Mo lingbi ti gue “na Macédoine”?
1. Nyen la asara si Paul na amba ti lo ague lani na Macédoine?
1 Na ngu 49 tongaso ti ngoi ti e, bazengele Paul alondo na gbata ti Antioche so ayeke na kodoro ti Syrie ti gue na use tambela ti lo ti missionnaire. Lo ye lani ti gue na Éphèse nga na ambeni gbata ti Asie Mineure. Ye oko, na yâ ti mbeni suma so lo bâ na lege ti yingo vulu, a tene na lo ti gue “na Macédoine” ahon ti gue na ando ni so. Lo na amba ti lo ni ayeda na ngia na bê ti ala, na ala yeke lani na pasa ti zia kozo congrégation na sese na ndo ni so (Kus. 16:9, 10; 17:1, 2, 4). Laso, ambeni ndo ayeke tâ na bezoin ti ambeni zo ti sara kua dä (Mat. 9:37, 38). Mo lingbi ti gue ti mû maboko na ando ni so?
2. Ngbanga ti nyen ambeni ita apensé pëpe ti gue na mbeni ndo nde so bezoin ayeke dä mingi?
2 Peut-être mo yeke na oko bibe ti missionnaire so Paul ayeke na ni lani me ade mo gbu li ti mo nzoni pëpe na ndo ti tënë ti guengo na mbeni ndo so bezoin ayeke dä mingi. Peut-être mo pensé nga pëpe ti gue na mbeni ndo nde ngbanga ti so mo bâ so mo lingbi pëpe ti manda mbeni yanga ti kodoro nde. Wala peut-être kpale ti nginza asara si mo ga na yâ ti kodoro so mo yeke dä so na tongaso mo yeke gi bê ti mo ti kiri ti gue na mbeni ndo nde. Me, na peko ti so mo zia tënë ni na yâ ti sambela, mo lingbi ti bâ so aye ni so alingbi pëpe ti kanga lege na mo ti gue na mbeni ndo nde so bezoin ayeke dä.
3. Ti fa tënë nzoni na mbeni territoire nde, ngbanga ti nyen a hunda pëpe ti sara ekole ti amissionnaire si?
3 A hunda ti sara ekole ti amissionnaire si?: Nyen la amû lani lege na Paul na amba ti lo ti sara kusala ti ala nzoni? Ala zia bê ti ala na ndo ti Jéhovah nga na yingo vulu ti lo (2 aCor. 3:1-5). Ni la, même atâa dutingo ti mo amû lege na mo pëpe ti sara mara ti a-ekole tongaso, mo lingbi lakue ti fa tënë nzoni na mbeni ndo nde so bezoin ayeke dä mingi. Nga, girisa pëpe so mo yeke wara lakue fango ye na lege ti Ekole ti Kusala ti aChrétien nga na Bungbi ti Kusala, so ayeke mû maboko na mo atâa ndo wa so mo yeke fa tënë dä.
4. Ngbanga ti nyen a yeke nzoni aita so aga kangba awe apensé pëpe so ala lingbi pëpe ti gue na mbeni ndo so bezoin ayeke dä mingi?
4 Aita so aga kangba awe: Aita so aga kangba awe na so akpengba na lege ti yingo so santé ti ala ayeke kamême nzoni alingbi ti mû maboko mingi na ando so bezoin ayeke dä. Mo gue na retraite awe? Ambeni so ayeke wara même mbeni kete pension alingbi ti duti kamême nzoni na yâ ti ambeni territoire so aye amaï dä mingi pëpe na lege ti konomi. Kâ, ngere ti aye ayeke ngangu pëpe ahon ti agbata so ala londo dä, même ti ahôpital so a yeke kaï kobela ti azo dä nzoni.
5. Fa peko ti ye so asi na mbeni ita so amû retraite awe na so ague na mbeni territoire nde.
5 Mbeni ita-koli so amû retraite awe na so ayeke ancien nga pionnier ague na mbeni ndo so atouriste mingi ayeke gue dä. Lo yeke ti lo ti mbeni ndo so ayeke tene yanga ti Anglais. Lo gue kâ ti mû maboko na mbeni groupe ti awafango tënë gumbaya so ayeke sara bungbi na yanga ti Anglais. Awafango tënë ni ayeke fa tënë na awande saki 30 so ayeke kâ. Ngu use na pekoni, azo 50 la ayeke ga na abungbi. Ita ni asû mbeti, lo tene: “Gango ti mbi ge so ayeke tâ mbeni nzoni ye so mbi de mbi wara mara ni tongaso pëpe, na ngoi ti fa pekoni kue ayeke dä pëpe!”
6. Fa peko ti ye so asi na mbeni ita-wali kumbamba so ague lani na mbeni ndo so bezoin ayeke dä mingi.
6 Aita-wali kumbamba: Jéhovah ayeke sara kua na gbâ ti aita-wali ti fa nzoni tënë na ando so bezoin ayeke dä mingi (Joël 2:28, 29). Mbeni ita-wali so ade maseka nga lo yeke kumbamba aye lani ti gue na mbeni ndo nde so bezoin ayeke dä ti fa tënë kâ, me babâ na mama ti lo agi bê ti ala ti tene sioni ye asi na lo pëpe. Gingo bê ti ala ni ayeke na lege ni. Tongaso lo soro mbeni territoire so kpale ti konomi ayeke dä pëpe nga so wusuwusu ayeke nga dä pëpe. Na pekoni, lo tokua mbeti na filiale si a mû na lo anzoni sango na ndo ni. Na yâ ti angu omene so lo sara kâ, lo wara aye ti nzoni mingi. Lo tene: “Tongana mbi ngbâ lani na ndo so mbi yeke dä kozo, ka mbi yeke wara a-étude mingi pëpe. Me so mbi yeke fa lani tënë na ndo so bezoin ayeke dä mingi amû lege na mbi ti sara gbâ ti a-étude na ti maï kode ti fango ye ti mbi nzoni.”
7. Fa peko ti ye so asi na mbeni sewa so ague na mbeni ndo nde so bezoin ayeke dä mingi ti fa tënë dä.
7 Asewa: Tongana mo yeke na amolenge, a yeke ni la alingbi ti kanga lege na mo ti gue na mbeni ndo nde ti fa tënë? Mbeni sewa so ayeke na amolenge use, so mbeni ayeke na ngu miombe na mbeni ayeke na ngu bale-oko, amû desizion ti sara tongaso. Mama ni asû mbeti ti fa peko ti ye so asi na ala, lo tene: “E kiri singila mingi so e bata amolenge ti e ge, teti so ala sara kamarade na apionnier spécial na amissionnaire. Fini ti e asi singo na aye ti nzoni teti so e sara na Jéhovah na ndo so kota bezoin ayeke dä.”
8. Zo alingbi ti gue na mbeni ndo nde ti fa tënë dä atâa so lo hinga yanga ti kodoro ni pëpe? Fa nda ni.
8 Kpale ti yanga ti kodoro ni: Tënë ti mandango mbeni yanga ti kodoro nde la akanga lege na mo ti gue na mbeni territoire nde? Peut-être na ando so ayeke na bezoin ti awafango tënë dä mingi, mo lingbi ti wara azo so ayeke tene yanga ti kodoro ti mo. Mbeni ita-koli na wali ti lo so yanga ti kodoro ti ala ayeke Anglais aye ti gue na mbeni territoire so azo ni ayeke tene yanga ti Espagnol. Kâ gbâ ti azo ayeke tene yanga ti Anglais nga. Ala hunda na filiale ti mû na ala sango na ndo ti acongrégation so ayeke sara bungbi na yanga ti Anglais na so bezoin ayeke dä. Filiale ni atokua na ala mbeni mbeti so na yâ ni a fa iri ti acongrégation ni so, tongaso ala soro mbeni oko na ala gue dä lege use ti bâ ni. Ala kiri na ndo so ala londo dä, ala zi mbage ti nginza so ala yeke wara nze na nze ala bata ni teti ngu oko. Tongana ala bâ so ala lingbi fadeso ti gue, aita ti ndo so ala ye ti gue dä agi mbeni da so alingbi na ala ti lango na yâ ni.
9, 10. Aita so ayeke na mbeni ndo nde alingbi ti bâ tënë wa, na ngbanga ti nyen?
9 Azo so ayeke na kodoro wande: Mo yeke na mbeni kodoro wande? Peut-être a yeke lani na ngoi so ade mo hinga tâ tënë pëpe? Peut-être a hunda ti wara aita mingi na yâ ti kodoro ti mo mveni. Mo lingbi ti bâ wala lege ayeke dä ti kiri kâ ti mû maboko? A yeke duti ande peut-être ngangu na mo pëpe ti wara kua kâ nga na da ti lango ahon ti zo so ague ti lo guengo kâ, nga peut-être mo hinga yanga ti kodoro ni. Mbeni ye ni ayeke so azo ti kodoro ni ayeke yeda ti mä mo hio na ngoi so mo yeke fa tënë na ala ahon ti zo so aga ti lo gango. Tënë so ayeke nga nzoni ndali ti aita so amû retraite awe na so ayeke na yâ ti akota gbata so aita ayeke fa ka tënë dä mingi na so ayeke bâ lege ti acongrégation ni nzoni. Peut-être ala lingbi ti bâ wala lege ayeke dä ti kiri na kete kodoro ti ala wala na ambeni ndo so ala gue ândö dä na tango so ala ngbâ ti sara kua ti Letäa, ti mû maboko na acongrégation wala agroupe so ayeke kâ.
10 Mbeni koli azia lani kodoro ti lo so ayeke Albanie lo gue lo ngbâ na Italie. Kâ lo wara nzoni kua, na lo yeke tokua nginza na asewa ti lo na Albanie. Na peko ti so lo hinga tâ tënë, lo to nda ti fa yanga ti Albanais na ambeni pionnier spécial ti Italie ndali ti so ala yeke gue na Albanie ti fa tënë kâ. Ita ni asû na mbeti, lo tene: “Aita so ayeke gue na kodoro so mbi zia. Ala hinga yanga ti kodoro ni pëpe, na tere ti ala anzere nzerengo ti gue kâ. Ti mbi, a dü mbi Albanais na yanga ti kodoro ti mbi ayeke Albanais. Nyen la mbi yeke sara na Italie ge nyen?” Tongaso, lo mû desizion ti kiri na Albanie ti fa nzoni tënë kâ. Lo tene: “So mbi dö kua ti nginza ti mbi na Italie mbi zia so, mbi regretté? Kete ape! Vrai kua la mbi wara na Albanie so. Ti mbi, kua so ayeke ga na ngia mingi na zo ayeke gi kua ti sarango na Jéhovah na ye kue so mo zo mo yeke na ni!”
11, 12. Ti aita so aye ti gue na mbeni ndo nde so bezoin ayeke dä mingi, a yeke nzoni ala sara nyen?
11 Lege ti sara ni: Lani, kozoni si Paul na amba ti lo ague na Macédoine, ala ye ti gue na mbage ti do, me “yingo vulu ake na ala.” Tongaso ala mû lege ti banga (Kus. 16:6). Tongana ala si nduru na Bithynie, Jésus ake na ala ti lï kâ (Kus. 16:7). Laso nga, Jéhovah ayeke sara kusala na Jésus ti bâ lege ti kua ti fango tënë (Mat. 28:20). Ni la, tongana mo ye ti gue na mbeni ndo so bezoin ayeke dä mingi, zia tënë ni na yâ ti sambela na Jéhovah.—Luc 14:28-30; Jacq. 1:5.
12 Hunda wango na a-ancien wala na ambeni ita so akpengba na lege ti yingo ti bâ wala mo lingbi ti gue na mbeni ndo nde (aProv. 11:14; 15:22). Diko ambeni mbeti ti e so asara tënë na ndo ti fango tënë na ando so bezoin ayeke dä mingi. Mo lingbi ti gue ti bâ ndo ni so mo ye ti gue dä so? Peut-être ti ninga kâ kete? Tongana mo ye biani ti gue na mbeni ndo nde, mo lingbi ti sû mbeti na filiale ti wara ambeni sango na ndo ni. Me ahon ti tene mo la mo tokua mbeti ni na filiale ni, mû ni na a-ancien ti congrégation ti mo ti tene ala zia ambeni tënë ti ala dä kozo si ala tokua ni.—Bâ Bungbi so a leke ni ti sala ye so Jéhovah aye, lembeti 111-112.
13. Filiale ayeke mû maboko na mo na yâ ti aye wa? A yeke ti mo ti sara nyen nga?
13 Fade filiale ayeke tokua na mo ambeni sango so alingbi ti mû maboko na mo na yâ ti desizion ti mo, me lo lingbi pëpe ti futa aye so mo yeke na bezoin ni wala ti bâ lege ti da ti lango ti mo. A yeke na mo ti bâ lege ti aye so nzoni kozoni si mo gue. A yeke nzoni ala so aye ti gue na mbeni territoire nde, ala wani abâ lege ti aye so ala yeke duti na bezoin ni.—aGal. 6:5.
14. Ti aita so dutingo ti ala amû lege na ala ti gue na mbeni ndo nde pëpe, ala lingbi ti kono yâ ti kusala ti ala tongana nyen na yâ ti congrégation ti ala?
14 Tongana lege ayeke dä pëpe ti gue: Tongana mo lingbi ti gue na mbeni ndo nde pëpe, zia bê ti mo anze pëpe. Peut-être mbeni ‘kota yanga-da nde azi na mo ti sara kusala’. (1 aCor. 16:8, 9). Surveillant ti circonscription ti mo ahinga peut-être mbeni ndo so bezoin ayeke dä na so ayo na mo pëpe. Peut-être mo lingbi ti sara kusala na yâ ti mbeni congrégation wala mbeni groupe so atene mbeni yanga ti kodoro nde na so ayo na ndo so mo yeke dä so pëpe. Wala mo lingbi ti kono yâ ti kusala ti mo na yâ ti congrégation ti mo. Atâa dutingo ti mo ayeke so wa, kota ye ni ayeke ti tene mo sara na Jéhovah na âme ti mo kue.—aCol. 3:23.
15. A yeke nzoni e sara ye tongana nyen na mbage ti aita so aye ti gue ti fa tënë na mbeni ndo so bezoin ayeke dä mingi?
15 Mo hinga mbeni ita so akpengba na lege ti yingo na so aye ti gue ti fa tënë na mbeni ndo so bezoin ayeke dä mingi? Tongaso, kpengba lo na yâ ni! Lani tongana Paul azia gbata ti Antioche ti kodoro ti Syrie, gbata ti Antioche ni ayeke lani mbeni kota gbata ti Kodoro-togbia ti Rome (na peko ti Rome na Alexandrie). Teti so territoire ti Antioche akono mingi, peut-être congrégation ni ayeke na bezoin ti Paul mingi. Ni la tongana lo hon, lo yeke zia kota dû na peko ti lo. Ye oko, Bible afa pëpe wala aita ni agi ti kanga lege na Paul ti hon. Ti bâ ni nzoni, ala pensé gi na ala mveni pëpe, me ala dabe ti ala so “yaka ni [wala ndo ti fango tënë ni] ayeke dunia so.”—Mat. 13:38.
16. Ngbanga ti nyen ti gbu li na ndo ti guengo na ando so ayeke tongana “Macédoine”?
16 So Paul na amba ti lo ayeda lani ti gue na Macédoine aga na ala aye ti nzoni mingi. Na ngoi so ala yeke na yâ ti gbata ti Philippes so ayeke na kodoro ti Macédoine, ala wara Lydie, na “Jéhovah azi bê ti lo kota ti dengi mê na aye so Paul ayeke tene.” (Kus. 16:14). Tara ti bâ ngia so Paul na amba ti lo so ayeke nga missionnaire tongana lo awara na ngoi so Lydie na azo ti da ti lo kue awara batême! Na ando mingi, a yeke wara azo ti nzoni bê tongana Lydie so ade ti mä tënë ti Royaume pëpe. Tongana mo gue na ando so ayeke tongana “Macédoine”, mo lingbi ti duti na ngia ti wara ala na ti mû maboko na ala.