ala ti maï kusala ti ala.
5. Ye wa a hunda na molenge ti sara kozoni si lo ga wafango tënë so ade ti wara batême pëpe?
5 Ku pëpe ti sara tënë na a-ancien tongana mo bâ so amolenge ti mo alingbi ti ga awafango tënë so ade ti wara batême pëpe nga tongana ala sara nzara ti ga ni. Ti ga wafango tënë ayeke fa na ala so ala yeke na kungba ti sepela Jéhovah. Zia na li ti mo so ti to nda ti kusala ni, molenge ayeke na bezoin ti hinga ye mingi pëpe tongana ti kota zo so awara batême awe. Molenge ti mo ahinga akozo gere ti atënë so Bible afa? Lo yeke sara ye alingbi na ye so Bible afa na ndo nzoni tambela ti zo? Lo ye ti fa tënë na ti tene a hinga lo tongana Témoin ti Jéhovah? Tongana a yeke ni la, fade a-ancien alingbi ti bâ wala lo lingbi ti ga wafango tënë so ade ti wara batême pëpe.—Bâ buku Bungbi so a leke ni ti sala ye so Jéhovah aye, l. 79-82.
6. Ngbanga ti nyen ababâ na mama so afa ye na amolenge ti ala ayeke sara mbeni nzoni ye?
6 Ti fa na amolenge ti sepela Jéhovah na bê ti ala kue ahunda ngangu kusala. Ye oko, mbeni ye nde ti mû ngia mingi na ababâ na mama ahon ti bâ amolenge ti ala ague na li ni na lege ti yingo ayeke pëpe. Mingi ahon, bê ti Jéhovah ayeke duti na ngia mingi tongana lo bâ amolenge asara tënë ti apendere kusala ti lo.