‘Fa nda ti tënë ni kue’ na ndo ti Royaume ti Nzapa

1. A to nda ni na lango 14 ti mars, buku wa la e yeke manda na Mandango Bible ti Congrégation?

¹ Na yâ ti yenga so ayeke to nda ni ande na lango 14 ti mars 2011, e yeke to nda ti manda buku ‘Fa nda ti tënë ni kue’ na ndo ti Royaume ti Nzapa na Mandango Bible ti Congrégation. Buku so asara tene na ndo ti mbeti ti Kusala na mbeni lege so asara si zo so ayeke diko ni alingbi ti hinga nzerengo ti aye so asi na peko ti tere so a fa pekoni na yâ ni. Ahon ti fa nda ti versê oko na oko, buku Fa nda ti tënë ni afa aye so e lingbi ti manda na ndo ti aye so asi, so a fa pekoni na yâ ti mbeti ti Kusala nga ayeke mû maboko na e ti bâ tongana nyen e oko oko e lingbi ti sara ye alingbi na ye so e manda.​—aRom. 15:4.

2. Fa ambeni ye so ayeke na yâ ti buku Fa nda ti tënë ni.

² Aye so ayeke na yâ ti buku ni: Akozo tënë so ayeke na lembeti 2 ayeke mbeti so Bebungbi asû na ngia na bê ti fa so ala ye si e wara aye ti nzoni na lege ti buku so. Ti to nda ni na chapitre 2, mbeni tënë ayeke dä ti fa ye so chapitre oko oko aluti na ndo ni; a fa nga chapitre wala achapitre ti mbeti ti Kusala so a yeke sara tënë na ndo ni. Na yâ ti mingi ti achapitre ni a-encadré ayeke dä so afa ambeni tënë na ndo ti azo ni, ando ni wala aye so asi. A zia kota place na yanga ti alembeti ni ti tene e sû anote dä. Na yâ ti buku ni kue afoto ayeke dä ti fa anzene nzene tënë na ndo ti ambeni mbaï ti Bible, ti mû maboko na e ti bâ akota ye so asi. Na ndangba lembeti ni azia molongo ti afoto so ayeke na yâ ti buku ni na a sû ambeni tënë na tere ni ti fa nda ti afoto ni. Tongana mo zi couverture ti ndo ti buku ni na ti peko ni, mo yeke bâ acarte ti akodoro so a zia dä ti tene amû maboko na e ti bâ ando so akozo Chrétien afa nzoni tënë asi dä “juska na ambage ti sese so ayeke tâ yongoro.”​—Kus. 1:8.

3. Mandango mbeti ti Kusala ayeke kiri tënë na akota hundango tënë wa?

³ Akiringo tënë na akota hundango tënë: Mandango mbeti ti kusala ayeke mû maboko na e ti gbu nda ti akiringo tënë polele na akota hundango tënë na ndo ti kusala ti fango tënë. Na tapande, a hinga atâ disciple ti Jésus Christ na kusala wa? Zo wa la ayeke bâ ndo na ndo ti kusala ti fango tënë so na yâ ti dunia kue, nga tongana nyen? Alege wa sarango ngangu na kangango lege azi ni na awafango tënë? Kusala wa yingo vulu ayeke sara na yâ ti fango tënë ti e?

4. Tongana nyen la e lingbi ti wara aye ti nzoni mingi na lege ti mandango buku so?

⁴ Ti wara aye ti nzoni dä mingi, manda aye ni kozoni nga leke na bê ti mo ti mû mbage na lisoro ni na bungbi. Gue na abungbi ni kue, na gbu li ti mo ti bâ tongana nyen so mo lingbi ti sara kua na aye so mo manda na fango tënë. Zia si mandango pendere buku so apusu e ti fa nda ti tënë ni kue na ndo ti Royaume ti Nzapa!​—Kus. 28:23.