Gue na zo ni ti wara tâ kiringo tënë ni
1. Na fango tënë, kode wa la ayeke nzoni mingi?
1 Na fango tënë, ti luti nganganga na ndo ti tënë ti e wala ti gue na zo ni yeke yeke ti gbu li na ti wara kiringo tënë so alingbi na ti Bible, so wa la ayeke nzoni? Lani tongana bazengele Paul ayeke sara tënë na aJuif so ayeke na Thessalonique lo pika patara na ala, na “ye ti pekoni ayeke so ambeni na popo ti ala aga azo so amä na bê”. (Kus. 17:2-4). Ti sara si zo afa tënë ti bê ti lo andu aye wa?
2. Na ngoi so e yeke fa tënë, e lingbi ti mû tapande ti Paul tongana nyen?
2 Gi ti hinga atënë ti bê ti zo ni nga ye so lo mä na bê dä: Ti gue na azo ti territoire ti e yeke yeke ti wara kiringo tënë so alingbi na ti Bible ahunda ti gi ti hinga atënë ti bê ti ala. Lani kozo ti tene Paul ato nda ti mbeni kpengba diskur na aGrec so ahinga Jéhovah pëpe na Aréopage, lo to nda ni na fango aye so ala hinga nga so ala yeda na ni (Kus. 17:22-31). Tongaso, tongana mo yeke leke tere ti mo ndali ti fango tënë, gi ti hinga ye so azo ti territoire ti mo amä na bê na ni mingi nga ti hinga asioni bibe so ala yeke na ni na ndo ti ambeni ye (1 aCor. 9:19-22). Tongana zo so mo ye ti fa tënë na lo atene mbeni tënë so ague nde na ti so mo ye ti fa, gi ti wara mbeni tënë so mo na lo amä tere dä, na sara si lisoro ti ala ni aluti na ndo ni.
3. Tongana nyen hundango tënë na ndara ayeke sara si e yeke gue na zo ni yeke yeke ti wara tâ kiringo tënë na tënë ti lo ni?
3 Hunda tënë na ndara: Ti fa lege na mbeni zo so ayeke voyagé ti si na ndo so lo ye ti gue dä, a lingbi e hinga ndo so lo yeke dä si. Legeoko nga, ti mû maboko na mbeni zo ti wara tâ kiringo tënë na mbeni tënë, a lingbi e hinga bango ndo ti lo si. Ngoi na ngoi Jésus ayeke hunda tënë na mbeni zo ti hinga bibe ti lo kozo si lo gue na zo ni yeke yeke ti wara kiringo tënë ni. Na tapande, na ngoi so mbeni zo ahunda Jésus atene, “Nyen la mbi yeke sara ande ti wara fini ti lakue lakue?,” Jésus agi ti hinga bango ndo ti zo ni kozo si lo kiri tënë na lo (Luc 10:25-28). Na mbeni ngoi ni nde, tongana Pierre amû mbeni kiringo tënë so ayeke na lege ni pëpe, Jésus ahunda tënë na lo na ndara ti leke bango ndo ti lo ni (Mat. 17:24-26). Tongaso, tongana mbeni zo so e ye ti fa tënë na lo ahunda mbeni tënë wala atene mbeni tënë so ayeke na lege ni pëpe, e lingbi ti hunda tënë na lo ti mû maboko na lo ti wara nzoni kiringo tënë ni.
4. Ngbanga ti nyen a yeke nzoni ti tene e gue na zo ni yeke yeke ti wara tâ kiringo tënë ni?
4 Tongana e gue na zo ni yeke yeke ti wara tâ kiringo tënë ni, e yeke mû tapande ti Kota Wafango ye, Jésus, nga na ti ambeni kozo Chrétien so ahinga lani ti fa tënë na ndara. E yeke bâ tënë ti lo na nene ni nga e yeke ne lo (1 Pi. 3:15). Ye ti pekoni ayeke so lo lingbi ti yeda ti tene e kiri ti bâ lo.