‘E Sala Tene Gi Polele’
1 A si na mo awe, na ngoi so mo leke tele ti mo nzoni kozoni, ti tene a fâ tene na yanga ti mo na lege ti atene so: “Sala tene gi polele. Mo ye nyen mbilimbili?” Zia e ba ye wa e lingbi ti manda na lege ti salango ye so.
2 Na ngoi ti e, mingi ni be-nze-pepe atia azo. Ala ye ti hinga e yeke azo wa na ngbanga ti nyen e yeke ge. Tongana ala mä so e ye ti sala tene na ndo Bible, ala lingbi ti ke ti mä e. Dikongo Bible na asalango lisoro na ndo aye ti yingo ayeke kota ye oko pepe na yâ fini ti azo mingi ti ngoi ti e. Tongana nyen ti gue na ala ti yeda ti mu akete penze-ngbonga ti sala lisoro na ndo mbeni tene ti Bible?
3 Mbeni kode so atambela nzoni: Kode so ayeke ti fa na zo so amä e so a wara na yâ ti Bible anzoni yorö teti akpale so andu lo, na ti fa ye polele na yâ ti andulu tene. Afango ye so asala kusala nzoni ayeke ala so ahunda mbeni mbilimbili tene so apusu zo ni ti gbu li, na so akiri tene na ni na lege ti mbeni versê ti Bible. Peut-être mo yeke duti ande na ngia ti tara awango so ge. A leke ni ti ‘sala tene gi polele’ hio na zingongo nga nzala ti zo so amä e.
4 Na yâ ti aterritoire so azo atene ka ‘a nzere na mbi pepe,’ e hunda na ala mbeni tene so andu ala mveni:
◼ “Na tongo nda ti fini ngu 2000 so, mo yeke na beku wala mo gi bê ti mo mingi? [Zia zo ni akiri tene.] Bible asala tene giriri ti aye ti kirikiri so ayeke si laso, me nga ye so ayeke si na nda ni.” Diko 2 Timothée 3:1, 2, 5 na aProverbe 2:21, 22.
◼ “Na yâ ti kodoro ti e, azo ayeke gi bê mingi na ndo kekereke ti aye so andu batango seni. Mo hinga so fade Nzapa ayeke kaï biaku akpale ti seni?” Diko Apocalypse 21:3, 4.
◼ “Mo bi bê ti mo so tongana e kue e sala ye alingbi na akpengba-ndia ti Bible, vaka ti e ayeke tambela nzoni?” Diko Matthieu 22:37-39.
5 Teti kusala ti e ayeke ti fa nzo tene ti Royaume, a lingbi, na ngoi kue so lege ti sala ni ayeke dä, e fa ye so Royaume ni ayeke sala ande. E lingbi ti tene:
◼ “Mo hinga so ngbele buku so ayeke na ndo sese, Bible, afa giriri so fade gi mbeni ngorogbia oko si ayeke fa lege na sese kue ?” Diko Daniel 2:44.
◼ “Ti mo, tongana Jésus Christ akomande sese, e yeke duti tongana nyen?” Diko Psaume 72:7, 8.
6 Na yâ ti aterritoire so azo amä na bê, e lingbi ti tara akozo tene so:
◼ “Azo mingi aba pasi teti akangbi ala ndali ti so ala yeke koli wala wali, ndali ti lege ti vorongo ti ala wala ti mara ti ala. Ti mo, Nzapa atene nyen na ndo asioni tene tongaso?” Diko Kusala 10:34, 35.
◼ “Mbi na mo kue e hinga so Jésus Christ asala aye ti kpene mingi na ngoi ti lo. Tongana mo lingbi ti hunda lo ti sala mbeni oko na ndo ni, mo yeke hunda so wa?” Diko Psaume 72:12-14, 16.
7 Tongana zo ni azi yanga-da ti lo gi kete, e lingbi ti to nda ti lisoro ni tongaso:
◼ “Azo mingi anze ti mä tene ti akpale. Ala ye si afa na ala ayorö ni. Mo kue nga, peut-être. Me, a lingbi ti wara atâ yorö ni na ndo wa?” Zia zo ni akiri tene. Diko 2 Timothée 3:16, 17.
8 Mo ye ti tara ni? Mingi ni, gi mbeni ndulu hundango tene alingbi ti zingo nzala ti mä tene. Mbeni wali, so kozoni ake ngangu ti mä tene, atisa na da ti lo aita-wali use so oko na popo ti ala ahunda lo: “Mo hinga Royaume so mo sambela ndali ni na yâ Babâ ti E so Ayeke na Yayu?” Hundango tene so apika bê ti wali ni, na pekoni lo yeda ti manda Bible. Laso, lo mu tele ti lo kue na Jéhovah na lo wara batême awe.
9 Tongana e yeke sala tene na mbeni zo, zia e sala tene na tâ bê kue. E zia bê ti e ti sala tene. Azo ayeke duti ndulu ti yeda na tene ti e tongana ala ba so e bi bê ti e biani na ndo ti ala.—Kusala 2:46, 47.
10 Laso, fango nzo tene ayeke ga ngangu mingi ahon. Ambeni zo asala mbito ti azo so ala hinga lë ti ala pepe. Ambeni ayeke na ye mingi ti sala na yâ fini ti ala, na ayeke na ngoi teti ala mveni mingi pepe. Ye oko, zia e hinga so e lingbi lakue ti wara ambeni zo so alingbi na tene ni. (Mat. 10:11) Angangu so e yeke sala ti gi ala ayeke lê ande alengo mingi tongana afango ye ti e ayeke ndulu nga tongana e ‘sala tene gi polele’!