Akode ota ti maï na fango ye ti mo

1. Ngbanga ti nyen a yeke nzoni e gi ti maï kode ti fango ye ti e?

¹ A-Témoin ti Jéhovah kue ayeke awafango ye. Atâa e yeke fa tënë da na da, wala e kiri ti sara vizite na mbeni zo so asara nzara ti tënë ni, wala e yeke manda Bible na mbeni zo, e yeke fa ye na zo ni la. Nga ye so e yeke fa na lo ayeke mbeni senge ye pëpe. E yeke zi nda ti “aMbeti so ayeke nzoni-kue,” so alingbi ti sara si azo ‘awara ndara ti wara na salut’. (2 Tim. 3:15). So tâ pendere pasa! Bâ akode ota so ayeke mû lege na e ti maï fango ye ti e.

2. Tongana nyen e lingbi ti fa ye na mbeni lege so akpengba pëpe?

² Fa ye na mbeni lege so akpengba pëpe: Tongana e hinga tënë so e yeke gue ti fa ni nzoni, e lingbi peut-être ti pensé so zo so e yeke gue ti fa tënë ni na lo ayeke hinga ni ande nzoni tongana ti e. Tongaso, na ngoi so mo yeke manda Bible na zo, yôro anzene nzene tënë gi senge senge pëpe na yâ ti fango ye ti mo. Nde na so, gboto gi lê na ndo ti akota tënë ni. Nzoni fango ye ayeke pëpe lakue gi dikongo gbâ ti atënë (aProv. 10:19). Mingi ni a yeke nzoni ti diko gi akota versê ni. Na peko ti dikongo mbeni versê, gboto lê gi na ndo ti mbage so ague oko na tënë so ala yeke manda. Na yâ ti fango ye ti Jésus na ndo ti Hoto, so ayeke na Matthieu chapitre 5 ti si na 7, a yeke wara akpengba tâ tënë dä, me Jésus afa ni na mbeni lege so akpengba pëpe nga lo tene atënë mingi pëpe.

3. Ye ti nzoni wa atapande alingbi ti sara? na ati so wa la ayeke nzoni mingi?

³ Atapande: Atapande ayeke sara si zo agbu li ti lo, azingo atënë ti bê ti zo na ayeke dabe ti zo na ye so lo manda. Pensé pëpe so a lingbi mo duti zo ti tenengo mbaï si mo sara kusala na anzoni tapande. Jésus asara kusala lani na anduru tapande so akpengba pëpe (Mat. 7:3-5; 18:2-4). Gi asenge dessin so a sara ni na ndo ti mbeti alingbi nga ti mû maboko mingi. Tongana mo gbu li ti mo kete kozo, mo lingbi ti wara anzoni tapande.

4. Tongana nyen e lingbi ti sara kusala nzoni na ahundango tënë?

⁴ Ahundango tënë: Ahundango tënë ayeke mû lege na zo so mo yeke manda ye na lo ti gbu li ti lo. Tongaso, tongana mo hunda tënë na lo, ku kete. Tongana mo wani mo fa kiringo tënë ni hio, mo yeke hinga pëpe ye so ayeke na yâ ti li ti lo. Tongana lo kiri tënë na lege ni pëpe, ahon ti tene mo fa na lo kiringo tënë ni, a yeke nzoni mo hunda ambeni tënë na lo ti mû lege na lo ti wara nzoni kiringo tënë ni (Mat. 17:24-27). Ti tâ tënë ni, e lingbi pëpe ti duti awafango ye so ayeke mbilimbili-kue. Ni la, Bible awa e ti sara hange lakue na fango ye ti e. Sarango tongaso ayeke ga ande na e aye ti nzoni teti lakue lakue nga na azo so ayeke mä e.—1 Tim. 4:16.