Ngangu So Akasete-Vidéo So Afa Tënë ti Témoin Asala
1 “Molenge ti e ti koli ato nda ti bâ kasete-vidéo kozo ti tene lo tambela. Lo yeke bâ ni lakue lakue. A yeke nzoni mingi ti wara agbakuru so ayôro ndoye ti Jéhovah na yâ bê ti amolenge ti e!” Kasete-vidéo wa mama Chrétien so asala tënë ni? Kasete-vidéo so iri ni ayeke Noé: il marchait avec Dieu. Mbeni mama so lo yeke Témoin pëpe, so molenge ti lo abâ lani kasete-vidéo ti Noé na da ti mbeni zo, ato na biröo ti filiale mbeni matabisi ti adollar 90 ti kodoro ti Amerika (67 000 FCFA), na lo hunda wala e yeke na ambeni kasete-vidéo teti amolenge. Akasete-vidéo so bungbi ti Jéhovah aleke ni, asala ngangu mingi na ndo amolenge legeoko na akangba.
2 Na yâ Sewa: Na peko ti so mbeni sewa ti aTémoin abâ kasete-vidéo La fermeté des Témoins de Jéhovah face à la persécution nazie, mama ni atene: “Mbi gbu li na lango ni so kue na ndo tongana nyen Jéhovah amû lege na asenge zo ti gbu ngangu na yâ aye so adö bê! Na gbungo li na ndo aye so, a dabe mbi so akete kpale ti mbi mveni ayeke gi senge ye. Na bango kasete-vidéo so na amolenge ti e a mû maboko na ala ti bâ fadeso polele bezoin ti zia bê kue na Jéhovah. Na salango lisoro na ala na peko ti bango ni, e mû maboko na amolenge ti e ti wali ti duti na anzoni ye so a lingbi ti sala kusala na ni ti hon akpale na aye ti ngangu kue so ala lingbi ti tingbi na ni.”
3 Na Ekole: Tongana lo yeke sala mbeni tondo, mbeni maseka Témoin alingbi lani ti fa mbeni mbage ti kasete-vidéo La fermeté na yâ da-mbeti ti lo. Kozoni, wafango mbeti na lo atene so lo ye aTémoin pëpe. Na peko ti so lo bâ kasete-vidéo ni, lo tene: “Kasete-vidéo so agbian biani bango ndo ti mbi na mbage ti aTémoin ti Jéhovah. Mbi mû zendo so, na ngoi ti peko, tongana ala ga na yanga da ti mbi, fade mbi yeke dengi mê ti mä ala na ti to nda ti manda Bible na ala!” Ye nyen agbian bango ndo ti lo na mbage ti e? Lo tene so a yeke lani “tâ ndoye na dutingo be-ta-zo” ti e.
4 Na Fango Tënë: Mbeni ita-wali atingbi na mbeni wali so ayeke ndulu pëpe ti yeda na ambeti ti e, atâa so lo yeke na ahundango tënë na ndo ti e nga na ndo atënë ti mabe ti e. Ita-wali ni akiri ti bâ lo na kasete-vidéo Les Témoins de Jéhovah: un nom une organisation na lo fa ni na wali ni nga na koli ti lo. Bê ti ala use kue ado mingi na ala yeda ti manda Bible. Na peko ti nzoni tënë ti témoin so amû na ala, ala to nda ti gbian fini ti ala ti sala ye so bê ti Nzapa aye.
5 Mo yeke sala kusala na akasete-vidéo ti e ti mû lege na ala ti sala anzoye kue so ala lingbi ti sala?