Bata yingo-ti-hinga ti mo
1. Mama-tene ti kota bungbi ti lango oko ti ngu ti kusala 2013 ayeke nyen? A leke kapa so ndali ti nyen?
1 Lâ oko oko, e yeke tingbi na aye so alingbi ti sara si e sara ye ague nde na yingo-ti-hinga ti e. Ni la, mama-tene ti kapa ti kota bungbi ti lango oko ti ngu ti kusala 2013 so ayeke to nda ni na lango 1 ti septembre ti ngu 2012 ayeke: “Bata yingo-ti-hinga ti mo.” (1 Tim. 1:19). A leke kapa ti kota bungbi so ti mû maboko na e ti bâ na nene ni lege so e yeke sara kusala na pendere matabisi so alondo na Wasarango e.
2. Akota hundango tënë wa a yeke kiri tënë na ni na ngoi ti kapa so?
2 Bâ atënë so: Kapa ni ayeke kiri ande tënë na akota hundango tënë mbasambala so andu yingo-ti-hinga:
• Aye wa alingbi ti sara sioni na yingo-ti-hinga ti e?
• Tongana nyen la e lingbi ti fa lege na yingo-ti-hinga ti e?
• Na lege wa ngbanga ti mênë ti zo oko alingbi ti duti na li ti e pëpe?
• Bibe ti e nga na sarango ye ti e na ndo ti afango ye ti Bible afa nyen na ndo ti e?
• Na lege wa e lingbi ti kpe ti sara sioni na yingo-ti-hinga ti amba ti e?
• Amaseka, tongana nyen la ala lingbi ti kanga bê na ngoi so azo agi ti pusu ala ti sara ye ti sioni?
• Azo so amû peko ti yingo-ti-hinga ti ala so Bible afa lege na ni ayeke wara aye ti nzoni wa?
3. A lingbi e sara nyen ti bâ nzoni na lege ti kapa so?
3 Na lege ti mungo maboko ti Jéhovah, e lingbi ti dö sese na aye so Satan ayeke sara ti buba yingo-ti-hinga ti e. Na lege ti Bible nga na bungbi ti lo, Babâ ti e ti yayu so aye e mingi ayeke tene na e: “So ayeke lege ni, i tambela dä.” (És. 30:21). Kapa ti kota bungbi so ayeke mbeni lege so Jéhovah ayeke fa lege na e. Tongaso, sara kue ti duti dä na ngoi ti kapa ni kue. Dengi mê nzoni nga bâ tongana nyen mo lingbi ti sara ye alingbi na aye so mo mä. Ala sara lisoro na ndo ni na sewa. Sarango ye alingbi na afango ye so e wara ayeke kpengba e ti ngbâ ti “duti na nzoni yingo-ti-hinga” nga ayeke mû maboko na e ti zia pëpe si aye ti dunia ti Satan ahanda e ti sara mbeni ye so ayeke buba songo ti e na Jéhovah.—1 Pi. 3:16.