Vidéo Les Témoins de Jéhovah : organisés pour proclamer la bonne nouvelle
A hon angu 100 awe si a leke yâ ti bungbi ti aTémoin ti Jéhovah ti tene ala fa nzoni tënë. Na yâ ti ye so aga laso kota kusala ti fango tënë so ahon atanga ni kue na ndo ti sese, e yeke kangbi nzoni tënë so na ayanga ti kodoro ngbangbo mingi nga na yâ ti akodoro ahon 230 (Mat. 24:14). Ngbanga ti nyen kusala so ayeke kota ye? Tongana nyen a yeke sara ni na ndo ti sese kue? Vidéo Les Témoins de Jéhovah : organisés pour proclamer la bonne nouvelle akiri tënë na ahundango tënë so, na afa anzene nzene ye na ndo ti ambage nde nde ti kusala ti e na ndo ti sese kue. Na peko ti so mo bâ vidéo ni awe, gi ti kiri tënë na ahundango ndo so ge.
Tongana nyen la vidéo so apusu mo ti kiri singila mingi (1) teti ngangu so bungbi ti Jéhovah ayeke sara ti fa nzoni tënë na azo? (2 Tim. 4:2), (2) teti asewa ti Béthel na yâ ti dunia kue? (3) teti a-ekole so a yeke sara ndali ti amissionnaire nga na asurveillant? (2 Tim. 2:2), (4) teti nene ti to nda ti lango oko oko na dikongo mbeni versê na yâ ti brochure Gingo nda ti tënë ti Nzapa lâ oko oko na ti leke tere yenga oko oko ndali ti abungbi ti congrégation? (Kus. 17:11), (5) teti aye ti nzoni so e wara na guengo na abungbi? (aHéb. 10:24, 25), (6) teti aye ti nzoni so mo yeke wara ande na ngoi so sese akiri ti ga Paradis? (És. 11:9), (7) teti pasa so mo yeke na ni ti mû mbage ti mo na kusala ti kongo lê ti kobe so a yeke sara na ndembe so?—Jean 4:35.
Vidéo so ayeke mbeni kpengba ye ti kua so amû maboko na azo ti hinga nzoni mingi kusala so aTémoin ti Jéhovah ayeke sara na yâ ti dunia kue. (8) Na ngoi wa a yeke nzoni ti fa vidéo so na azo so e yeke manda Bible na ala, na afami ti e nga na ambeni zo? (9) Na ngoi so mo fa ni na azo, nyen la mo bâ na mbage ti ala so afa so vidéo ni anzere na ala?
Tongana e gbu li ti e na ndo ti aye so Jéhovah ayeke sara na ndembe so, a yeke pusu e ti tene oko tënë so wasungo psaume so atene: “O L’Éternel Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pëpe; tongana mbi ye ti sara tënë ti kusala ti Mo, fade a yeke mingi mingi, zo alingbi diko kue pëpe.” (Ps. 40:6). Zia e sara kusala nzoni na vidéo so ti sara si a dü na bê ti azo nzara ti kiri singila mingi na Jéhovah nga na bungbi ti lo!